Бахреин и Кувајт презедоа вонредни мерки по американските напади врз нуклеарните постројки на Иран

Бахреин, каде што се наоѓа регионална база на Централната команда на САД, имплементираше план за далечинска работа за 70 проценти од своите државни службеници и ја повика јавноста да ги користи главните патишта само кога е потребно, објави „Нешнел“.

„Поради неодамнешните случувања и ситуацијата во регионот, ги повикуваме граѓаните да ги користат главните патишта само кога е потребно за да се одржи јавната безбедност и да им се овозможи на надлежните органи ефикасно да ги користат патиштата“, се вели во соопштението на Министерството за внатрешни работи.

Министерството за финансии на Кувајт соопшти дека го активирало својот план за итен одговор за да се обезбеди континуитет на финансиските операции.

Во таа држава има голема американска база која обезбедува логистика за американските воени операции во регионот. Мерките вклучуваат подготовка на засолништа во зградите на министерскиот комплекс, во кои може да се сместат околу 900 луѓе.

Иран веќе се закани дека ќе ги нападне американските воени бази во регионот ако Вашингтон интервенира на страната на Израел.

Арапските држави изразија сериозна загриженост по американските напади врз Иран и повикуваат на преговори

Саудиска Арабија соопшти дека „со длабока загриженост ги следи случувањата“ по американските воздушни напади врз нуклеарните постројки во соседен Иран, објави весникот „Ал-Шарк Ал-Авсат“. Саудиското Министерство за надворешни работи повика на „воздржаност“ и повтори дека го осудува нарушувањето на суверенитетот на иранската држава.

„Кралството нагласува потребата да се вложат сите можни напори за воздржаност, намалување на тензиите и избегнување на понатамошна ескалација“, се вели во официјалното соопштение.

Ријад ја повикува меѓународната заедница да ги интензивира своите напори во овој исклучително чувствителен период за да се постигне политичко решение кое би ставило крај кризата и ќе воведе нова ера на безбедност и стабилност во регионот.“

Оман, кој посредува во нуклеарните разговори меѓу Вашингтон и Техеран, изјави дека американските воздушни напади врз Иран се закануваат да ја „прошират војната“ и претставуваат нарушување на меѓународното право, објави „Ал Ахрам“.

Катар изрази жалење поради „влошувањето на ситуацијата со нападите врз иранските нуклеарни постројки“. Во ставот на Министерството за надворешни работи на Катар на Икс се наведува дека земјата со „длабока загриженост“ ги следи случувањата по најновите напади врз „братската Исламска Република Иран“.

Доха ја нагласи итната потреба од запирање на сите воени операции и враќање на дијалогот и дипломатските контакти за решавање на отворените прашања.

Ирак изрази „длабока загриженост“ и предупреди дека нападот на САД врз нуклеарните постројки на соседниот Иран го загрозува мирот и стабилноста на Блискиот Исток.

„Воената ескалација е сериозна закана за мирот и безбедноста на Блискиот Исток и претставува сериозен ризик за регионалната стабилност“, изјави портпаролот на Владата, Басем Алави.

Египет изрази „сериозна загриженост“ и ја осуди ескалацијата, која има сериозни последици за регионалната и меѓународната безбедност и мир, се вели во соопштението на Министерството за надворешни работи.

Каиро ја нагласи потребата од почитување на суверенитетот на државите и соопшти дека политичките решенија и дипломатските преговори, а не воената акција, се единствениот начин да се најде трајно решение за кризата.

Мерц го повика Иран веднаш да започне преговори со САД и Израел

Германскиот канцелар Фридрих Мерц го повика Иран веднаш да започне преговори со Соединетите Американски Држави и Израел со цел да се најде дипломатско решение за конфликтот, соопшти денеска портпаролот на германската Влада.

Тој рече дека Мерц „тесно ќе се координира“ со своите партнери од ЕУ и САД за понатамошните чекори во текот на денот.

Американскиот претседател Доналд Трамп рано изутрината соопшти дека САД синоќа нападнале три постројки за збогатување ураниум во Иран и дека сите три постројки се целосно уништени.

Високата претставничка на Европската Унија за надворешна политика и безбедност Каја Калас и претседателот на Европскиот совет, Антонио Кошта ги повикаа сите страни на воздржаност и да се вратат на преговарачка маса. Британскиот премиер Кир Стармер го повика Иран да се врати на преговарачка маса и нагласи дека стабилноста во регионот останува приоритет.

