Радовиш во знакот на борењето: Јубилејниот 50-ти „Македонски бисер“ ја обедини регионалната боречка елита - Канал 5

Други спортови

Радовиш во знакот на борењето: Јубилејниот 50-ти „Македонски бисер“ ја обедини регионалната боречка елита

Радовиш изминатиот викенд живееше во ритамот на борењето. 

Радовиш во знакот на борењето: Јубилејниот 50-ти „Македонски бисер“ ја обедини регионалната боречка елита

Повеќе од 70 натпреварувачи од 10 држави, бројни спортски делегации, гости и љубители на спортот беа дел од јубилејното 50-то издание на Меѓународниот боречки турнир „Македонски бисер“, настан кој уште еднаш ја потврди својата позиција меѓу најзначајните и најреномирани боречки турнири во регионот.

Турнирот официјално го отвори министерот за спорт Борко Ристовски, со што беше означен почетокот на ден исполнет со врвни натпревари, спортски емоции и атмосфера достојна за голем јубилеј.

Во силна меѓународна конкуренција, трофејот „Македонски бисер“ заслужено му припадна на Омер Мемеди, кој доминираше во категоријата до 92 килограми.

Признанието за најдобар домашен борец го доби репрезентативецот Расул Шапиев (74 кг), додека за најдобар странски борец беше прогласен молдавскиот репрезентативец Раду Лефтер (125 кг).

Публиката со особено внимание ги проследи настапите на Мехмет Усинов, Реџеп Хајдари и Илија Атанасов, кои со своите борби уште еднаш покажаа дека македонското борење има иднина.

Претседателот на Боречката федерација на Македонија, Дејан Богданов, истакна дека јубилејното издание уште еднаш ја потврдило важноста на турнирот за развојот на боречкиот спорт и неговиот меѓународен углед.

„Во Радовиш се одржа јубилејното 50-то издание на меѓународниот турнир во борење „Македонски бисер“, еден од најзначајните и најдолговечни спортски настани во нашата држава. Годинава учествуваа повеќе од 70 натпреварувачи од 10 држави, што уште еднаш ја потврди неговата репутација на меѓународната боречка сцена“, изјави Богданов.

Во текот на петте децении постоење, низ „Македонски бисер“ продефилирале бројни европски, светски и олимписки медалисти, што дополнително го потврдува неговото место на мапата на најзначајните боречки турнири во Југоисточна Европа.

Поддршка за спортот и младите

Како генерален спонзор на турнирот, Рудникот за бакар Бучим уште еднаш ја потврди својата посветеност кон развојот на спортот, младите и локалната заедница.

„Македонски бисер е повеќе од спортски турнир. Тој е место каде што се создаваат нови генерации спортисти, се градат пријателства и се негуваат вредности како дисциплина, истрајност и тимски дух. Горди сме што сме дел од оваа успешна спортска приказна која веќе 50 години остава траен белег во македонскиот спорт“, изјави Ивица Карапетров, заменик генерален директор на Рудник Бучим.

Задоволството од успешната организација го изрази и градоначалникот на Општина Радовиш, Љупчо Почивалец, кој истакна дека турнирот претставува еден од најзначајните спортски настани за градот и е горд продолжувач на богатата боречка традиција по која Радовиш е препознатлив.

Во рамки на јубилејната програма беше промовирана монографијата „50 години Македонски бисер“ од авторот Славчо Тодоров, која претставува трајно сведоштво за историјата и развојот на турнирот.

Свечени плакети за придонес во развојот и афирмацијата на боречкиот спорт беа доделени на Министерството за спорт, Општина Радовиш, Рудник Бучим, БК Бучим Радовиш, Адора Инженеринг, делегатот Павлина Георгију од Грција и олимпискиот шампион Шабан Трстена.

Посебен момент на свеченоста беше доделувањето на вредносни ваучери од по 120.000 денари на младите репрезентативци Лука Ананиев и Абдул Азиз за освоените бронзени медали на Европското првенство до 15 години, како поттик за нивниот понатамошен развој и нови спортски успеси.

Организацискиот одбор изразува искрена благодарност до сите партнери, спонзори, медиумски покровители и до бројната публика која беше дел од овој историски јубилеј.

Благодарение на поддршката од Рудник Бучим, Адора Инженеринг, Комерцијална банка, Кожувчанка ДОО, Општина Радовиш и Боречката федерација на Македонија, јубилејниот „Македонски бисер“ прерасна во спортски спектакл од меѓународен ранг, кој по својата организација, квалитет и посетеност ги надмина очекувањата и уште еднаш го насочи вниманието на спортската јавност кон Радовиш.

Половина век по своето прво издание, „Македонски бисер“ останува симбол на спортската извонредност, гордост на Радовиш и еден од најпрепознатливите боречки брендови во регионот. Јубилејното 50-то издание уште еднаш потврди дека „Македонски бисер“ги надминал националните рамки, израснувајќи во турнир со меѓународен углед и препознатливо место на мапата на најреномираните боречки настани во Југоисточна Европа.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Ќерката на Никол Кидман го оствари сонот што го имала на 16 години: „Плачев од среќа“

Ќерката на Никол Кидман, Сандеј Роуз, преку социјалните мрежи се осврна на еден од најголемите моменти во нејзината досегашна кариера.

Ќерката на Никол Кидман го оствари сонот што го имала на 16 години: „Плачев од среќа“

Младата манекенка се присети како, пред само две години, го гледала настанот „Vogue World“ со својата мајка и сонувала еден ден и самата да учествува во него. Оваа година, таа желба се оствари.

