Ракомет

РФМ одговори на обвинувањата од Чешката федерација

Ракометната Федерација на Македонија се произнесе со свој став по повод реакцијата на Ракометната федерација на Чешка, по реваншот во квалификациите за Светското првенство одигран во Скопје на 15 јуни.

Македонија го доби тој натпревар со 34:27 и се пласира на Мундијалот во Франција 2017 година.

Следува целосното обраќање до Европската ракометна федерација (ЕХФ) од страна на Филип Милошевски генерален секретар на РФМ.

Почитувани ракометни пријатели,

Во име на Ракометната Федерација на Македонија, би сакал да изразам длабоко незадоволство поради реакцијата на Чешката национална репрезентација во врска со натпреварот од Квалификациите за СП помеѓу Македонија и Чешка што се одигра во Скопје на 15 јуни 2016 година.

Имено, во медиумите кои ја цитираат реакцијата на Ракометната Федерација на Чешка а која се однесува на судењето на гореспоменатиот натпревар, се забележува едностраност во анализирањето во однос на анализата на експертскиот тим на Ракометната Федерација на Македонија.

Имено, протестирањето за досудените 2-минути исклучување од страна на Чешка додека нашиот играч, Наумче Мојсовски крвари од својата уста и додека докторскиот тим со шиење се обидува да ја залечи раната, е најблаго кажано апсурдно.

Ќе ја искористам можноста да го издвојам и крвавиот нос на нашиот играч Филип Миркуловски и фрактурата на зглобот на Стојанче Стоилов, кои се меѓу неколкуте очигледни ситуации за црвен картон. Сметам дека во ситуации од натпреварот, судиите беа и преблаги кон агресивниот и насилен стил на игра на чешкиот состав.

Исто така би сакал да се осврнам и кон апсурдните поплаки на Чешката Федерација упатени кон публиката во арената, споменати во реакцијата.

ВИП Арена „Борис Трајковски“ е изградена согласно највисоките меѓународни стандарди за овој тип на настани. Имено, 110 лица од приватна компанија за обезбедување беа ангажирани од РФМ и дополнителен голем број на униформирани полицајци беа присутни во Арената за време на натпреварот, задолжени за безбедноста на околу 5.000 гледачи. Ракометот е најпопуларниот спорт во нашата земја и да, навивачите беа гласни и синхронизирани бодрејќи го нашиот тим. Како Федерација, обезбедивме поддршка и за тимот на Чешка, поканувајќи ги вработените во Амбасадата на Чешка во Скопје и воените лица од Генералштабот на Чешка, кои го следеа мечот во ВИП зоната, заедно со гостите на Ракометната Федерација на Македонија.

За жал, не можам да кажам дека на истиот овој начин бевме третирани во Злин. Училишната арена во Злин едвај имаше и најосновно обезбедување, а домашните навивачи ги надминуваа границите на нормалното однесување. Времето на почеток на натпреварот (Сабота, 12:30 часот), според мене лично, е контрадикторно со сите напори на Чешката Федерација да го промовира ракометниот спорт.

Имајќи предвид дека нашата репрезентација ќе одигра уште еден меч на гостински терен во Чешка во рамки на Квалификациите за Европското Првенство 2018 година, очекуваме поадекватен тајминг и во секоја смисла поадекватна арена, со соодветна инфраструктура за натпревар од вакво значење.

Почитувани господа, Ракометната Федерација на Македонија инвестира многу ресурси и напори во овој спорт, кој несомнено го држи приматот за најпопуларен и најуспешен спорт во Македонија. Сите овие напори и инвестиции, како временски така и финансиски, се базирани на почитување: почитување на нашите играчи, противници, официјални лица, колеги, медиуми, фанови и пред се, почитување на судиите. Тоа е така затоа што сите ние сме тука со иста мисија и за иста цел, и покрај тоа што на теренот сме на спротивставени страни. Поздравувањето и подадената рака по завршувањето на натпреварот постои со причина: не потсетува на смислата на фер-плејот. На смислата на ракометот.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Муцунски: Јас би се извинил, до овој момент немам одговор од бугарската страна

„Јас би се извинил, до овој момент немам одговор од бугарската страна по објавувањето во јавноста на дипломатска нота за престој на семејството на премиерот Мицкоски и неговото семејство во Бугарија“.

Ова утринава го изјави министерот за надворешни работи и надворешна трговија Тимчо Муцунски.

Тој потенцираше дека се објавени лични податоци на семејството на премиерот. Вчера Мицкоски рече дека со објавувањето на податоците се загрозила безбедноста на неговото семејство, а откри и дека ги информирал и партнерите во НАТО.

