Балкан

САД: Србија плаќа превисока цена поради невоведување санкции кон Русија

Србија веќе плаќа „прекумерна цена“ избегнувајќи воведување санкции кон Русија поради инвазијата на Украина, изјави денеска американскиот амбасадор во Белград, Кристофер Хил.

Хил додаде дека САД ги разбираат искуствата на Србија со санкциите на кои претходно биле изложени.

„Разбираме дека Србија има историски однос и искуство со санкциите, но почнува да плаќа превисока цена за нејзината воздржаност во однос на санкциите против Русија, усвоени за да се запре бруталниот напад врз нејзиниот сосед (Украина)“, рече Хил, осврнувајќи се на санкциите под кои Србија беше во неколку наврати за време на владеењето на Слободан Милошевиќ.

На прашањето колку е реално Брисел да воведе санкции кон Белград доколку Србија не прифати нов европски предлог за решение на косовското прашање, американскиот амбасадор рече дека не е во позиција да зборува за можни санкции, оценувајќи дека ЕУ е сериозна во врска со санкциите што ги применува меѓународната заедница.

Хил рече дека САД „100 отсто го поддржуваат предлогот на ЕУ за Косово“ и оти има напредок бидејќи Европејците вложиле големи напори да ги зближат двете страни.

„Фер е да се каже дека тоа е процес, не е завршен додека не заврши“, рече Хил, потсетувајќи дека косовскиот проблем „ги оптоварува сите повеќе од 20 години“. Тој рече дека затоа „треба сериозно да го разгледаме“ предлогот на ЕУ и „да размислиме за начините како да го усвоиме и да работиме на него“.

Предлогот на ЕУ, поддржан од Германија, Франција, Италија и САД, беше претставен пред Белград и Приштина во септември и декември минатата година и предвидува почитување на територијалниот интегритет, неповредливост на границите, признавање на државните симболи и посебен аранжман за српската заедница во Косово. Белград е тој што инсистира дека формирањето на Заедницата на српски општини на Косово е клучната точка за продолжување на натамошниот дијалог за конечното решение.

Српскиот претседател Александар Вучиќ по средбата во петокот со претставниците на САД и ЕУ изјави дека Србија е „подготвена да го прифати концептот на европскиот план“ и да работи на спроведувањето на предложениот договор за дијалог со Косово.

Потоа, во понеделникот во обраќањето до српската јавност, тој рече дека планот што Вашингтон и Брисел го поставија пред Белград стана „де факто преговарачка рамка за влез на Србија во Европската унија“ и предупреди на низа политички и економски последици за Србија доколку не се прифати планот.

Тој нагласи дека американско-европските дипломати го предупредиле дека во спротивно Србија ќе се соочи со прекин на евроинтеграцискиот процес, укинување на безвизниот режим со земјите од ЕУ, запирање, а потоа и повлекување на инвестициите и „сеопфатни мерки во политичка и економска смисла“ што ќе ѝ нанесе голема штета на Србија.

Вучиќ денеска на Инстаграм објави видео порака до граѓаните во која истакна дека ја кажал „вистината за сите проблеми“ со кои се соочува Србија во однос на Косово.

Тој се пожали на реакцијата на опозицијата, обвинувајќи ги неговите политички ривали дека не разбираат „дека државата е поважна од политичките интереси на која било партија“ или на кој било поединец. Тој најави дека ќе им се обрати на претставниците бидејќи негова „обврска е да го почитува парламентот“.

„Ќе се појавам во Националното собрание, ќе одговорам на сите прашања и ќе се борам за Косово и Метохија и нашата Србија“, порача Вучиќ во видео пораката на Инстаграм.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Фудбал

Манчестер Јунајтед ќе плати милионско обесштетување за Покетино

Великанот од „Олд Трафорд“ Манчестер Јунајтед се раздели со клупската легенда, менаџерот Мајкл Керик.

Како негов наследник медиумите од Британија го промовираат селекторот на САД, Маурисио Покетино.

Аргентинецот моментално ја предводи репрезентацијата на Соединетите Држави, но неговиот договор содржи клаузула која му овозможува да си замине од американскиот тим со плаќање одредена отштета.

Според британските медиуми, овој износ – кој се однесува на Покетино и неговиот стручен штаб – надминува 10 милиони евра, а Јунајтед се согласи да го плати. Останува уште официјална потврда, но нема сомнеж: Покетино се враќа во Премиер лигата, каде што претходно ги водеше Саутемптон, Тотенхем и Челси.