Генералниот секретар на Обединетите нации, Антонио Гутереш во врска со американските воздушни напади врз три ирански нуклеарни објекти изјави дека постои „зголемен ризик овој конфликт брзо да излезе од контрола, со катастрофални последици за цивилите, регионот и светот“.

Иранско МНР: САД започнаа опасна војна против Иран

Иранското Министерство за надворешни работи денеска соопшти дека со синоќешниот напад врз иранските нуклеарни постројки САД започнаа „опасна војна против Иран“, пренесоа денеска иранските медиуми.

„Светот не смее да заборави дека САД, сред дипломатскиот процес, ја предадоа дипломатијата“, се вели во соопштението на иранското Министерство за надворешни работи, кое го пренесува Си-Ен-Ен.

Во исто време, иранската државна новинска агенција објави соопштение од иранските власти во кое Израел се опишува како „геноцидна творба што ги крши законите“ и се обвинуваат САД за започнување „опасна војна против Иран“.

Во него се наведува дека нападите врз Иран претставуваат кршење на Повелбата на Обединетите нации и меѓународното право и дека американската Влада „сноси целосна одговорност за сериозните последици и ужасните последици по гнасниот злостор“.

Иранското Министерство за надворешни работи предупреди за „легитимното право на Иран да ја брани својата национална безбедност и државните интереси со сите потребни средства и целосно и решително да се спротивстави на воената агресија на САД и злосторствата извршени од отпадничкиот (израелски) режим“.

Иран ги повикува ОН и другите тела на светската организација, вклучувајќи ја и Меѓународната агенција за атомска енергија (МААЕ), „итно да го разгледаат овој очигледен криминален и нелегален чин“ и бара Советот за безбедност на ОН да одржи итна седница за да ги осуди нападите врз Иран.

Иранскиот министер за надворешни работи, Абас Арагчи претходно денеска предупреди дека нападите на САД врз нуклеарните постројки на Иран „ќе имаат трајни последици“.

Кошта е загрижен поради ситуацијата на Блискиот Исток и ги повика сите страни на воздржаност

Претседателот на Европскиот совет, Антонио Кошта денеска изјави дека е длабоко загрижен поради ситуацијата на Блискиот Исток, повикувајќи ги сите страни на воздржаност и дипломатија.

„Ги повикувам сите страни да покажат воздржаност и почитување на меѓународното право и нуклеарната безбедност“, напиша Кошта на платформата Икс.

Дипломатијата, нагласи Кошта, останува единствениот начин да се донесе мир и безбедност во регионот на Блискиот Исток.

„Премногу цивили повторно ќе бидат жртви на понатамошна ескалација“, рече Кошта, додавајќи дека ЕУ ќе продолжи да разговара со страните и партнерите.

Претходно денеска, високата претставничка на Европската унија за надворешни работи и безбедносна политика, Каја Калас, апелираше до сите страни да се воздржат од понатамошни чекори и да се вратат на преговори, откако САД извршија напади врз три ирански нуклеарни објекти.

Таа напиша на платформата Икс дека на Иран не смее да му се дозволи да развива нуклеарно оружје.

Американскиот претседател Доналд Трамп рано изутрината соопшти дека САД синоќа нападнале три постројки за збогатување ураниум во Иран и дека сите три постројки се целосно уништени. Според него, постигнат е „спектакуларен воен успех“, објави Би-Би-Си. Нуклеарните постројки кои изминатата ноќ беа цел на американските бомбардери се Фордо, Натанц и Исфахан.

НАТО внимателно ја следи ситуацијата во Иран, изјави претставник на Алијансата

НАТО внимателно ја следи ситуацијата во Иран, откако американскиот претседател Доналд Трамп рече дека американските воени авиони бомбардирале ирански нуклеарни објекти, изјави денеска официјален претставник на Алијансата.

Анонимниот претставник, коментирајќи ја евентуалната реакција на НАТО и можното влијание на американската воена акција врз Северноатлантската алијанса, рече „дека ситуацијата, секако, се следи внимателно“.

НАТО идната недела организира самит во Хаг, а се очекува дека, покрај ситуацијата во Иран, главни теми ќе бидат конфликтот во Украина и зголемувањето на воените трошоци од страна на земјите-членки.

Кац: Целта на нападите врз трите ирански нуклеарни објекти беше да се „гарантира дека Иран не поседува нуклеарно оружје“

Израелскиот министер за одбрана Израел Кац ги поздрави синоќешните воздушни напади на САД врз три ирански нуклеарни објекти како историски чекор, јави ДПА, повикувајќи се на неговата изјава.

