Радио Слободна Европа поднесе тужба против Американската агенција за глобални медиуми (USAGM), специјалниот советник на агенцијата Кери Лејк и привремениот извршен директор Виктор Моралес за да го спречи прекинот на нејзиниот федерален грант, се вели во соопштението на медиумот.
Во тужбата, поднесена во Окружниот суд на САД за округот Колумбија, се тврди дека намалувањето на финансирањето на Радио Слободна Европа/Радио Слобода (РСЕ/РЛ), го прекршува федералниот закон и Уставот на САД, кој му дава на Конгресот контрола врз федералните трошоци.
Во поднесокот се вели дека УСАГМ одби да ги плати средствата „со образложение дека ги прекинува своите незаконски функции, без да наведе дека финансирањето на работата на радиодифузерите е легитимна функција на агенцијата“, пишува Форбс.
Во тужбата, РСЕ тврди дека Конгресот доделил средства за активностите на медиумот „како признание за клучната улога што РСЕ ја игра во обезбедувањето точни, нецензурирани вести во земјите каде што слободниот печат е под закана“.
„Ова не е време да се препуштиме на пропагандата и цензурата на американските противници. Сметаме дека законот е на наша страна и дека славењето на нашата смрт од страна на деспотите ширум светот е прерано“, нагласи претседателот и генерален директор на РСЕ, Стивен Капус.
Набргу откако американскиот Конгрес го усвои нацрт-законот за финансирање минатата недела, администрацијата на американскиот претседател Доналд Трамп го прекина финансирањето на неколку глобални медиумски агенции надгледувани од USAGM, вклучително и Радио Слободна Европа, Радио Азија, Блискоисточната радиодифузна мрежа и Радио Марти (кое се емитува на Куба). Речиси сите 1.300 вработени на Гласот на Америка (VOA) се пратени на принуден одмор, според наредбата на Белата куќа која повикува на продолжување на „намалување на федералната бирократија“. /МИА