Култура

Предавање за јапонскиот чај „Сенча“ на Филолошкиот факултет „Блаже Конески“ – Скопје

На 13 ноември 2026 година, во Аулата на Филолошкиот факултет „Блаже Конески“ при Универзитетот „Св. Кирил и Методиј“ во Скопје, ќе се одржи настанот „DISCOVERY: Јапонски чај – Сенча“, посветен на историјата, културата и традицијата на јапонскиот чај.

Гостинка на настанот ќе биде Курита Јунко, специјалистка за јапонски чај, која ќе одржи предавање за историјата и културното значење на јапонскиот чај, ќе претстави јапонски изрази поврзани со чајната традиција и ќе им овозможи на присутните да учествуваат во дегустација на јапонски чај.

Настанот ќе се одржи од 10:00 до 12:00 часот, а предавањето ќе биде на англиски јазик. Учеството е бесплатно и не е потребна претходна регистрација.

Настанот е во соорганизација на Универзитетот „Св. Кирил и Методиј“ во Скопје и Јапонската фондација од Будимпешта.

Македонија

Жерновски: Кривични пријави против СДСМ за ширење паника кај Мицкоски

Почитувани граѓани, сведоци сме деновиве на едно панично штитење од страна на Мицкоски и од страна на Владата на Алта банка на Александар Вучиќ.

Едноставно му нареди, буквално му нареди на Трајко Славески како гувернер да поднесе кривични пријави, не само како гувернер, туку и Народната банка да поднесе кривични пријави против претседателот на партијата, Венко Филипче, против генералниот секретар, против потпретседателот на партијата и против мене.

Исто како што беше, значи, внесувањето на Алта банка на Вучиќ во Македонија, така сега се копира однесувањето на Вучиќ во нашата земја.

Имаме чист копи-пејст на тоа што го гледавме во Србија.

Значи, што можеме да заклучиме? Малиот Вучиќ од Македонија работи по налог на оригиналот од Србија.

Сакаме денеска, преку веројатно една подолга прес-конференција, меѓутоа, за да можеме што е можно пократко да разбереме што кај нас се случува, ќе се обидам преку два примера за да ни стане на сите јасно како функционира овој систем, оваа поврзаност, папочна врска помеѓу Вучиќ и Мицкоски или помеѓу Мицкоски и Вучиќ.

Како сакате, нема разлика. Значи, да појдеме со примерот на звучниот топ.

Во Белград, по употреба на звучниот топ, откако полицијата предизвика хаос на улиците за време на протестите против криминалниот режим на Вучиќ, министерот за внатрешни работи Дачиќ прво изјави дека тие не поседуваат топ. Наредниот ден изјави дека поседуваат топ, ама дека топот е мал, за да ден потоа изјави дека да, имаат голем топ, меѓутоа не бил употребен таа вечер.

По извештаите на странските агенции и по реакцијата и вклучувањето на Обединетите нации, што направи Вучиќ?

Посегна по секој модел на владеење на оној којшто владее со режим. Ја обвини опозицијата дека ширела паника помеѓу граѓаните. Дали ви звучи познато? Се разбира, тоа се случува кај нас. Тоа се случува сега под истиот терк.

Така работи и нашиот премиер Мицкоски. И не само што обвини дека опозицијата шири паника, туку започна и со апсења, со кривични пријави.

Многу познато. Денеска истрагата е во тек. Ќе дојдат одговорности и до него и до министерот, и до сите оние што лажеа и направија таква паника.

Сега го гледаме сето тоа, исто како Мицкоски го прави со Алта банка.

Прво, јунакот побегна во Германија на екскурзија и оттаму набљудуваше што се случува сето тука, за фокусот да биде на други, никој да не гледа каде е тој. Го снема цела недела. По информациите од обвинителот од Србија дека банката служела како пералница на пари, Славески и Мицкоски рекоа дека кај нас сè е во ред.

Се сеќавате. Само што рекоа дека сè е во ред, потоа објавија дека има пет-шест заинтересирани за купување на банката.

Чекајте, се поставува прашањето зошто би се продавала банката ако сè е во ред?