„Целта на нападите врз трите ирански нуклеарни објекти беше да се гарантира дека Иран не поседува нуклеарно оружје - оружје што би ги заплашило Израел, земјите од регионот и интересите во областа на националната безбедност на САД. Алијансата меѓу САД и Израел е посилна од сè друго - во корист на мирот и безбедноста на двете нации и целиот слободен свет“, рече израелскиот министер за одбрана.

Американски бомбардери Б-2 и бомби за уништување бункери користени во нападот врз цели во Иран

Стелт бомбардерите Б-2 Спирит на американските ВВС беа вклучени во нападите врз нуклеарните објекти на Иран.

Три ирански нуклеарни објекти беа погодени во „многу успешен напад“, изјави претседателот Доналд Трамп, додавајќи дека крунскиот бисер на нуклеарната програма на Техеран, Фордо, е уништен.

Б-2 е една од најнапредните платформи за стратешко оружје на САД способен да упадне во софистицирана воздушна одбрана и да изврши прецизни напади врз зацврстени цели како што е закопаната мрежа на нуклеарни истражувачки објекти на Иран.

СПЕЦИФИКАЦИИ НА Б-2 СПИРИТ:

Американскиот Б-2 чини околу 2,1 милијарди долари, што го прави најскапиот воен авион некогаш изграден. Произведен од Нортроп Груман (NOC.N), бомбардерот, со својата најсовремена стелт технологија, го започна своето производство кон крајот на 1980-те. Само 21 се произведени откако беше скратена планираната програма за набавки на Пентагон.

Дострелот на бомбардерот од над 6.000 наутички милји (11.112 км) без полнење гориво овозможува глобални можности за напади од континенталните американски бази. Со полнење гориво од воздух, Б-2 може да достигне практично секоја цел во светот, како што е демонстрирано во мисиите од Мисури до Авганистан и Либија, а сега и во Иран.

Неговиот капацитет на носивост од повеќе од 18.144 кг. му овозможува на авионот да носи разновиден спектар на конвенционално и нуклеарно оружје. Внатрешните простори за оружје на бомбардерот се специјално дизајнирани да одржуваат карактеристики на прикривање, а воедно да сместуваат големи товари со муниција, што би можело да вклучува две GBU-57A/B MOP ((Massive Ordnance Penetrator), прецизно наведувана бомба „разбивач на бункери“.

Во извештаите се вели дека шест такви бомби биле користени врз истражувачкиот центар Фордо во Иран.

Конфигурацијата на екипажот со два пилота на Б-2 ги намалува барањата за персонал, а воедно ја одржува оперативната ефикасност преку напредни системи за автоматизација.

Стелт технологијата на Б-2 вклучува материјали што апсорбираат радар и аголни карактеристики на дизајнот што го минимизираат откривањето од страна на непријателските системи за воздушна одбрана. Неговиот радарски пресек е наводно споредлив со оној на мала птица, што го прави речиси невидлив за конвенционалниот радар.

(Massive Ordnance Penetrator) MOP:

MOP од 30.000 фунти (13.600 kg) претставува најголема конвенционална бомба во американскиот арсенал, специјално дизајнирана за уништување зацврстени подземни бункери. Неговата масивна големина бара Б-2 да носи само еден или два MOP по мисија, но обезбедува неспоредлива способност за уништување подземни бункери.

Должината на оружјето од 20,5 стапки (6,25 метри) и GPS-водениот систем за прецизно насочување овозможуваат прецизни удари врз специфични подземни објекти. Неговата способност за пенетрација од над 200 стапки низ зацврстен бетон го прави ефикасен против најзаштитените подземни инсталации во светот.

КОНВЕНЦИОНАЛЕН ТОВАР:

Муницијата за директен напад (JDAM) му обезбедува на Б-2 прецизен конвенционален капацитет за удар врз фиксни цели. Ова GPS-водено оружје може да се распореди во голем број, при што бомбардерот е способен истовремено да нападне повеќе цели со голема точност.

Оружјето за одвојување (JSOW) го проширува опсегот на ангажирање на авионот, додека одржува карактеристики на прикривање за време на приближувањето. Овие лизгачки бомби му овозможуваат на B-2 да напаѓа цели надвор од силно бранетиот периметар на воздушниот простор.

Проектилите воздух-земја (JASSM) нудат можност за прецизен удар со голем дострел со свои карактеристики на прикривање. Варијантата JASSM-ER со продолжен дострел обезбедува опции за удар врз цели на оддалеченост од над 805 км.

