Роднина на Цар Борис од Бугарија дал согласност да се регистрира здружението во Охрид

Роднина на Цар Борис од Бугарија дал согласност да се регистрира здружението во Охрид чие име изминатите два дена предизвика бура од реакции во јавноста, но и осуди од Еврејската заедница која посочи дека е згрозена и навредена...

Родинина на бугарскиот Цар Борис Трети дал согласност под негово име да се основа здружението во Охрид. Ова може да се протолкува од одговорт кој на барање на Канал 5 го достави Централниот регистар. Откако Министерството за правда соопшти дека здружението за афирмација на културните вредности на македонските бугари Цар Борис III Охрид не доставило барање за добивање на позитивно мислење во постапката за регистрација, од Централниот регистар велат дека здружението е впишано лани во ноември во согласност со Законот за здруженија и фондации.

„Согласност од Министерство за правда не е доставено како прилог кон пријавата за упис, од причина што подносителот на истата доставил прилог доказ согласно член 49 став 2 од Законот за трговски друштва , а во врска со 8 од Законот за здруженија и фондации, имено доставил согласност од сродник за внесување на името Цар Борис III во името на Здружението

Оттаму објасуваат дека за прашањата поврзани со името на здружението се применуваат одредбите од Законот за трговски друштва според кои може да се внесе име и презиме на историска и друга позната личност само со согласност на личноста, или, ако е почината, со согласност на нејзините сродници до трет степен во права линија, а доколку такви не постојат, согласност дава Министерството за правда.

Иако наведуваат дека основачот на здружението доставил доказ за согласност од сродник за внесување на името Цар Борис Трети, кој е доказот и кој гарантира за неговата законитост, подетални информации нема. Случајот повторно отвори оправдани дилеми дека секој може да регистрира здружение со име на личности кои длабоко задираат во чувствата поврзани со историјата. Од Министерството за правда најавија дека ваквата пракса ќе заврши по измените на Законот за здруженија и фондации на кои во моментот е ангажирана работна група.

Од Еврејската заедница вчера реагираа на како што велат „леснотијата со која во нашата држава се глорифицираат нацизмот, фашизмот и се шири говор на омраза“, а од здружението пак преку соопштение тврдеа дека не биле неонацисти и туку дека имале соработка со антисемитски движења.

„Никаде во светот не го пишува и не е осуден Цар Борис III за фашист или нацист. Тој бил еден родољуб кој се нашол во погрешно време.....наведоа во нивниот одговор.

Цар Борис Трети ја предводел Бугарија за време на Втората светска војна како сојузник на Нацистичка Германија. Честопати бил во официјални посети на Берлин каде се среќавал со Адолф Хитлер за што се уште постојат и видео докази, а за време на неговото владеење биле депортирани македонските евреи во Треблинка.

Тупанчески: Ад хок телото за имиња на историски личности наскоро ќе почне со работа

Ад хок телото за имиња на историски личности наскоро ќе почне со работа, како држава мора да бидеме подготвени за идни потенцијални провокации.

Советодавното тело за употреба на имиња на историски личности на здруженија ќе почне со работа наскоро, ние како држава мора да бидеме подготвени за идни потенцијални провокации, изјави министерот за правда Никола Тупанчески одговарајќи на новинарски прашања по завршувањето на првиот академски час на Правниот факултет.

,, Комисијата е формирана и на последната седница, разговаравме околу некои технички аспекти. Тоа не е комисија во рамки на Министерството за правда, туку тоа е владина комисија. Јас верувам дека за кратко време ќе биде одржана конститутивната седница бидејќи имињата се познати. Таа комисија би требало да почне со работа, односно да биде на ниво на задачата која е поставена пред нив. Доколку сакаме да направиме некакви ретроакции, моето мислење и како професор и како министер за правда е дека тоа треба да го направиме преку други институции. Кога станува збор за оваа хиперсензибилна сфера тогаш постојат и други институции каде што на некој начин би требало да се санкционира евентуалниот говор на омраза, негативните чувства. Сето тоа е содржано во Кривичниот законик”, рече Тупанчески.

Ова ад хок тело, според министерот е формирано со цел да се бајпасира вакумот кој би настанал до донесувањето на новиот закон за здруженија и фондации кој е во фаза на подготовка.

Стопанска комора: Владата до среда да донесе мерки за ублажување на ценовниот удар

Владата најдоцна до 5 октомври 2022 година, за кога е закажана седницата на Економскиот совет, да донесе мерки кои ќе го ублажат силниот ценовен удар, апелира Стопанската комора.

Според Комората, бизнисот има една алтернатива – или државата ќе помогне или ќе се затворат капацитетите.

