Сѐ повеќе луѓе ги минуваат празниците сами! Празничните очекувања водат до стрес и традициите се менуваат - Канал 5

Живот

Сѐ повеќе луѓе ги минуваат празниците сами! Празничните очекувања водат до стрес и традициите се менуваат

Иако многумина ја доживуваат празничната сезона како време за поврзување со семејството и пријателите, таа истовремено може да биде и извор на голема анксиозност. 

Сѐ повеќе луѓе ги минуваат празниците сами! Празничните очекувања водат до стрес и традициите се менуваат

Големите семејни собири, обемните подготовки, празничните патувања и купувањето подароци можат драматично да го зголемат нивото на стрес.

Но, сѐ поголем број луѓе почнуваат да се прашуваат дали навистина мора да биде така — и сѐ почесто одлучуваат празниците да ги земат „во свои раце“.

Сѐ повеќе млади луѓе во последните неколку години чувствуваат дека им е преку глава и од самите празници. Без разлика дали станува збор за подготвување храна или за трошење тешко заработени пари на подароци, едно е јасно: декември и јануари за некои луѓе се месеци кои траат предолго.

Во прилог на ова, на Инстаграм-страницата на „Вашингтон пост“ беше објавена илустрација која детално објаснува зошто кај луѓето е намалена празничната еуфорија.

Стрес

Првата и најголема причина поради која луѓето сѐ помалку имаат желба празниците да ги поминуваат во семејни собири е стресот. Во илустрацијата се наведуваат стресот околу авионските летови, економските причини, кавгите и несогласувањата во семејството, како и огромното количество валкани садови по празничната трпеза. Да, сето тоа за современиот човек станало „премногу“, бидејќи го чини сопствениот мир.

Затоа, некои луѓе повеќе не чувствуваат притисок дека мора да ги поминат празниците во друштво, ниту пак имаат потреба од тоа, бидејќи се презаситени од очекувањата што се наметнуваат за тие денови.

Меѓу илустрациите е даден и примерот на медицинската сестра Роуз (25), која работи во породилиште и која одлучила Божиќ да го помине сама во Њујорк.

„Имам кариера во која давам многу од себе — ментално, физички и емоционално. И сфатив дека оваа година ми треба да си дозволам нешто за себе."

Исто така, ако се осврнеме на наративот што го промовира општеството, но и социјалните мрежи, сфаќаме дека на сите ни е даден избор — избор како ќе го поминуваме своето слободно време.

Сѐ повеќе млади од 25 години, но и постари луѓе, одлучуваат да бидат сами, и тоа го сметаат за личен избор. Не како недостаток на избор на „пазарот за запознавање“, туку исклучиво како резултат на сопствени одлуки, кои свесно ги избираат и дури јавно ги изразуваат. Токму тоа им носи внатрешен мир.

Една од илустрациите ја прикажува и Иви — девојка која секоја година патувала со подароци, багаж и „стрес“ до домот на родителите на другиот крај од регионот, сѐ додека не одлучила да остане дома за празниците. Тогаш сфатила дека токму тоа ѝ било најубавото искуство. Со блиските се слушала преку видео повици, а остатокот од денот го поминувала во пижами, со маска на лицето и лакирани нокти.

„Најубавиот Божиќ што сум го имала во моите позрели години е токму оној што го поминав сама. Тоа навистина може да биде оснажувачко искуство.“

Луѓето во коментарите ја поддржаа идејата

По оваа илустрирана објава, луѓето во коментарите го изразија својот став за поминувањето на празниците со семејството, и јасно е дека мнозинството во голема мера се согласува со илустрацијата.

„Ова. Во последно време, кога мајка ми вели: ‘Дојди дома за празниците’, јас си мислам… ‘Па јас веќе сум дома’. Чуден и тежок дел од растењето и преселувањето многу далеку.“

„Мојата омилена соло-божиќна традиција беше посета на елката на Рокфелер Плаза во 22 часот. Немаше никој и беше божествено.“

„Внатрешниот мир е нешто што сите ни треба и го заслужуваме. Животот е стресен и времето поминато сами е неопходно.“

„Празниците и целиот празничен стрес и чувство на вина се во суштина длабоко лажни. Исклучете се од тоа. Живејте го животот што ви останал онака како што вие сметате дека треба. Секогаш запомнете: никому не му е грижа — тоа е вашиот живот, не нивниот. Продолжете понатаму.“

Тагови: млади луѓе празник стрес

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Култура

Смеење до солзи со „Секстет“ на НУ Народен театар Битола на годинешното издание на фестивалот „Денови на комедијата“

На сцената на НУЦК „Трајко Прокопиев“ – Куманово вчеравечер одекна силен и долг аплауз за екипата на НУ Народен театар Битола, која со својата изведба повторно ја воодушеви и ја насмеа до солзи публиката која ја исполни салата до последното столче.

Смеење до солзи со „Секстет“ на НУ Народен театар Битола на годинешното издание на фестивалот „Денови на комедијата“

„Секстет“ и овојпат покажа дека добрата комедија не познава граници – се игра, се чувствува и се споделува со публиката.

„Од срце му благодариме на организаторот на фестивалот „Денови на комедијата“ за поканата, прекрасното добредојде и гостопримството. До следната средба – со уште многу смеа, аплаузи и театарски моменти“, истакнуваат од Битолскиот театар.