СПОСОБНОСТИ ЗА НУКЛЕАРЕН ТОВАР:

B-2 Спирит служи како клучна компонента на нуклеарната тријада на САД, способна да испорача стратешко нуклеарно оружје со прикривање и прецизност. Авионот може да носи до 16 нуклеарни бомби B83.

Хамас го осуди нападот на САД врз ирански нуклеарни постројки нарекувајќи го очигледен чин на агресија

Палестинското исламистичко движење Хамас во соопштение објавено изутринава го осуди нападот на САД врз иранските нуклеарни постројки, нарекувајќи го очигледен чин на агресија.

Според Хамас, нападот претставува „опасна ескалација“ и го загрозува мирот и меѓународната безбедност, се наведува во соопштението.

САД слепо ја следат агендата на Израел. Сепак, нападот нема да ја скрши волјата на иранскиот народ, со кого изразуваме солидарност, соопшти палестинското исламистичко движење.

Хамас се смета за важен сојузник на Иран.

Саудиска Арабија изразува „голема загриженост“

Саудиска Арабија изрази „голема загриженост“ поради нападите на САД врз Иран.

Таа ја повика меѓународната заедница да ги удвои своите напори во такви „исклучително чувствителни околности“ за да постигне дипломатско решение.

Ова, би било клучно за „постигнување безбедност и стабилност во регионот“.

Пораката ја објави саудиското Министерство за надворешни работи на социјалните медиуми.

Авиокомпаниите го избегнуваат Блискиот Исток

Авиокомпаниите денес продолжија да избегнуваат големи делови од Блискиот Исток по американските напади врз иранските нуклеарни постројки, според веб-страницата за следење летови FlightRadar24, при што сообраќајот веќе го заобиколува воздушниот простор на регионот поради неодамнешните меѓусебни ракетни напади од страна на Израел и Иран.

„По американските напади врз иранските нуклеарни постројки, комерцијалниот сообраќај во регионот функционира според новите ограничувања на воздушниот простор воведени минатата недела“, објави „FlightRadar24“ на својата „X“ платформа.

Нивната веб-страница покажува дека авиокомпаниите не летаат во воздушниот простор над Иран, Ирак, Сирија и Израел. Тие избрале други рути како што се северно над Каспиското Море или југот над Египет и Саудиска Арабија, дури и ако тоа резултира со повисоки трошоци за гориво и екипаж и подолги летови.

Американски конгресмени ја доведоа во прашање законитоста на потегот на Трамп за бомбардирање на Иран

Неколку членови на американскиот Конгрес од двете партии ја доведоа во прашање законитоста на потегот на американскиот претседател Доналд Трамп за започнување воени напади врз Иран.

Додека конгресните лидери на Републиканците и многу членови на Конгресот ја поддржаа одлуката на Трамп да ги бомбардира главните нуклеарни објекти на Иран, најмалку двајца републикански пратеници им се придружија на демократите тврдејќи дека Трамп донел неуставна одлука да го бомбардира Иран без одобрение од Конгресот, објави Ен-Би-Си Њуз.

„Иако одлуката на претседателот Трамп (да ги бомбардира нуклеарните објекти на Иран) може да биде праведна, тешко е да се замисли образложение кое е уставно. Со нетрпение ја очекувам неговата следна изјава“, објави на мрежата Икс пратеникот Ворен Дејвидсон, републиканец од Охајо, кој го поддржува Трамп.

Израел го затвора својот воздушен простор и ги заострува безбедносните мерки по американските напади врз Иран

Воздушниот простор на Израел е затворен до натамошно известување „поради најновиот развој на ситуацијата“, објави изутринава Израелската администрација за воздухопловство по синоќешното бомбардирање на Иран од страна на САД.

„Воздушниот простор на Државата Израел е затворен за влез и излез поради најновите случувања“, се вели во соопштение на властите, во кое се наведува дека копнените премини [со Египет] и Јордан работат нормално.

Израел го затвори својот воздушен простор на 13 јуни по нападот врз Иран, што ја предизвика тековната војна меѓу еврејската држава и Исламската Република. Воздушниот простор беше повторно отворен во петок за летови за враќање на Израелци заглавени во странство. Во меѓувреме, Израел го зголеми нивото на тревога во целата земја.

„Со одобрение на министерот за одбрана Израел Кац и по проценка на ситуацијата, беше одлучено дека од денес (недела) во 15:45 часот (00:45 GMT) сите региони во земјата [ќе преминат] од нивото на „делумна“ или „ограничена“ активност на нивото на „само исклучително неопходна“ активност, што вклучува „забрана за образовни активности, собирања, работни активности, со исклучок на клучните сектори“, се наведува во воено коминике.

