Ова е првата голема одлука на „кралевите“ откако Скот Пери беше назначен за генерален менаџер.

Кристи ќе биде официјално претставен денес на прес-конференција.

-Го познавам Даг долго време и сум импресиониран од неговото лидерство, присуство и способност длабоко да се поврзе со своите играчи. Тој ги претставува основните вредности во кои веруваме - цврстина, дисциплина, професионализам, дефанзивен начин на размислување и несебичен, тимски ориентиран пристап во нападот. Нашата цел е целосно да го поддржиме и да помогнеме во поставувањето на темелите за неговиот долгорочен успех. Возбудени сме што продолжуваме напред со Даг како лидер, сподели Пери во соопштението.

Кристи го презеде тимот привремено откако Мајк Браун беше отпуштен кон крајот на декември и забележа 27 победи и 24 порази. Кингс се пласираа во плејинот како деветти носител, но загубија дома од Далас.

По тој натпревар, генералниот менаџер Монте МекНеир спогодбено го раскина договорот со клубот и Пери беше назначен на таа позиција.

Пери рече дека сака брзо решение во врска со тренерот и го направи тоа со тоа што го задржа Кристи. Тие сега ќе се обидат да го доведат Сакраменто во плејофот, откако клубот беше елиминиран во плејофот во последните две сезони.

Кристи, кој некогаш играше за Сакраменто, рече дека е почестен што е избран за тренер на тимот.

-Организацијата и градот се мој дом повеќе од 20 години. Сакам да им се заблагодарам на Кингс и на Скот за нивната поддршка во текот на целиот овој процес. За мене, ова е можност да му служам на тимот, на организацијата и на градот Сакраменто. Моето семејство и јас сме возбудени за ова ново поглавје, рече тој.

„Кралевите“ играа во плејофот само еднаш во последните 19 сезони, а тогаш загубија во првото коло од Голден Стејт во 2023 година.

Клубот се надева дека Пери и Кристи ќе обезбедат стабилност, а ‘рбетот на тимот го сочинуваат Домантас Сабонис, Демар Дерозан, Зак Левин, Киган Мареј и Малик Монк.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.