Македонија

Путин пред самитот со Трамп: Во фокус Украина и контролата на стратешкото вооружување

Рускиот претседател Владимир Путин изјави, во пресрет на утрешниот самит Москва–Вашингтон на Алјаска, дека ќе ги информира своите колеги за напредокот во преговорите за решавање на кризата во Украина.

Рускиот претседател Владимир Путин изјави, во пресрет на утрешниот самит Москва–Вашингтон на Алјаска, дека ќе ги информира своите колеги за напредокот во преговорите за решавање на кризата во Украина, нагласувајќи дека администрацијата на американскиот претседател Доналд Трамп вложува енергични напори за завршување на конфликтот. Според него, следната фаза на контактите меѓу двете држави би можела да биде постигнување договор во областа на контролата на стратешкото офанзивно вооружување, пренесуваат руските медиуми.

Средбата воочи самитот се одржа во присуство на највисокото државно раководство на Русија, претставници на Владата и на претседателската администрација. Како што информира советникот на претседателот, Јуриј Ушаков, средбата меѓу Путин и Трамп ќе започне во петок во 11:30 часот по локално време, (21.30 часот по македонско) во воздухопловната база Елмендорф–Ричардсон во Анкорејџ. Лидерите најпрво ќе разговараат „еден на еден“, по што ќе следи пленарен дел со работен појадок во присуство на двете делегации.

Траењето на самитот ќе зависи од текот на дискусијата, а по неговото завршување е планирана заедничка прес-конференција. Главна тема ќе биде решавањето на украинската криза, но ќе се разговара и за соработката меѓу Москва и Вашингтон, прашања од глобалната и регионалната безбедност, како и други точки од меѓународната агенда.

Во руска делегација, покрај претседателот Путин, ќе бидат министерот за надворешни работи Сергеј Лавров, министерот за одбрана Андреј Белоусов, директорот на Руското здружение за директни инвестиции Кирил Дмитриев, министерот за финансии Антон Силуанов и самиот Ушаков.

Според Кремљ, самитот има работен карактер, а руската делегација веднаш по неговото завршување ќе се врати во Москва. Посебно е нагласена симболиката на местото на одржување – во близина се наоѓаат гробишта на советските пилоти кои загинале во Втората светска војна при транспорт на авиони од САД во СССР во рамки на програмата „заем и наем“.

Тагови: Владимир Путин

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Култура

НУ Народен Театар Битола со две награди на Денови на комедија во Куманово

Со доделувањето на наградите на најдобрите, заврши годинешното 29.издание на Фестивалот „Денови на комедија“ во Куманово, кој оваа година се одржуваше од 23 септември до 5 октомври.

НУ Народен Театар Битола доби две награди и тоа за најдобра режија: Марјан Георгиевски и за најдобра костимографија: Андреј Георгиевски, за претставата „Секстет“.

Со својата изведба екипата на оваа претстава повторно ја воодушеви и ја насмеа до солзи публиката која ја исполни салата до последното столче. „Секстет“, комедијата од Марк Камолети, и овојпат покажа дека добрата комедија не познава граници – се игра, се чувствува и се споделува со публиката.

Во претставата играат: Бернар -Николче Пројчевски, Жаклина-Катерина Аневска Дранговска, Роберт -Александар Димитровски, Сузан-Сандра Грибовска Илиевска, Сузет -Анастасија Чипуровска, Џорџ-Борче Ѓаковски. Сценографијата е на Влатко Чачоровски, музика -Александар Димовски.

Во текот на фестивалските денови, публиката имаше можност да проследи театарски претстави исполнети со хумор, квалитетна актерска игра и препознатлива фестивалска атмосфера преку изведбата на театрите од Македонија и земјите од регионот. Фестивалот беше затворен со претставата надвор од конкуренција, „Не можам да платам, не сакам да платам“ на Театар Куманово, посветена на годинешниот лауреат Игор Џамбазов,

Фестивалот е поддржан од Министерството за култура и туризам и од Општина Куманово.

Честитки за целата екипа, да се множат успеси и убави претстави!

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Руски дрон погоди мост на реката Днепар во Запорожје

Пет лица се повредени, а сообраќајот беше привремено запрен по рускиот напад врз мост на реката Днепар во Запорожје.

Оваа информација на „Телеграм“ ја соопшти Михајло Семикин, вршител на должноста началник на Регионалната воена управа на Запорожје.

Според најновите информации, во нападот се повредени две жени на возраст од 24 и 59 години и тројца мажи на возраст од 36, 43 и 54 години. Двајца од мажите – на возраст од 43 и 54 години – се вработени во Црвениот крст кои биле нападнати додека оделе на работа.

Првичните извештаи укажуваат дека тие биле хоспитализирани со полесни повреди. Сите повредени добиваат медицинска помош.

Семикин потврди дека сообраќајот на мостот е ограничен. „Непријателот нападна еден од мостовите преку реката Днепар во Запорожје.

Поради нападот, сообраќајот на мостот е привремено ограничен“, се наведува во соопштението. Жителите на Запорожје се повикани да ги прилагодат своите планови за патување со оглед на сообраќајните ограничувања и да ги следат официјалните соопштенија.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Нов случај „Лотарија“: Две вработени уапсени за проневера од 1,3 милиони евра

Две вработени во Државна лотарија вчера се приведени под сомнение за проневера на околу 80 милиони денари или околу 1,3 милиони евра.

Двете вработени неофицијално биле во секторот финансии, а сомнежите се однесуваат на начинот на кој биле евидентирани и движени парите од уплатните места за игри на среќа.

Парите од уплатните места требало да бидат евидентирани и уплатени како дневен промет, но сомнежот е дека дел од средствата фактички ги немало, иако сметководствено состојбите биле затворани.

Се истражува дали со фиктивна документација биле прикажувани исплати и добивки, како и дали пари биле префрлани од една на друга сметка за финансиски да се затвораат обврските.

Дејствијата што се истражуваат започнале од 1 јануари 2024 година. Повеќе информации од обвинителството се очекуваат во текот на денот.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.