Војната во Украина влегува во нова уште понепредвидлива фаза, паралелно со напредувањето на украинските сили и ѕвечкањето на Путин со нуклеарно оружје. Иако официјално не се познати сите детали од осмиот пакет санкции, познато е дека новите рестрикции треба да ѝ нанесат на руската економија удар од најмалку седум милијарди евра. Предвидено е ограничување на цената на руската нафта, како и забрана за извоз на повеќе клучни руски технологии.. Во обраќањата во Европскиот парламент Лајен и Борел предложија и ограничување на цената на природниот гас за производство на струја. Порачаа дека во Украина се решава иднината на Европската Унија.

-Поради тоа е важно, како што Европа се откажа од старите империјалистички намери, и Русија да се откаже од тоа. Оваа војна мора да заврши само на начин кој ќе обезбеди мир. А, за да постигнеме мир, Украина мора да ја поврати територијалната целовитост и суверенитет, а Русија да преземе одговорност за својата неморална политика во оваа војна. , изјави Жосеп Борел, шеф на европската дипломатија.

Претходно, денеска Путин ги потпиша федералните уставни закони за присоединување на Луганск, Доњецк, Запорожје и Херсон кон Русија и како привремени шефови на овие региони ги именуваше актуелните проруски лидери. Западните и украинските извештаи велат дека ниту еден од четирите анектирани региони не се под целосна контрола на Русија, поради брзиот пробив на укранските сили на истокот и на југот.

-Само оваа недела, по рускиот псевдореферендум, беа ослободени десетици населени места. Сите тие се наоѓаат во областа Керсон, Харков, Луганск и Доњецк. Нашите војници не запираат. И само прашање на време е кога ќе го истераме окупаторот од целата наша земја. , изјави Володимир Зеленски, претседател на Украина.

Американските власти денеска соопштија дека немаат индиции дека Русија се подготвува да употреби тактичко нуклеарно оружје, по информациите и снимките во дел од медиумите дека Русија наводно испратила воз со нуклеарно оружје во Украина.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.