-Ова е критичен момент. Брзината на реакцијата е пресуден фактор за зачувување на макроекономската и на буџетската стабилност на државата. Ситуацијата во која се наоѓа стопанството е сериозна со оглед на високите сметки за електрична енергија, зголемени до шест пати, за што ниту една компанија не е виновна. Повеќе од 1 600 правни субјекти кои се наоѓаат на слободниот пазар на 30.9.2022 година беа анкетирани и рекоа дека се наоѓаат во исклучително тешка состојба. Почнат е процесот на намалување на вработените, редуцирање на производството и на затворање на капацитетите. Ескалацијата ќе биде во наредните два месеца кога се склучуваат договорите за снабдување со струја за наредната година, наведува Комората во денешното соопштение и додава дека нема регистрирано ниту една земја во регионот и пошироко која не им помогнала на своите компании.

Стопанската комора оценува дека фирмите, оставени сами на себе да се снаоѓаат како знаат и умеат, излез бараат во враќањето на регулираниот пазар.

-Комората регистрира случаи на правно преструктуирање (делење на фирмите за да се исполнат условите за влегување на регулираниот пазар), што може да доведе до сериозни последици за сиот енергетски систем, исто како и за отпуштените работници, кои, иако дома имаат субвенционирана цена на струјата, нема да можат да ја платат, наведува Комората.

Воедно укажува и дека без државна поддршка 10-те најголеми потрошувачи на електрична енергија, кои имаат 6.000 вработени, приход од една милијарда евра, наредната година, според овие цени, би требало да платат половина милијарда евра, со што ќе се наруши нивната конкурентност и ќе се удри врз темелите на македонската економија.

За другите компании на слободниот пазар Комората сугерира, врз основа на сите компаративни анализи, да добијат определена базна цена над која државата би ги покривала трошоците и со тоа би се создале неопходните претпоставки за некаква предвидливост, која е основа на бизнисот.

-Барањата се оправдани и економски издржани за да се зачува ценовната конкурентност на македонските производи, во услови кога за мегават час Србија има цена од околу 100 евра, Босна и Херцеговина – 65 евра, Косово – 70 евра, Бугарија има поставена лимит-цена од 128 евра, износ над кој трошокот го покрива државата, Романија има цена од околу 180 евра, а Грција прогнозира максимално ниво на цена од 220 евра за мегават час, со субвенционирање на другиот дел од реалната вредност на цената на струјата. Исто така, ова апсолутно не е момент за каков било дополнителен фискален товар за бизнис-секторот во однос на државата, без оглед на тоа дали станува збор за промена на постојните даноци, воведување нови даноци или за укинување на даночни ослободувања,…, нагласува Комората.

Комората ги цени напорите на сите субјекти во државава кои се трудат да му помогнат на бизнисот, но, исто така е свесна, како што пишува, и за состојбите на глобално и на регионално ниво.

-Затоа цениме дека е потребно да ги известиме сите меѓународни коморски институции во кои членуваме и да побараме помош од нив. Не исклучуваме и други мерки кои ќе бидат преземени во однос на потребите, истакнува Стопанската комора.

Во Кавадарци се одбележува детската недела

Дечињата му ги презентираа на градоначалникот детските права и обврски, преку интерактивни рачно изработени пораки и се запознаа со кабинетот и работата на градоначалникот и локалната самоуправа.

По повод детската недела, под мотото „Другарството е дел од детската среќа“, денеска во просториите на општина Кавадарци, на средба со градоначалникот Митко Јанчев, беа дечињата од ЈОУДГ „Рада Поцева“, објект „Снежана“, придружувани од дел од воспитно – згрижувачкиот кадар.

-Дечињата му ги презентираа на градоначалникот детските права и обврски, преку интерактивни рачно изработени пораки и се запознаа со кабинетот и работата на градоначалникот и локалната самоуправа. Во рамките на оваа недела, секој ден ќе има активности проследени со музика, хуманитарна акција, музичка точка на градскиот плоштад и спортски ден, информираа од кабинетот на Јанчев.

Нашите најмали, се нашите најмили!

По повод детската недела, под мотото ,,Другарството е дел од детската среќа’’ денеска во просториите на Општина Кавадарци на средба со градоначалникот Митко Јанчев, беа дечињата од ЈОУДГ Рада Поцева, објект ,,Снежана’’ придружувани од дел од воспитно - згрижувачкиот кадар.

Дечињата му ги презентираа на градоначалникот детските права и обврски, преку интерактивни рачно изработени пораки, и се запознаа со кабинетот и работата на градоначалникот и локалната самоуправа.

Во рамките на оваа недела секој ден ќе има активности проследени со музика, хуманитарна акција, музичка точка на Градски плоштад, и спортски ден, напиша градоначалникот на Кавадарци Митко јанчев на својот профил на фејсбук.

притисни ентер