Коцевски во текот на денов ќе ја добие и поканата за присуство на утрешната седница. Јавниот обвинител претходно најави дека е подготвен да дојде во Собранието и своите аргументи да ги образложи пред пратениците. Разрешувањето е на предлог на Владата со образложение дека сторил професионални грешки со кои се нарушила ефикасноста на Обвинителството. Коцевски во целата постапка за негово разрешување гледа политичка одлука, а наводите од Владата ги смета за неаргументирани. Кој ќе биде наследникот на Коцевски засега не се знае, но Гаши уверува дека неговиот избор ќе биде направен согласно законските рокови.

Денеска Собранието ги чека предлог-измените од Владата на неколку членови на Кривичниот законик, кои според одлуката на Уставниот суд мора да се донесат до крајот на годината за да се сменат спорните законски одредби со кои се создава неказнивост за функционерите. Гаши очекува до крајот на годината да се расправа и за овие измени.

Додека Собранието уште ја чека финалната верзија од Владата и министерството за правда за нов Изборен законик, во Собранието паралелно ќе се формира работна група со Гаши на чело и по двајца пратеници од секоја пратеничка група, која ќе работи за негова подготовка. Гаши очекува пратеничките групи да номинираат и свои членови за анкетната комисија која ја предложи владејачкото мнозинство, а која покрај за несреќата во Кочани, ќе ги опфаќа и другите трагедии во државата.

Претседателот на Собранието информираше и дека во собраниска процедура се само два закона од реформската агенда, Законот за јавни патишта и Законот за Судски совет, а останатите се чекаат од Влада да ги испратат во Собранието.

Пред утрешната седница ќе има опозициски пратенички прашања. До крајот на декември се очекува да се одржат четири пленарни седници. На 23 декември пред пратениците годишно обраќање ќе има претседателката Гордана Сиљановска Давкова, додека на 24-ти ќе се одржи седницата за разрешување на Мурезани од министерското место за европски прашања, и избор на Беким Сали, како и Мухамет Хоџа не местото на Меџити за министер за животна средина. На 25 декември е предвидено да се одржи седница за пратенички прашања.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.