Во рамки на СЦ „Јане Сандански“ има голема централна арена, со капацитет за 6.500 посетители, помошна спортска сала со димензии за кошаркарско и ракометно игралиште за 1.000 посетители и конгресен центар за прес-конференции направен според меѓународни стандарди, информираше Надица Димовска, генерален менаџер на СЦ „Јане Сандански“.

Дополнителните спортски капацитети е планирано да се отворат до крајот на оваа година.

- Ќе бидат отворени четири тениски игралишта, според АТП и ВТА стандарди, а две од игралиштата ќе можат да се користат и во зимскиот период. Дополнително во рамки на спортскиот центар ќе има и фитнес центар на површина од 500 метри квадратни, што ќе се употребува како за потребите пред се на професионалните спортски клубови, кои ќе играат натпреварите и ќе имаат тренинзи, така и за комерцијална употреба. Ќе има професионална спортска програма за фитнес. Паралелно ќе биде отворен и мултифункционален простор од 400 метри квадратни за одржување тренинзи по аеробик, пилатес и боречки спортови, изјави Димовска.

На западната страна на платото на спортскиот центар ќе биде отворена продавница, првпат во Македонија, на познатиот спортски бренд Хумел. Дополнително овој бренд ќе има обврска да ги сервисира фан шоповите на женскиот и машкиот ракометен клуб Вардар. Освен спортските капацитети, на површина од 300 метри квадратни, ќе има и игротека со поглед кон Паркот на езерцата во Општина Аеродром.

- Целиот објект е изграден со јавно-приватно партнерство склучено помеѓу компанијата на господинот Сергеј Самсоненко и Општина Аеродром, врз основа на кој ние имаме обврска да ги сервисираме потребите на кошаркарскиот клуб МЗТ Скопје Аеродром, на професионално ниво, според барањата на клубот за меѓународни и домашни натпревари и тренинзи во салата. Влезниците за натпреварите на почетокот ќе се продаваат преку продажната мрежа на МК Тикетс, а наскоро преку веб - страницата на спортскиот центар, рече Димовска.

Ивестирањето во ваков спортски објект, според неа, претставува голем економски импут, бидејќи во процесот учествуваа преку 60 македонски компании и пет странски. На објектот работеа над 1.600 работници, а беше изграден во рок од 16 месеци.

- Благодарение на јавното - приватно партнерство вклучително и со договорот кој го потпиша Општината Аеродром со компанијата на Самсоненко успеа да се изгради еден ваков објект кој ќе биде гордост на Македонија. Тоа ќе биде храм на двата ракометни тима Вардар - мажи и жени, и секако дом на македонскиот шампион во кошарка МЗТ. Очекувам сите три тима да имаме извонредни услови за работа, кога се има такви услови за работа претпоставувам дека неизоставни ќе бидат и добрите резултати, изјави претседателот на РК „Вардар“ Гордана Нацева.

Според неа, објектот е извонредно модерен и пријатен за гледање.

- Вардар посветува многу големо внимание на развивање на младинските програми. И во двата тима, па и во фудбалскиот се најави проектот за заживување на младинските школи. Од моментот кога го објавивме огласот пријавени се околу 2.500 деца од цела Македонија, кои се вклучени во школите на двата тима, изјави Нацева.

Хотелот „Русија“, што исто така е во рамки на СЦ „Јане Сандански“ ќе биде отворен исто така на крајот на месецов. Ќе има 61 соба и апартмани. Спа центарот ќе биде отворен на крајот на годината. Досега во хотелот се вработени 35 лица, а генералниот менаџер Дина Муцунска најави и нови вработувања/МИА.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.