Еден час пред закажаната собраниска седница на чиј дневен ред беше владиниот предлог за негово разрешување, Коцевски одлуката ја соопшти на прес конференција. Остана на ставот дека постапката за негово разрешување е политичка одлука и затоа се одлучил на ваков чекор. Поканата да присуствува на седницата рече дека ја добил еден час пред почетокот но не и предлогот и не знаел на што треба да се произнесе.

-Станува збор за предлог кој не е заснован ниту на закон, ниту на факти, туку претставува опасен преседан со далекусежни последици по независноста на јавното обвинителство. Овој предлог како основи за разрешување содржи само три реда, а ниту еден од нив нема образложение или аргументирана поткрепа. Законот е јасен: државниот јавен обвинител може да биде разрешен само доколку се утврди дека сторил тешка дисциплинска повреда. Тоа е така не заради заштита на Љупчо Коцевски или на кој било друг што ќе дојде на оваа функција, туку заради заштита на самостојноста на јавното обвинителство и начелото на поделба на власта,- изјави – Љупчо Коцевски – Поранешен Јавен обвинител на РМ.

Коцевски рече дека откако дошол на функцијата, ЈО функционирало во услови на сериозни кадровски и материјални ограничувања но и покрај тоа имал видливи и мерливи резултати. Посочи дека се сработени голем број предмети од висок јавен интерес, во кои се опфатени осомничени лица блиски до различни политички и бизнис центри на моќ. Ја спомена и истрагата за пожарот во дискотеката Пулс во Кочани која тврдеше дека била завршена во рекордно време.

-Затоа, денеска поднесов неотповиклива оставка од функцијата Јавен обвинител на Република Северна Македонија. Функција која што во изминатите нешто помалку од две години ја вршев чесно и достоинствено и од која заминувам со гордо крената глава, но и со разочараност поради очигледното непочитување на принципите врз кои почива правната држава. Јас си заминувам од функцијата, но верувам дека обвинителството поседува институционален капацитет да работи објективно и непристрасно – затоа што институциите се поголеми од поединците, а правдата мора да биде поголема од политиката,-изјави – Љупчо Коцевски – Поранешен Јавен обвинител на РМ.

Оставката на Коцевски беше експресно констатирана на собраниската седница. Сега, според законот, по предлог на Владата, Собранието треба да распише оглас за именување на Јавен обвинител, а според кретериумите на него ќе може да се пријават само обвинители и судии-кривичари со најмалку 10 години искуство...

До изборот на нов државен јавен обвинител на местото на Коцевски треба да биде назначен вршител на должност кој треба да го назначи Советот на јавните обвинители.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.