Балкан

Роднините на загинатите во пожарите кај Атина: По 7 години не го знаеме точниот број на жртвите

Колку точно загинаа во пожарот во источниот дел на областа Атика, на 23 јули 2018 година?, е прашањето што го поставуваат од Здружението на роднините на загинатите и повредените во пожарот .

Колку точно загинаа во пожарот во источниот дел на областа Атика, на 23 јули 2018 година?, е прашањето што го поставуваат од Здружението на роднините на загинатите и повредените во пожарот и парлалелно посочуваат дека според документите и информациите што ги имаат „станува збор за уште најмалку 14 до 18 мртви, чии делови од тела и биолошки материјали се пронајдени, но не се идентификувани“, јави дописничката на МИА од Атина.

Речиси седум години по трагичниот пожар во кој официјално 104 лица ги загубија животите, а 57 се здобија со изгореници, членовите на Управниот одбор на здружението денеска одржаа прес-конференција на која информираа и за судскиот процес што е во тек на втор степен, но и за пожарот, условите, околностите, како и за пропустите на надлежните, а паралелно истакнаа дека бараат правда.

-Повеќето од нас бевме заедно во пожарот, ги видовме нашите луѓе кои гореа или се давеа, ги слушавме нивните крици, кои се мешаа со нашите додека и самите горевме и се губевме, додека нашите напори да си помогнеме не беа доволни, рече претседателката на здружението Кали Анагносту, нагласувајќи дека биле оставени да изгорат и да умрат без никаква помош.

Софиа Хамилотори од Здружението посочи дека една од нивните главни цели согласно статутот е „целосно откривање на вистината за што точно се случи на 23 јули 2018 година“ истакна дека едно од најголемите прашања е колку се мртви и објасни дека имаат информации за масовна гробница, откако, од надлежната општина, по поднесено барање, добиле допис со одлука на заменикот-градоначалник со кое „е одлучено да се издаде дозвола за погреб на делови од човечки тела и биолошки материјал, како последица од пожарот“.

-Судскиот процес се води во една многу конкретна рамка, на пример се суди за 102 загинати, а не за 104 колку што се идентификувани и како што информиравме денеска постојат најмалку 14-18 неидентификувани делови од човечко тело, кои никогаш не беа идентификувани и се надеваме судот да ја види големата слика, да ја види реалната одговорност и оперативна и политичка, рече Хамилотори, истакнувајќи дека „кусо пред пресудата сè уште не е излезена на виделина целата вистина“.

Судењето е во тек на втор степен по поднесената жалба од обвинителот за првостепената пресуда на судот, процесот започна во јули минатата година, а минатиот месец обвинителката пред тричлениот Апелационен суд за прекршоци ги соопшти предлозите, односно 12 лицаод 21 обвинет, меѓу кои и припадници на противпожарната служба, тогашната регинална управничка на периферијата Атика, тогашниот генерален секретар за цивилна заштита, како и тогашниот градоначалник на надлежната општина да бидат прогласени за виновни.

Во првостепената пресуда од лани, 15 обвинети беа ослободени, а шестмина добија петгодишна затворска казна што можеа да ја откупат за околу 40.000 евра.

Тогаш осудени беа поранешниот началник на противпожарната служба, неговиот заменик, како и други функционери од службата кои биле на клучни позиции, а меѓу оние кои беа ослободени беа тогашниот генерален секретар за цивилна заштита, префектот на периферијата Атика, како и градоначалниците на општините зафатени од пожарот.

Во пожарот кај Мати во јули 2018 година, што е еден од најкатастрофалните во современата грчка историја, но и вториот пожар во светот во 21 век со најголем број жртви, загинаа 104 лица, 57 се здобија со сериозни изгореници. /МИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ЕкоСкопје – нова дигитална платформа создадена од млади за пријавување еколошки проблеми во Скопје

Од денеска, граѓаните во Скопје имаат на располагање нова дигитална алатка за пријавување еколошки проблеми.

Официјално е лансирана ЕкоСкопје, паметна еко-платформа создадена од млади, која овозможува едноставно пријавување проблеми во градот и придонесува кон подобра комуникација меѓу граѓаните и надлежните градски служби.

Платформата е достапна за користење на: ekoskopje.skopje.gov.mk

Преку ЕкоСкопје, граѓаните можат да пријават еколошки проблем со приложување фотографија и локација. Пријавите се евидентираат во системот, по што следува нивно разгледување, проследување до соодветните градски служби и ажурирање на статусот. На овој начин, платформата создава можност за поедноставна и поорганизирана комуникација за еколошките проблеми во Скопје.

ЕкоСкопје е резултат на младинска идеја која прерасна во функционална дигитална алатка и потребата на градот за директна комуникација со граѓаните.

Официјалната промоција на ЕкоСкопје се одржа денеска во Europe House Скопје, во организација на Здружението Лидери за едукација, активизам и развој (ЛЕАД), во соработка со Град Скопје.

На настанот се обратија Орце Ѓорѓиевски, градоначалник на Град Скопје, Ewout Sandker, претставник на Европската комисија, и Иван Јованов, Извршен директор на ЛЕАД, кои го истакнаа значењето на младинското учество, дигиталните иновации и соработката меѓу институциите и граѓанскиот сектор во создавањето решенија за подобар град.

