Даниела Јованчевска е медицинска сестра од кочанската болница кобната ноќ на 16 март лани била дежурна. Пред камерата на Канал 5 раскажа дека во својата триесетгодишна работа никогаш не се соочила со такво нешто, но најтешко од се бил моментот кога спасувајќи други деца кои биле донесени во болницата, добила повик од нејзиниот син кој заедно со сопругата биле меѓу повредените во Пулс, со што Јованчевска се нашла растргната помеѓу мајчинството и професионалноста.

-Кога упорно ми звонеше мислев дека ме бара некој од докторите за реанимација, го зедов телефонот и го слушнав гласот на син ми кој ме побара и ми рече – Мамо каде си ти? Ние сме на интерно одделение. Во тој момен ми се пресекоа нозете, Господ ми даде некоја сила. Се косев од една страна со мајчинството а од друга страна со професионалноста. Како да ги оставам овие деца околу мене а да трчам да ги видам моите како се. - Даниела Јованчевска – Медицинска сестра ЈЗУ Општа болница Кочани

Даниела немала дилема дека не може никој од повредените да го остави. Откако пристигнала помош во болницата од останатите сестри им укажала помош и на најблиските кои за среќа поминале само со повреди. Таа сведочи и за првите моменти откако им јавиле дека имало пожар, носењето на пациентите и целиот хаос во кој морало да се одговорина голем број повредени во ситуација на мал број медицински персонал.

-Во 02.35 ни звонеа колегите од брзата помош да се симнеме веднаш долу во приемна амбуланта и дека настанал голем пожар за да почнеме да вршиме тријажа и да ги реанимираме пациентите. Никој од нас во тој моментне очекуваше дека бројката ќе биде толку голема. Од сите страни ни доаѓаа пациенти и во почетокот побарав помош од медицинските сестри од другите одделенија, гледав на што поголем број на деца да се помогне.- Даниела Јованчевска – Медицинска сестра ЈЗУ Општа болница Кочани

Јованчевска се надева дека оваа трагедија е лекција за сите нас и дека нема да се повтори. Но сепак случувањата отворија дилема околу функционирањето на системот и подготвеноста на медицинските центри да одговорат во вакви ситуации. По кочанската трагедија, потоа и случаите со Ласкарци, тетовската модуларна болница и автобуската нереќа во Бугарија во кои имаше десетици жртви и повредени, Министерството за здравство претстави Национална стратегија за справување со масовни жртви.

-Според тој документ понатаму ќе има акциски план со кој ќе направиме нашите институции, нашиот систем да биде спремен за да може во реално и брзо време да делува кога ќе има потреба од таков тип на делување. – Азир Алу – Министер за здравство

Планот предвидува централизирано носење одлуки и управување со кризата на највисоко државно рамниште, со цел да се елиминираат дезориентираноста и преклопувањето на надлежностите на терен. Второто ниво е предболничкиот третман, каде фокусот е ставен на ефикасна теренска тријажа, брза евакуација и безбеден транспорт. И третото, болничко ниво, ги уредува протоколите за прием и итно лекување на голема група повредени во медицинските центри.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.