„Дојдов во Париз со мајка ми пред две години и се сеќавам дека слушнав оти токму тој ден се одржува ’Vogue World‘. Се вратив во хотелот и го гледав преносот на YouTube – сите тие прекрасни жени, музиката и целиот спектакл. Во Милано сфатив дека оваа година и самата ќе учествувам во шоуто. Мојата 16-годишна верзија ќе плачеше од среќа, а плачев и јас сега, на 18 години. Имам огромна среќа што можам да доживеам вакви работи и да запознаам толку многу луѓе“, напиша Сандеј на Инстаграм.

Оваа 18-годишна девојка учествуваше на ревијата „Vogue World“ за време на Модната недела во Милано во септември. Таа се појави во полупроѕирен бел фустан со длабоко деколте, широки ракави и лелеава силуета. Фустанот беше украсен со нежен цветен вез.

Советот на Никол Кидман за нејзината ќерка

Во интервју за ноемвриското издание на „Vogue“, Никол откри како ги советува своите ќерки додека тие растат под будното око на јавноста. Кога ја прашаа за омразата на интернет, осудувањето и нападите, таа одговори: „Едноставно се вртиш и си заминуваш. Зашто тоа ќе те скрши. Ќе те уништи“.

„Тоа многу ме плаши. Но, јас почнав да работам на 14 години, така што и немам многу право на глас“, додаде таа. Сандеј претходно зборуваше за магазинот „Nylon“ за правилата што нејзината мајка ги поставила во врска со нејзината кариера.

„Постојат две важни правила“, рече таа. „Првото беше дека не можев да работам во модната индустрија сè додека не наполнив 16 години. Второто е дека училиштето секогаш мора да биде на прво место. На почетокот тоа го мразев, но всушност мило ми е што постојат тие правила, бидејќи ми помагаат да останам цврсто на земја.“

Тагови: никол кидман

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Фридрих Мерц е во сериозни проблеми

Само 10% од Германците изјавиле дека се задоволни од работата на канцеларот Фридрих Мерц – што претставува најниска бројка во последните речиси 30 години – според анкетата „Deutschlandtrend“, за што известува порталот „Interia“.

Фридрих Мерц е во сериозни проблеми

На почетокот на септември, 13% од испитаниците ја оценувале работата на Мерц позитивно. Оваа нова бројка го означува најниското ниво во текот на целиот негов мандат како канцелар.

Доколку изборите за Бундестагот се одржеле на преминот од септември кон октомври, блокот CDU/CSU би можел да смета на 20% од гласовите. Тоа е за еден процентен поен помалку отколку на почетокот на септември.

Крајно десничарската партија „Алтернатива за Германија“ (AfD) доби најголема поддршка во анкетата, со 27%; нејзиниот рејтинг остана непроменет во текот на месецот. Зелените би освоиле 16%, Социјалдемократската партија на Германија (SPD) 13%, а партијата „Левица“ (Die Linke) 11%. Со 4% од гласовите, Слободната демократска партија (FDP) не би го достигнала изборниот праг од пет проценти.

Што се однесува до членовите на владата, министерот за одбрана Борис Писториус (SPD) доби значително подобри оценки од канцеларот: 50% од учесниците во анкетата биле задоволни или многу задоволни од неговата работа. Работата на министерот за надворешни работи Јохан Вадефул позитивно ја оцениле 34% од испитаниците, додека работата на министерот за внатрешни работи Александар Добринд добила позитивна оценка од 27%. Околу 20% од испитаниците биле задоволни од работата на вицеканцеларот и министер за финансии Ларс Клингбајл, додека приближно еден од шест испитаници бил задоволен од работата на министерката за труд Бербел Бас. И двајцата се членови на „SPD“.

Анкетата била спроведена кон крајот на септември од страна на институтот „Infratest dimap“. Истражувањето било спроведено преку телефон и интернет, користејќи репрезентативен примерок од 1.303 гласачи со право на глас.

Извор: Б92

Тагови: Фридрих Мерц

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

„Тајм“: Трамп го прашал „Грок“ што би се случило ако го уапси Мадуро

Американскиот претседател Доналд Трамп го прашал „Грок“ – чет-бот со вештачка интелигенција во сопственост на Илон Маск – како народот на Венецуела би реагирал на апсењето на тогашниот претседател Николас Мадуро.

„Тајм“: Трамп го прашал „Грок“ што би се случило ако го уапси Мадуро

Ова се случило неколку недели пред тој да нареди операција за негово приведување, открива списанието „Тајм“. Наводно, вештачката интелигенција му рекла на Трамп дека многумина во Венецуела веројатно би го прославиле падот на Мадуро.

Во декември 2025 година, Трамп се сретнал приватно со Маск во Овалната соба, каде што со часови го испрашувал „Грок“ за својот мандат и политичкото наследство. „Тајм“ ја заснова оваа информација на изјава од официјално лице кое присуствувало на средбата.

Едно од прашањата што Трамп му ги поставил на чет-ботот било како би реагирале Венецуелците доколку САД го уапсат Мадуро. Официјалното лице цитирано од списанието вели дека „Грок“ го опишал Мадуро како „репресивен и крајно непопуларен диктатор“ и проценил дека многумина во Венецуела навистина би можеле да го прослават неговиот пад.

Операција во Каракас

Еден месец подоцна, Трамп наредил операција за апсење на Мадуро. Американските сили го привеле него и неговата сопруга, Силија Флорес, за време на воена операција во Каракас на 3 јануари, а потоа ги префрлиле во Соединетите Држави.

Мадуро бил однесен во Њујорк, каде што се соочува со федерални обвиненија за трговија со дрога – обвинувања што тој ги негира. Кога некои Венецуелци навистина го прославиле апсењето, Трамп – според официјалното лице – заклучил дека „Грок“ е „генијален“.

Извор: Индекс.хр

Тагови: Доналд Трамп Николас Мадуро

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер