Најдобар начин да ја спречите разгаленоста или пркосот кај детето е да го поттикнете неговото независно размислување во разумни граници, преку укажување почит кон него и подучување на социјални вештини. Ова ги зголемува шансите и тие да покажуваат почит кон другите.

Советничката за воспитување и работа со деца, Каролин Мегваер тврди дека подучувањето на детето на следните четири вештини помага да се спречи неговото разгалување и пркосење во иднина.

Како самостојно да донесат добра одлука

Користењето отворени прашања и рефлективното слушање не само што помагаат да се елиминираат многу непотребни конфликти со децата, туку и им дава и социјална вештина што може да спречи идни проблеми во однесувањето.

Наместо да му кажете на вашето дете: „Треба да престанеш да се расправаш со наставникот“, прашајте го: „Што мислиш, како се чувствува твојот наставник кога зборуваш без ред“? „Каков впечаток сакаше да оставиш“? „Зошто ти беше важно да го кажеш тоа што го кажа“? „Како би го кажал тоа а да не звучи како расправија“? - известува YourTango.

„Овие прашања му помагаат на вашето дете да размислува за чувствата на другите луѓе и како неговото однесување може негативно или позитивно да влијае на другите. Отворените прашања започнуваат со кој, што, кога, каде, како и зошто. Исто така, корисно е вашето дете да го следи изразот на вашето лице и да се обиде да разбере како се чувствувате во моментот“, тврди Каролин Мегваер.

Во секојдневните ситуации, како на пример, возење во автомобил или кога детето е грубо, поставувајте отворени прашања што ќе му овозможат да размислува за своите постапки и како тие влијаат на другите. Повторете го она што го слушате за да бидете сигурни дека ги разбирате правилно, а со тоа ќе развиете почит во вашата врска.

Како да биде социјален набљудувач

За да му помогнете на вашето дете да престане да се расправа и да развие свест за социјалните ситуации, воведете го концептот „социјален шпион“. Социјалните шпиони ги набљудуваат луѓето во различни средини и ги забележуваат социјалните сигнали, на пример, јачината тонот со која се обраќаат, контактот со очите, физичкото присуство, прекинувањето на говорот, расправиите итн.

Како функционира ова? Одете на јавно место, на пример, хотелско лоби, книжарница или трговски центар. Набљудувајте и препознајте ги социјалните сигнали и неискажаните правила кои околината ги наметнува. Дискутирајте за вашите набљудувања и создадете слика за позитивно социјално однесување кон кое треба да се стремите.

Како да бидете љубезни дури и кога им е здодевно или се нервозни

Децата не сакаат да им биде досадно и понекогаш се однесуваат лошо на часовите, тоа може да доведе до бес или целосно игнорирање на наставата. Некои ќе ги провоцираат и ќе се расправаат со наставниците за да ги забавуваат своите пријатели или да добијат реакција.

Наместо да држите предавања, прашајте го вашето дете што се случило во одредена ситуација. Започнете со: „Забележав дека понекогаш ти е тешко да престанеш да се расправаш со наставникот и разбирам дека не сакаш кога не те почитуваат“. Останете неутрални и смирено објаснете зошто е важно да се биде пристоен, дури и кога сме незаинтересирани. Разговарајте за ситуациите кои не ги интересираат и предизвикајте ги да бидат пристојни“, додава советничката.

Работете заедно за да најдете пристојни начини на реакција кога им е здодевно или кога се премногу уморни за да учествуваат во разговор. Исто така, вежбајте го вашиот тон на глас за да не звучите одбивно или кавгаџиски.

Како да ја „прочитаат“ просторијата

Во секоја средина постојат очекувања и неискажани правила. За да оставите добар впечаток, важно е да ги препознаете овие очекувања. Пред да влезете во некоја просторија или на место каде се собирате, помогнете му на вашето дете да застане, да набљудува и да се приспособи на енергијата и разговорот пред да се приклучи. Социјални вештини можете да развивате и дома!

Децата кои постојано се расправаат и доминираат во разговорите можат да научат да ги толкуваат и да ги земат предвид чувствата на другите. Родителите често остануваат збунети од пркосното однесување на детето, иако се чини дека таквото воспитување не го добиле дома, детето продолжува да му пркоси на авторитетот. И покрај бројни средби со наставниците и разговорите дома, промените изостануваат.

Советничката истакнува дека „вашето дете можеби не сфаќа како тоа влијае на другите. Тоа можеби чувствува дека кажува факти, додека други сметаат дека е непристојно или непримерно“.

Важно е да им помогнете да ги согледаат работите од туѓа перспектива. Студиите во развојните науки сугерираат дека разбирањето на сопственото однесување и изборите, помага во препознавањето на социјалните сигнали. Намерите на децата се добри, но им е потребна помош да разберат како се чувствуваат другите.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.