Руте: Мораме да го одбраниме секој сантиметар од територијата на НАТО - Канал 5

Свет

Руте: Мораме да го одбраниме секој сантиметар од територијата на НАТО

Генералниот секретар на НАТО, Марк Руте, денеска во Брисел изјави дека Алијансата ќе го брани секој дел од сојузничката територија и оти треба да го спречи пристапот на Русија и Кина до арктичкиот регион.

Руте: Мораме да го одбраниме секој сантиметар од територијата на НАТО

- Мораме да се погрижиме да го браниме секој сантиметар од територијата на НАТО, рече Руте по пристигнувањето на состанокот на министрите за одбрана на членките на НАТО во седиштето во Брисел.

Руте истакна дека постои долгорочна закана од Русија, но дека не треба да се биде наивен ниту во врска со Кина кога станува збор за Арктикот. Тој додаде дека вчера е покрената мисијата „Арктичка стража“ со цел да се утврдат и пополнат сите празнини што постојат во безбедноста, при што ќе биде многу важно искуството на новите членки, Шведска и Финска.

- Тоа е доказ дека НАТО како целина – САД, Канада и европските сојузници – работат заедно за да осигураме одбрана на секој сантиметар од територијата на НАТО, рече Руте.

Тој нагласи дека НАТО „не е тука само за да ги штити Европа и Канада, туку и САД“, а за САД да бидат безбедни, потребен е силен и безбеден Арктик, безбедна Европа, но и безбеден Атлантик.

- Со „Арктичката стража“ и со преговорите меѓу САД, Данска и Гренланд во исто време, сето тоа е важно за да ги спречиме Русија и Кина да добијат пристап и да го одбраниме целиот регион, рече генералниот секретар на НАТО.

Одговарајќи на новинарско прашање, Руте рече дека новиот фокус на Арктикот нема да го одвлече вниманието од источното крило на НАТО, додавајќи дека НАТО е толку силен што може да го прави и едното и другото, и дека операциите „Источна стража“ и „Балтичка стража“ за одбрана на подводните кабли и инфраструктурата и понатаму се важни.

Руте повтори дека на денешниот состанок ќе се разгледа како се спроведуваат одлуките донесени на самитот на НАТО во Хаг минатата година, а кои се однесуваат на зголемување на трошоците за одбрана, зајакнување на индустриското производство во секторот на одбраната и продолжување на поддршката за Украина.

- Мораме да осигураме дека индустриската база го произведува она што ни е потребно за да можеме да се одбраниме. Канада и Европа веќе ги зголемија трошоците за одбрана за повеќе милијарди евра, рече Руте.

На денешниот состанок, наместо американскиот министер за одбрана Пит Хегсет, ќе учествува неговиот заменик Елбриџ Колби, со што ова е втор министерски состанок на кој Вашингтон не испраќа министри.

Руте, одговарајќи на прашања на новинарите, рече дека САД „вршат притисок врз Русија“, исто како и Европјаните, преку пакетите санкции, дека испорачуваат клучна противвоздушна одбрана за Украина, ги предводат мировните напори и „го прават токму она што ни е потребно“ во однос на Украина.

Денеска ќе се одржи и неформален состанок на Советот НАТО-Украина, на кој ќе учествуваат украинскиот министер за одбрана Михаил Федоров и високата претставничка на ЕУ за надворешна политика и безбедност, Каја Калас.

По завршната конференција на генералниот секретар на НАТО, ќе следи состанок на контакт-групата за одбрана на Украина.

На агендата на денешниот министерски состанок ќе биде и подготовката за следниот самит на НАТО, кој ќе се одржи на 7 и 8 јули во Анкара.

Тагови: Марк Руте НАТО

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Влада донесе одлука: Се намалува ДДВ-то за горивата од 18 проценти на 10 проценти

Согласно пресметките на Владата, со намалувањето на ДДВ од 18% на 10% значително ќе се ублажи очекуваното зголемување на цените на горивата.

