Потребно ни е лидерство на највисоко ниво и стратегија, во најкраток рок да се спроведе процес на ревидирање и проширување на позитивната листа, да се подготви законска рамка за договори за влез на лекови, директни договори со производителите поради олеснет пристап до нови и скапи терапии.
Ова се дел од приоритетни чекори што Владата треба итно да ги преземе, соопшти на денешната прес-конференција Андреј Сених од Здружението за поддршка на луѓето што живеат со ХИВ – „Заедно посилни“ – Скопје.
-Владата да почне да гради капацитети и експертиза за проценка на здравствени технологии, да го зголеми издвојувањето за здравствена заштита од јавните средства и да го намали „плаќањето од џеб“ на граѓаните, рече Сених.
Весна Алексовска од Здружението за ретки болести „Живот со предизвици“ се осврна на тендерските постапки преку кои се набавуваат лековите за ретки болести, за многу хронични болести, како и иновативните лекови.
-Нема на позитивната листа никакви промени повеќе од 15 години и поради тоа единствениот начин да влезе некој нов лек во нашата држава се програмите на Министерството за здравство, кои претходно служеа само за превентива, а сега служат за набавка на лекови и дополнително преку буџетите на клиниките и болниците кои добиваат условни буџети од Фондот за здравствено осигурување, рече Алексовска.
Таа посочи дека секогаш доцнат тендерите и додаде дека Програмата за ретки болести е само еден пример. Секоја година, како што рече, доцнат лекови за пациентите, од еден до шест месеци, а понекогаш се случува и никој да не се јави на тендерската постапка за одреден лек. Поради ова пациентите се ставаат во животозагрозувачка состојба.
-Ако лековите се на позитивната листа, пациентите можат да ги купат лековите од странство и да ги рефундираат преку Фондот за здравствено осигурување. Но, поради тоа што не се на позитивната листа тие не можат никако да рефундираат, значи ако купат лекови ги купуваат на свој трошок, рече Алексовска. Додаде дека лековите се скапи и претставуваат товар за буџетот на едно семејство. Потенцира дека пациентите треба редовно и на време да ги добиваат своите лекови и не смее да се дозволи граѓаните да страдаат.
Денешната прес-конференција покрај „Заедно посилни“ и „Живот со предизвици“, ја поддржаа и здруженијата на граѓани за борба против рак „БОРКА – ЗА СЕКОЈ НОВ ДЕН“, Асоцијација за цистична фиброза, Хепар центар Битола, ХОПС – Опции за здрав живот и Здружение за еманципација, солидарност и еднаквост на жените – ЕСЕ. Тие изработија еден документ кој ги содржи нивните барања. м