Вели дека не знае ниту колкава сума треба да плати бидејќи, како што посочи, не било доволно јасно што треба да се плати – дали парите од данокот или платата.

-Во Германија работев 2024 година и сега пред некој месец, пред некоја недела ми стигна писмо дома дека јас треба да пријавам данок кој ми е вратен од таму и кога им се јавувам – никаква транспарентност од УЈП, никакви информации, само така не бомбардираат студентите со писма. И кога разговараме, еден службеник ни кажува едно, односно дека треба да платиме данок на вратениот данок, друг службеник ни кажува друго, дека треба да ја пријавиме целата плата. Јас имав ситуација да разговарам со службеник и ни рекоа дека „ако ти не ги пријавиш своите платни листи, врз основа на вратениот данок јас ќе ти го помножам по десет“.

Покрај студентите, на протестот беа и граѓани кои биле во Ирак и Авганистан. Тие, пак, велат дека иако таму фирмите го платиле данокот, на дел од нив наплата им била побарана и во Македонија.

-Ова е доказ од наш колега. Датумот е 09.12.2025 година. погледнете ги цифрите, ги гледате цифрите? –Нула. Првата реченица вика „даноци, придонеси и други јавни приходи и давачки за кои се издава ова уверение се целосно платени со состојба до тој датум. На колегата за три дена му доаѓа решение за да му наплатат 4.000 евра за 2020 година,- Жикица Миланов – Здружение „Правда за Сите“ .

Од друга страна, пак, директорката на УЈП, Елена Петрова уверува дека двојно оданочување нема да има. Вели дека лицата кои тврдат дека платиле данок во странство треба да достават потврда. За оние кои не можат да ги добијат потврдите поради временската дистанца, Петрова вели дека МНР испратиле барања до државите за одговор. Во однос на студентите, според неа, секој доход мора да биде оданочен, вклучително и платите на студентите, бидејќи статусот „студент“ не ослободувал од данок, а банките во кои тие се корисници не ги означуваат клиентите како студенти. Дополнително, рече и дека може данокот да биде платен на 36 рати.

-Платата остварена во Германија треба да биде од страна на македонски даночен резидент треба да биде оданочена во Германија, но доколку не е оданочена во Германија, данокот се плаќа во Македонија и тука не правиме разлика за која категорија на граѓани станува збор, дали е студент или за некој друг граѓанин кој остварува доход од работа-- Елена Петрова.

Петрова потенцираше дека бројката на даночни обврзници бележи опаѓачки тренд. Имено, во 2020 година имало нешто повеќе од 8.000 корисници, а следната година бројката опаднала за речиси 5000 обврзници. Од осумте илјади во 2020 година, за 257 лица биле побарани проверки преку МНР во странските администрации, а до сега имаат одговор само за едно лице. Според податоците на УЈП, како студенти досега биле идентификувани 134 лица од кои само 10 лица веќе платиле данок.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.