Рецепти

„Гответе со Дракче“ - Бурек од оризова хартија

Во среда (17.06.2026) во емисијата гостин ни бeше Јелена Спенџарска.

Состојки за денешниот рецепт:

1 јајце

100 гр. урда

100 гр. спанаќ

3 оризови хартии

Моча десерт

150 гр. грчки јогурт

1 протеински пудинг

150 гр. јагоди

1 оризова хартија

Погледнете како се подготвува овој рецепт:

Македонија

Перински: Ранковце добива нови развојни можности преку европските фондови и владината поддршка

Министерот за локална самоуправа, Златко Перински, денеска оствари работна посета на Општина Ранковце, каде што се сретна со градоначалникот Даниел Павловски, членовите на Советот и општинската администрација.

На средбата се разговараше за актуелните предизвици со кои се соочува Општина Ранковце и можностите за нивно надминување преку поддршката што ја обезбедува Министерството за локална самоуправа.

Посебно внимание беше посветено на можностите што ги нуди Ресурсниот центар за поддршка на општините, преку кој Министерството обезбедува стручна, техничка и советодавна помош за јакнење на административните капацитети, подготовка на плански документи, подобрување на финансиското управување и унапредување на локалните услуги. На состанокот беше истакнато дека Ресурсниот центар претставува важен механизам за поддршка на општините во процесот на поефикасно извршување на нивните надлежности и реализација на развојните проекти.

Во рамки на посетата, се изврши увид и во реализацијата на проектот „Одржлив туризам во искуствена економија“, кој се спроведува во рамки на Интеррег VI-А ИПА Програмата за прекугранична соработка со Република Бугарија.

Проектот има за цел да придонесе кон економскиот развој на прекуграничниот регион преку создавање услови за развој на четирисезонски туризам и одржливо користење на културните и природните ресурси. Вкупната вредност на проектот изнесува 809.303 евра, додека вредноста на активностите што ги реализираат македонските партнери е 522.806 евра. Министерството за локална самоуправа обезбедува национално кофинансирање во висина од 78.420 евра за македонските партнери.

„Посетата на Општина Ранковце, покрај тоа што ја искористив за средба со градоначалникот, советниците и администрацијата, е и можност непосредно да го видиме напредокот на проектите кои се имплементираат во рамки на општината. Проектот „Одржлив туризам во искуствена економија“ претставува пример како европските средства можат да се искористат за валоризација на локалните потенцијали. Со адаптацијата на објектите во селата Петралица и Отошница се создаваат нови содржини кои ќе придонесат за зачувување на традицијата, развој на туризмот и отворање можности за локален економски развој“, изјави Перински.

Тој истакна дека Министерството останува партнер на општините во процесот на користење на европските фондови и потсети дека за овој проект е обезбедено национално кофинансирање од 15 проценти за македонските партнери – Општина Кратово и Општина Ранковце.

Министерот информираше и дека Општина Ранковце започнува со имплементација на нов проект во рамки на ИПА III Програмата за прекугранична соработка со Република Косово, насловен „Активни граѓани за прекуграничен регион без поплави“, чија цел е подобрување на протокот на водите во реките и намалување на ризикот од поплави преку реконструкција на речни корита и инсталирање системи за рано предупредување.

Во рамки на посетата беше истакнато и дека преку Програмата за рамномерен регионален развој за 2026 година се реализира проектот за изградба на локален пат во село Опила, во вредност од над 6 милиони денари, со што дополнително се подобрува патната инфраструктура во општината.

Дополнително, преку двата јавни повика на Владата, во Општина Ранковце се имплементираат вкупно пет инфраструктурни проекти од областа на транспортот во вредност од над 38 милиони денари.

Градоначалникот на Општина Ранковце, Даниел Павловски, истакна дека посетата на министерот претставува значајна поддршка за општината и нејзините развојни заложби.

„За Општина Ранковце претставува особена чест што денес сме домаќини на министерот за локална самоуправа. Неговата посета е потврда дека државата ги препознава потребите на помалите општини и ја поддржува нивната развојна визија. Во моментов успешно го реализираме проектот „Одржлив туризам во искуствена економија“, преку кој инвестираме во развојот на туризмот, зачувувањето на традицијата и создавањето нови можности за локален економски развој“, рече Павловски.

Тој посочи дека особено значење за локалната заедница има реконструкцијата на поранешното училиште во село Петралица.

„Овој објект не е само градба, туку дел од колективната меморија на многу генерации жители на селото. Тука се создавале спомени, се стекнувале знаења и се граделе животни приказни. Токму затоа, една од просториите ќе биде уредена како спомен-соба, со цел да ги зачуваме сеќавањата и да им оддадеме почит на генерациите што поминале низ ова училиште“, истакна градоначалникот Павловски.

Тагови: Златко Перински