Влада донесе одлука: Се намалува ДДВ-то за горивата од 18 проценти на 10 проценти

Владата на денешната седница, донесе Одлука со која ДДВ се намалува од 18% на 10%, со цел директно да се ублажи ценовниот удар врз граѓаните и стопанството во услови на кризна состојба поради можноста за нарушувања во снабдувањето со нафта и нафтени деривати.

Согласно пресметките на Владата, со намалувањето на ДДВ од 18% на 10% значително ќе се ублажи очекуваното зголемување на цените на горивата.

Кај нафтата, наместо редовното очекувано зголемување од околу 5 денари, со оваа мерка се очекува намалување од околу 2 денари. Тоа значи вкупно ублажување на ценовниот удар од околу 7 денари, при што новата цена би изнесувала околу 99 денари за литар.

Кај бензините, согласно пресметките, се очекува зголемување од околу 3,5 денари, што значи дека новата цена би изнесувала околу 100,5 денари за литар за бензинот ЕУРОСУПЕР БС-95, односно 102,5 денари за литар за бензинот ЕУРОСУПЕР БС-98.

Повластената даночна стапка од 10% ќе се применува од 00:01 часот на 15 септември 2026 година до 24:00 часот на 28 септември 2026 година.

Со оваа одлука Владата презема конкретна и навремена мерка за заштита на животниот стандард на граѓаните, намалување на финансискиот товар и поддршка на стопанството во услови на кризна состојба.

Владата продолжува внимателно да ги следи состојбите на пазарот на нафтени деривати и да презема мерки во интерес на граѓаните и економијата.

Тагови: влада

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Шкотска, Велс и Северна Ирска се здружуваат – бараат право на референдуми за независност

Шкотскиот премиер Џон Свини смета дека политичките промени покажуваат дека сегашната состојба не може да трае бесконечно.

Шкотска, Велс и Северна Ирска се здружуваат – бараат право на референдуми за независност

Лидерите на Шкотска, Велс и Северна Ирска во понеделник ќе се сретнат во Кардиф, каде што треба да потпишат заедничка декларација со која ќе го потврдат правото на нивните нации на самоопределување и ќе побараат можност граѓаните на референдуми да одлучуваат за својата иднина.

Според „Телеграф“, ова ќе биде прв заеднички настап на тројца лидери на Шкотска, Велс и Северна Ирска кои отворено се залагаат за промена на сегашниот уставен статус во рамките на Обединетото Кралство.

По состанокот се очекува нивните партии да потпишат и меморандум за соработка во четири области – економијата, енергетиката, европа и меѓународната соработка и самоопределувањето.

Сите три политички опции имаат и европска агенда. Шкотската национална партија и Плајд Камри се залагаат независните Шкотска и Велс во иднина да станат членки на Европската Унија, додека Шин Фејн бара обединување на Северна Ирска со Република Ирска.

Шкотскиот премиер Џон Свини смета дека политичките промени покажуваат дека сегашната состојба не може да трае бесконечно.

Тагови: референдум

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

115 лица евакуирани од патнички брод со кој беше изгубен контактот

Вкупно 115 лица се евакуирани од индонезиски патнички брод со 243 патници и членови на екипажот.

115 лица евакуирани од патнички брод со кој беше изгубен контактот

Вкупно 115 лица се евакуирани од индонезиски патнички брод со 243 патници и членови на екипажот – кој утрово исчезна откако беше изгубен контактот со него во Јаванското Море поради лошите временски услови – при што едно лице загина, а друго е повредено, изјави Дани Рахмат, портпарол на пристанишниот оператор „Пелиндо“.

Претходно, државната агенција за потрага и спасување на индонезија соопшти дека бродот Virgo Transport 8, испловил во саботата од градот Сурабаја во Источна Јава кон Банџармасин во Јужен Калимантан, потоа бил изгубен контактот, што ги поттикнало спасувачите да започнат потрага и да испратат тим на последната позната локација на бродот.

Тагови: брод

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер