Истиот ден, објави Би-Би-Си, повеќе од 1.000 Американци починале од коронавирус, а трендот на жртви и хоспитализирани пациенти продолжува да расте.

Во Соединетите држави, над девет милиони луѓе се заразени со ковид-19, покажуваат податоците на Универзитетот Џон Хопкинс. Во исто време, се ближи вторник, денот на претседателските избори на кои Американците ќе треба да одлучат меѓу актуелниот републикански претседател Доналд Трамп и демократскиот противник Џо Бајден.

Според Ројтерс, ова е трет пат овој месец дневниот биланс на жртви да надмине 1.000.

Дваесет и една држава се соочува со ширење на пандемијата, а некои од најпогодените држави ќе бидат клучни во донесувањето изборна доминација.

Во една од нив, Висконсин, болниците во Грин Беј предупредија дека предизборен митинг организиран од Трамп во петокот, може да го влоши ширењето на пандемијата.

„Сега е поважно од кога и да е да се избегне собирање во толпа, особено тука во Грин Беј, каде гледаме едно од најбрзите ширења на ковид-19 во Соединетите Држави“, се вели во заедничката изјава од неколку болници.

Вчера во пресрет на закажаните предизборни митинзи, Трамп твитна во негов стил: „Колку повеќе тестови, толку повеќе случаи. Ние сме најдобри во тестирањата. Има сè помалку смртни случаи“

На неговите последни предизборни митинзи на собраните им била измерена температурата и се дистрибуирани маски. Собири се одржуваат на отворено поради пандемијата. Но, немало почитување на мерките за социјално растојание и некои од поддржувачите продолжуваат да избегнуваат маски.

Демократскиот кандидат Бајден исто така ја продолжи кампањата, но митинзите на демократите се одржуваа со почитување на дистанца, повикувајќи ги луѓето да останат, на пример, во своите автомобили за време на митинзите.

Според Центрите за контрола на болести (ЦДЦ), на 29 ноември биле регистрирани 1.060 смртни случаи поврзани со ковид - 19. Вкупно 228 000 луѓе починаа во САД во пандемијата.

Американски здравствени експерти предупредуваат дека бројот на случаи на инфекција и бројот на смртни случаи ќе продолжат да растат затоа што сезоната на грип се совпаѓа со ширењето на пандемијата.

Специјалистот за инфективни болести и член на тимот на Белата куќа за коронавирус, др. Антони Фаучи за CNBC во средата изјави дека нацијата „оди во погрешна насока“.

„Ако работите не се променат, ако продолжиме во оваа насока, сè уште ќе има голема болка во оваа земја поврзана со нови случаи, хоспитализации и смртни случаи.”