Бараат 600 евра минимална плата и линеарно зголемување по 100 евра за сите останати плати. Велат револтот на работниците е голем од игнорантскиот однос на работодавачите и Владата, и ги повикаа сите работници да им се приклучат, а доколку се нема слух за нивните барања, најавуваат продолжување на блокадите со можност за генерален штрајк во јавниот и приватниот сектор.

Од Бизнис конфдерацијата, пак, категорични дека приватниот сектор не може да си дозволи покачување на платите,без субвенции на придонесите од страна на Владата. Според нив секое зголемување над законското усогласување би било тежок удар за стопанството и предлага евентуалното покачување од 6.000 денари, да биде ослободено од социјални придонеси во сите сектори.

Во пресрет на протестот власта и опозицијата со спротивставени ставови. Од ВМРО-ДПМНЕ денеска на прес-конференција реагираат дека ССМ и првиот човек Трендафилов претходно го одбил предлогот на Владата предводена од ВМРО-ДПМНЕ за зголемување на платите на административните службеници за 40% во следните две години. Премиерот Мицкоски, пак, во интервју синоќа посочи дека тој нема ништо против повисоки примања, но смета дека целта на синдикатите е политичка пресметка, а не повисоки плати за работниците.

-Секој треба да добие повисоки примања, тука нема дилема ниту пак некој има спротивно мислење, но тоа кое што треба да се каже и да се погледне на вистината во очи е фактот дека неколкумина кој што се дел од водството на овој синдикат се апсолутно заробени од страна на одредени политички амбиции и политички фигури. Сакате да кажете дека повикот за протест на ССМ има политичка позадина? -Апсолутно, зар некој треба да има дилема на протест на синдикатите кој што е најавуван пред неколку недели, а се случува неколку дена по одржувањето на Конгрес на една политичка партија, изјави Мицкоски.

Опозициските СДСМ и Левица, пак со отворена поддршка на денешниот протест на ССМ. Лидерот на социјалдемократите Венко Филипче смета дека барањата се реални, објективни и дека поголема плата е заслужена и вистински потребна и за преживување на работничките семејства во државата. Тој отфрла било каква политичка поврзаност со протестот.

-Ја слушнав изјавата на премиерот дека овие протести имаат некаква политичка заднина, сакам јавно, јасно и гласно да укажам дека СДСМ освен што ги поддржува барањата за коишто смета дека се легитимни нема никаква улога во организирањето на овие протести. Ако излегуваат синдикатите на протест тоа значи дека работниците имаат реални потреби и барања. Тоа се луѓе и семејства што не можат да врзат крај со крај во оваа ситуација кога платите се крајно ниски, најниски во регионот, нема тренд на раст, а цените континуирано растат, изјави Филипче.

Протестот на синдикалците почнува во 17 часот пред Работничкиот дом па же продолжи пред Собранието, Стопанската комора и ќе заврши пред Владата.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.