Или како се нуди кој ќе купи банка којашто е под истрага, чиј сопственик е во притвор, чијшто влез е забранет во Црна Гора, банка којашто е под истрага или банка за којашто Централната банка на Европа изјави дека не сака и не дозволува влез на таквата банка, односно таквите криминални пари во нејзиниот систем затоа што се сомнева во потеклото на парите, односно дека е направено со перење на пари.

На крај, кого обвинија? Се разбира, медиумите. И потоа, откако се врати Мицкоски, на крај мораше да се врати во Македонија, се разбира, се обвини дежурниот виновник, а тоа е СДСМ. Значи, ете го истиот модел со истите обвинувања за ширење паника, со истите алатки коишто ги користи секој режим, а тоа е притисок врз опозицијата, налози за апсења и така натаму.

Во Србија, да одиме сега преку друг пример. Народната банка рече дека сè е во ред. Следниот ден ја одзеде дозволата за работа, а по два дена банката отиде во стечај. Како беше кај нас?

Тогаш СДСМ не ширеше паника, туку ширеа паника оние што се задолжени и оние што овозможија влез на овие пари од Србија во Македонија.

Значи, веднаш по воведувањето на присилната управа, гувернерот Славески рече, цитирам: „Сè е во ред“, но веќе наредниот ден, ако се сеќавате, воведе ограничување од десет илјади денари. Потоа ја воведе присилната управа и им забрани на граѓаните да ги користат средствата, оние пари коишто се неопходни за храна, за лекови и така натаму.

Познат модел, истиот под теркот на она што го гледавме во Србија. Внимавајте што се случуваше кај нас по најавите од Белград дека се вршат сомнителни трансакции за големи износи од Белград преку Скопје во Москва. Тие направија директна штета и вистинска паника предизвикаа меѓу граѓаните. Ете, тоа е паниката којашто вистински беше проширена токму од нив, токму од Мицкоски, токму од Славески.

Славески самиот многу добро знае дека со потписот самиот себе се обвинил, затоа што дал дозвола за работа на оваа банка на Вучиќ, којашто служи за перење пари коишто се внесени преку криминал, преку корупција и преку продажба на дрога.

Мицкоски јавно призна, да потсетиме, дека учествувал и со банката и со осигурителната компанија.

Почитувани граѓани, сега на ред е обвинителството. Сега обвинителот Савески е на потег. Дали ќе застане на страна на правдата и на страна на вистината или ќе застане на страна на организираната криминална банда на Мицкоски? Во Србија, да потсетиме, секој ден има апсење и сите оние обвинители што учествуваа во оваа криминална шема на Вучиќ веќе се соочени со кривични пријави.

Сето ова со оваа наша банда којашто е на власт, за да помине, мора да постои една ваква организирана шема, криминална, којашто е одбранета и е спонзорирана однадвор и поддржана од нашиот премиер. Овие балкански картели, како што се рушат во Србија, ќе се срушат и кај нас затоа што се дел од тој голем балкански картел.

Во Србија, по осудата и барањето истрага од меѓународната заедница, Вучиќ ги повика Русите во одбрана.

Единствено којшто застана во одбрана на Вучиќ е, кој друг ако не ФСБ, Федералната служба за безбедност на Руската Федерација.

Се поставува прашањето дали истиот модел ќе го користи Мицкоски? Времето ќе покаже.

Сега да признаеме и ние нешто. Дали СДСМ некаде ширеше паника? Да, но не кај граѓаните, туку ширеше паника и ќе шири паника кај Мицкоски и кај криминалната банда којашто е опкружена околу него и нема да се спаси од таа паника и ќе одговара.

Вчера во Собранието, на Комисијата, Мицкоски лажеше пред целата македонска јавност само за да се оправда со Алта банка.

Тие гнасни лаги коишто вчера Мицкоски ги изнесе против СДСМ за тоа како ја внел и кој ја внел Алта банка во Македонија, бидете сигурни дека ќе одговара и за тоа.

Сакам на крај да му порачам нешто од име на СДСМ директно на премиерот Мицкоски.

Мицкоски, доаѓа крај на твоите лаги. Тоа што работеше по налог на твојот шеф Вучиќ, знаеш и сам каде те одведе.

Веќе нема назад. Доаѓа време на вистината. Доаѓа време кога ќе одговараш. Доаѓа време кога сите ќе ја дознаеме таа вистина и ќе бидеме задоволни што конечно ќе се соочиш со правдата.

Прес конференција на СДСМ, Андреј Жерновски – Секретар за меѓународна соработка

Скопје, 12.11.2026

СДСМ