Иранската организација за атомска енергија соопшти дека нема да дозволи прекин на нуклеарниот развој на земјата

Организацијата за атомска енергија на Иран денеска соопшти дека нема да дозволи развојот на „националната индустрија“, имајќи го предвид нуклеарниот развој на земјата, да биде запрен, јавија светските агенции.

Таа потврди дека се извршени напади врз нејзините нуклеарни постројки во Фордоу, Исфахан и Натанц, но нагласи дека нејзината работа нема да биде запрена.

„Организацијата за атомска енергија на Иран ја уверува големата иранска нација дека и покрај злонамерните заговори на нејзините непријатели, со напорите на илјадници нејзини револуционерни и мотивирани научници и експерти, нема да дозволи да се запре развојот на оваа национална индустрија, за која нашите нуклеарни маченици ја пролеаја својата крв“, се вели во соопштението на агенцијата, цитирано од Асошиејтед Прес.

Организацијата наведе дека нападите врз нејзините нуклеарни постројки го прекршуваат меѓународното право, без да го образложи обемот на штетата од американските напади, кои претходно ги објави претседателот Доналд Трамп. Таа соопшти дека на својата агенда ги ставила потребните мерки, вклучително и правни постапки, за заштита на правата на Иран и додаде дека очекува меѓународната заедница да го осуди „беззаконието засновано на законот на џунглата“ и да го поддржи Иран во остварувањето на своите легитимни права.

МААЕ: Нема зголемена радиоактивност по нападот на САД врз цели во Иран

Меѓународната агенција за атомска енергија (МААЕ) изутринава соопшти дека нема „зголемување на нивото на радијација надвор од објектите“ по американските воздушни напади врз три ирански нуклеарни објекти, јавија светските агенции, повикувајќи се на соопштение на нуклеарното надзорно тело на ОН објавено на платформата Икс.

„МААЕ може да потврди дека досега не е пријавено зголемување на нивото на зрачење надвор од територијата на објектите. Меѓународната агенција за атомска енергија ќе даде дополнителни проценки за ситуацијата во Иран кога ќе има повеќе информации“, се наведува во соопштението на МААЕ.

Трамп му се закани на Иран со нови напади ако не склучи мир

Американскиот претседател Доналд Трамп му се закани на Иран со нови напади ако Техеран не склучи мир, јави ДПА.

„Или ќе има мир или ќе има трагедија за Иран, многу поголема од она што го видовме во последните осум дена“, рече Трамп во обраќањето до нацијата од Белата куќа, откако претходно објави дека САД нападнале три нуклеарни постројки во Иран.

„Запомнете, останаа уште многу цели“.

Трамп рече дека САД извршиле напади што „целосно и тотално ги уништиле“ клучните постројки за збогатување ураниум. Тој додаде дека Иран „мора да склучи мир сега. Ако не го сторат тоа, идните напади ќе бидат многу поголеми“.

Нешто повеќе од два часа претходно, Трамп објави дека американските авиони нападнале три нуклеарни постројки во Иран - во Натанз, Исфахан и постројката за збогатување ураниум во Фордо.

Израел ја започна кампањата на 13 јуни, нагласувајќи дека имала за цел да го спречи Иран да развива нуклеарно оружје. Техеран постојано негира дека се стреми кон нуклеарно оружје и тврди дека неговата нуклеарна програма е само за цивилни цели.

Иран вели дека го задржува правото да избере каков било одговор на „скандалозните“ американски напади

Иран го задржува правото да избере каков било одговор во одбрана по американските напади врз неговите нуклеарни постројки, напиша утрово иранскиот министер за надворешни работи, Абас Арагчи, на платформата X.

Арагчи рече дека нападите се „скандалозни и ќе имаат последици за вечни времиња“

Нападот врз Иран беше извршен од американските бомбардери Б-2 „скрил“.

По неколкудневно размислување, одлуката на Трамп да се придружи на воената кампања на Израел против Иран го ескалираше конфликтот.

Неколку часа по нападот, Трамп се обрати до нацијата. Според него, утрово бомбардирањето на САД целосно уништи три ирански нуклеарни објекти, Натанц, Есфахан и Фордоу.

„Или ќе има мир или Иран ќе се соочи со трагедија многу поголема од онаа на која бевме сведоци во изминатите осум дена“, рече Трамп во говорот во Белата куќа, нарекувајќи го Иран „насилник на Блискиот Исток“.

„Ако мирот не дојде брзо, ќе нападнеме други цели со прецизност, брзина и вештина“, додаде Трамп.

Извор: Индекс.хр

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.