Денес има 81 година.

Благодарејќи на убавината и атрактивноста Брижит Бардо, Французинките често ја опишуваат како најсексапилната жена на светот. Поседуваше ретка и единствена убавина и беше навистина привлечна, како поради изгледот, така и поради својот разуздан слободен дух.

Нејзиното однесување понекогаш се сметало за контроверзно и необично, посебно во тоа време, но Брижит живеела како што сакала, се облекувала како што сакала и во таа смисла нејзината слобода била многу провокативна.

„Јас сум всушност мачка трансформирана во жена....Јас предам. Јас гребам. И понекогаш гризам“ – изјави во една прилика Бардо.

Брижит Бардо е родена 28 септември 1934 година во Париз. Пораснала во конзервативно француско семејство од средната класа, каде во нејзиното воспитување биле вткаени начелата на католичката вера. Мајка и ја поттикнала да се занимава со балет и музика, па младата Брижит била на пат да изгради кариера како балерина.

Судбината сепак имала друг план и појавувањето во една од ревиите на пријателите на нејзината мајка довело до ангажман во магазинот „Жардин де моде“, а наредната година се појавила на насловната страница на познатиот магазин „Ел“.

Убавината на младата Французинка го маѓепсала младиот режисер Роже Вадим, кој ќе и го понуди нејзиниот прв филмски ангажман и главната улога во филмот „Les lauriers sont coupes”. Филмот никогаш не е снимен, но токму ова познанство ја навело Брижит да размисли за кариера на филмското платно.

Скромниот почеток на русокосата убавица е одбележан со појавувањето во филмот „Нормандиска дупка“ од 1952 година и со споредни улоги во дури 17 филмови следната година.

Меѓутоа, атрактивниот изглед многу влијаел за добивањето на улогите во филмовите „Елена Тројанска“ од 1956, „Идната ѕвезда“ и “Доктор на морето“ во 1955 година и го привлекоа вниманието на Холивуд, па некои од нејзините филмови беа и синхронизирани за американскиот пазар.

Улогата на Жулиет во филмот „И Бог ја створи жената“, каде Брижит толку улога на девојка со разуздана сексуалност и слободен дух и носат светска слава и статус на секс-симбол. Филмот бил контроверзен и донел во Америка еден нов вид на филмска еротика која ги шокирала но и фасцинирала гледачите.

„Таа девојка е родена да ги доведува мажите до лудило“ – изјави Карадин за Брижит во филмот „И Бог ја створи жената“.

Следуваат и други успеси во улогите во филмовите како “Парижанка“ од 1957 година, “Друмски разбојници“ 1958 година, “Бабет оди во војна“, 1959 година, “Приватен живот“ 1962 година, како и култниот филм на Годар „Презир“ од 1963 година.

Токму заводливата Французинка била инспирација за холивудската комедија „Драга Брижит“ од 1965 година во која и самата Брижит се појавува во една сцена.

„Неморална од глава до пети“ – се зборовите со кои Рејмонд Картие ја опишал Брижит Бардо во својот текст од 1958 година.

Љубовта спрема музиката Брижит ја покажала повеќе пати, но најпозната е нејзината соработка со Серж Генсбур.

Нејзиниот нежен глас дојде до израз во култната песна „Те сакам ...и јас тебе“ која произлегла од нејзините љубовни врски и се смета за скандалозна бидејќи ја слави физичката љубов. Иако е снимена во 1967 година, објавена е дури во 1986 година на молба на самата Брижит.

Брижит Бардо била симбол на сексуалната слобода во конзервативната Франција, но и во остатокот од светот. Наречена е најлиберална жена во послевоената Франција.

„Подобро е да се биде неверен отколку верен, а да не сакаш тоа да бидеш“ – изјави во една прилика Бардо.

Бројните скандали на приватен план само ја потпалуваа фантазијата на новинарите и јавноста, како и менувањето на мажите и љубовниците во нејзиниот живот.

Холивуд бил посебно фасциниран од “грешната Французинка“ и често ја викале за улоги во филмови и гостувања во емисии.

Во време кога сите мажи ја посакувале, а жените се угледувале на неа, Брижит биле изразито несреќна и не можела да ја пронајде среќата додека била во центарот на вниманието. Папараците ја прогонувале, обожавателите ја застанувале на секој чекор, а нејзините пријатели често го користеле нејзиниот статус и богатство. За нејзината лична борба сведочат и неколкуте обиди за самоубиство, како и бројните изјави за тоа како славата влијаела на нејзиниот живот.

„Бев многу среќна, многу богата, многу убава, многу обожавана, многу позната и многу несреќна“.

Малку пред својот четириесетти роденден во 1973 година, Брижит објавува повлекување од јавниот живот со повеќе од 40 снимени филмови. После гламурозниот живот Брижит се посветува на заштитата на животните и во 1989 година ја основа фондација за заштита на животните.

„Ја дадов целата своја младост и убавина на мажите. Својата мудрост и искуство ќе им го дадам на животните“ – изјави своевремено Бардо.


Брижит денеска живее во Сан Тропе, на југот на Франција, мирно и повлечено.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.