Претставата „Секстет“ секогаш го полни гледалиштето до последното место, комедијата од Марк Камолети, во режија на Марјан Георгиевски, па така и овојпат салата беше исполнета со публика која ги награди актерите на Битолскиот театар со долготрајни аплаузи.

Недоразбирања, тајни, љубовни заплети и урнебесни пресврти секогаш ја тераат публиката да се смее од почеток до крај.

Зошто комедија? Затоа што премногу долго сме сериозни.

Живееме во време на прегласни информации и постојани кризи.

Научивме како да бидеме загрижени, заборавивме да се смееме. Во претставата играат: Бернар -Николче Пројчевски, Жаклина-Катерина Аневска Дранговска, Роберт -Александар Димитровски, Сузан-Сандра Грибовска Илиевска, Сузет -Анастасија Чипуровска, Џорџ-Борче Ѓаковски.

Костимографијата е на Андреј Георгиевски, сценографијата на Влатко Чачоровски, музика -Александар Димовски.

29.издание на Фестивалот оваа година се одржува од 23 септември до 5 октомври. Во текот на фестивалските денови, публиката има можност да проследи театарски претстави исполнети со хумор, квалитетна актерска игра и препознатлива фестивалска атмосфера преку изведба на театрите од Македонија и земјите од регионот. Фестивалот ќе биде затворен со претстава надвор од конкуренција, посветена на годинашниот лауреат Игор Џамбазов. Фестивалот е поддржан од Министерството за култура и туризам и од Општина Куманово.

Тагови: Денови на комедијата

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Јанев на Меморијалниот турнир „Загинати бранители 2001–2015“: Македонија ги памети своите херои, нивната жртва е наша трајна обврска

Директорот на Бирото за јавна безбедност Александар Јанев денеска се обрати на Централниот меморијален турнир во мал фудбал во чест на загинатите бранители 2001–2015, кој се одржува во спортскиот центар „Борис Трајковски“. 

Јанев на Меморијалниот турнир „Загинати бранители 2001–2015“: Македонија ги памети своите херои, нивната жртва е наша трајна обврска

На настанот се обрати и министерот за одбрана Владо Мисајловски, кој го отвори Меморијалниот турнир.

Пред членовите на семејствата на загинатите бранители, претставниците на Здружението „Херои на Македонија 2001–2015“, колегите и натпреварувачите, директорот Јанев истакна дека турнирот веќе 24 години ја чува жива меморијата за оние кои ги положија своите животи за Македонија, нејзиниот мир и безбедноста на граѓаните.

„Денес не сме тука само поради традицијата. Тука сме затоа што имаме обврска да паметиме. Да ги паметиме нашите колеги, пријатели, браќа, сопрузи, татковци и синови кои ја носеа униформата со чест и кои, извршувајќи ја својата должност, ја дадоа најголемата жртва што човек може да ја даде. Нивните имиња не се само дел од историјата на нашите безбедносни сили. Тие се дел од историјата на Македонија“, истакна Јанев.

Тој нагласи дека обврска на денешните генерации е споменот за загинатите бранители да се пренесува и на генерациите што доаѓаат, потсетувајќи дека слободата, мирот и безбедноста не треба да се земаат здраво за готово. Посебна почит им оддаде на семејствата на загинатите, нагласувајќи дека институциите имаат обврска да покажат дека жртвата на нивните најблиски никогаш нема да биде заборавена.

Министерот за одбрана Владо Мисајловски истакна дека мора да се чува споменот за оние кои го дале својот живот за татковината и да се пренесе на следните генерации.

„Она што треба да го направиме е да се сплотиме и да покажеме дека хероите не се забораваат. Се заблагодарувам на секој еден припадник на Армијата, сите што ја носат униформата кои секојдневно работат за нашата држава. Министерството за одбрана ќе биде секогаш тука да помогне и достојно да покаже почит кон хероите“, истакна министерот Мисајловски.

На крајот, директорот Јанев изрази благодарност до Здружението „Херои на Македонија 2001–2015“, Министерството за внатрешни работи и сите кои веќе 24 години ја одржуваат оваа традиција, порачувајќи дека хероите живеат сè додека ги паметиме и дека им должиме да ги паметиме со гордост, достоинство и благодарност.

Тагови: Александар Јанев

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ВЛЕН: Брисел позитивно ги оцени реформите, земјата доби 140 милиони евра од Планот за раст

ВЛЕН ја поздравува позитивната оценка на претседателката на Европската комисија, Урсула фон дер Лајен, за напредокот во спроведувањето на Планот за раст.

ВЛЕН: Брисел позитивно ги оцени реформите, земјата доби 140 милиони евра од Планот за раст

За време на посетата во Скопје, таа го оцени постигнатиот напредок како импресивен и најави нови исплати во наредните недели. Северна Македонија досега доби 140 милиони евра од овој план.

Овие средства се резултат на сериозната работа и посветеноста на институциите во исполнувањето на преземените обврски.

Министерството за европски прашања, предводено од првиот вицепремиер Беким Сали, го координира спроведувањето на Реформската агенда и го следи исполнувањето на обврските на институции.

За нас, оваа оценка е дополнителен поттик да продолжиме со работата и навреме да ги исполниме следните обврски.

Ги поздравуваме заложбите на Брисел за деблокирање на европскиот пат на земјата и очекуваме да се надминат пречките за земјата да напредува во преговорите со Европската Унија.

ВЛЕН

Тагови: ВЛЕН

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер