На пазарот доаѓа навистина посебен AMG GT 63 S E Performance. Тоа е автомобил кој е посебен поради погонот и перформансите, а специфичен пример поради својата боја. Направен е во соработка со познатиот тенисер Роџер Федерер, кој нема да го вози споменатиот Мерцедес, туку ќе го промовира со цел да постигне што повисока цена.
Врската помеѓу болидот на АМГ и освојувачот на 20 Грен слем титули е, погодувате, специфична нијанса на жолта боја. Наречен Electric Beam, по боја е идентичен со тениското топче. Не е познато дали некого ќе го привлече оваа многу забележлива боја, но сосема е сигурно дека изведбите звучат неодоливо.
Овој хибрид го комбинира прославениот 4.0 twinturbo V8 со електричен мотор, што значи дека возачот има на располагање моќ од 843 КС и 1400 Nm. Во јазикот на бројките, оваа лимузина до 100 km/h достигнува за 2,9 секунди и не застанува до 316 km/h. Да напоменеме и дека ова е првиот plug-in хибрид на AMG – троши во просек 8,6 l/100 km и може да помине 12 km на струја.
Понуден е од аукциската куќа РМ Сотби, а се очекува да достигне цена меѓу 200 и 250 илјади евра.