„И јас живеам во градот, пешачам и ги гледам истите проблеми, го дишам истиот воздух и знам колку може да биде фрустрирачки. Честитки до тимот и организацијата за оваа платформа која овозможува граѓаните и младите да бидат слушнати а градските служби ефективно да реагираат. Но можеме да ги имаме и најдобрите закони и најновата технологија, ама ако не го смениме нашето однесување и начинот на кој ги третираме улиците, парковите и околината тогаш напредокот останува лимитиран. Денешниот ден не е крајот на приказната, туку е само почетокот.“ изјави Еваут Сандкер, претставник на Европската комисија.

Градоначалникот Орце Ѓорѓиевски ги охрабрува сите граѓани и млади: „На Скопје му се потребни идеи кои стануваат дела и соработка што носи видливи промени. Денес промовираме токму таков пример, платформа создадена од младинската енергија. Трудот на младите заслужува признание и практична поддршка а наша обврска е да создадеме простор нивните предлози да добијат примена. Ги повикувам граѓаните да ја користат платформата, а младите ги охрабрувам да продолжат да создаваат.“

Во рамки на настанот, Андреј Божиновски, член на победничкиот тим , ja претстави веб-платформата.

ЕкоСкопје е развиена во рамки на проектот SkopYEAH!, кој го реализира ЛЕАД во соработка со Град Скопје, со финансиска поддршка од Европската Унија.

Свет

Напнато на границата помеѓу Јужна и Северна Кореја: Војската чека сигнал за дејствување

Јужна Кореја денеска соопшти дека ќе преземе одлучни мерки доколку Северна Кореја изврши какви било дополнителни провокации.

Реакцијата на Сеул доаѓа по заканите од Пјонгјанг за воена ескалација, предизвикани од предупредувачките истрели на јужнокорејските сили долж утврдената граница, пренесува новинската агенција „Јонхап“.

Ким Јо Џонг, влијателната сестра на севернокорејскиот лидер Ким Џонг Ун, се закани со повторно започнување на пропагандни емисии насочени кон Сеул и со распоредување дополнителни офанзивни тактички средства долж Демилитаризираната зона (ДМЗ) што ги раздвојува двете Кореи, истакнувајќи дека ситуацијата на границата станала крајно нестабилна.

„Министерството за национална одбрана изразува сериозна загриженост во врска со критиките на Ким Јо Џонг упатени кон легитимните операции на нашата војска – спроведени во согласност со Договорот за примирје – како и во врска со ескалацијата на тензиите преку воени закани“, се вели во соопштението, во кое се додава дека Јужна Кореја ќе одговори одлучно доколку Северна Кореја продолжи со своите провокации.

Напнатоста се зголеми по 21 септември, кога во Демилитаризираната зона (ДМЗ) експлодираа нагазни мини, при што беа повредени тројца јужнокорејски војници.

Сеул и Командата на Обединетите нации утврдија дека инцидентот бил предизвикан од противпешадиски мини поставени од Северна Кореја, што претставува кршење на Договорот за примирје. Сепак, Пјонгјанг категорично ја негираше каквата било вмешаност во експлозиите.

Извор: Б92

Тагови: Јужна Кореја Северна Кореја

Фудбал

На улиците во Париз се„војува“, но натпреварот од Лигата на шампионите ПСЖ-Барселона ќе се одигра

Претстојниот дуел на гигантите меѓу брнителот на титулата Пари Сен Жермен и шпанскиот првак Барселона во Лигата на шампионите нема да биде одложен ниту откажан.

Претстојниот дуел на гигантите меѓу брнителот на титулата Пари Сен Жермен и шпанскиот првак Барселона во Лигата на шампионите нема да биде одложен ниту откажан, и покрај насилните протести што ја потресуваат Франција – потврди францускиот министер за одбрана, Себастијан Лекорни.

Лекорни во синоќа изјави дека побарал од регионалните власти да воведат делумни полициски часови во некои градови, со цел да се заштитат граѓаните и бизнисите по немирите што се случија за време на викендот.

Touchdown in Paris. 🇫🇷 https://t.co/oKL7evXSdR
— FC Barcelona (@FCBarcelona) October 19, 2026

„Решен сум да воспоставам ред“, рече францускиот премиер, додавајќи дека, доколку е потребно, би можела да се воведе вонредна состојба. Сепак, тој оцени дека локалните и делумни забрани за движење во моментов претставуваат посоодветно решение.

Францускиот министер за внатрешни работи, Лоран Нуњез, потврди дека не постојат планови за откажување на натпреварот.

ПСЖ во вторник навечер ќе ја пречека Барселона на стадионот „Парк на принцовите“, а почетокот на натпреварот е закажан за 21:00 часот по средноевропско време.

Сепак, немирите ги погодија и француските фудбалски клубови.

Марсеј пријави значителна штета на својата официјална продавница на познатата авенија „Ла Канебиер“, додека Лил соопшти дека нивната продавница во центарот на градот претрпела големи оштетувања и била ограбена. Двете продавници се привремено затворени.