Македонија

Проструи снимка од наводниот убиец во Старо Нагоричане

Мрак, речиси два часот по полноќ пред точно еден месец. Крупен и висок маж со црно палто и качулка на глава најпрво стои на прагот пред влезната врата од куќа лоцирана близу Коински мост во Старо Нагоричане

Мрак, речиси два часот по полноќ пред точно еден месец. Крупен и висок маж со црно палто и качулка на глава најпрво стои на прагот пред влезната врата од куќа лоцирана близу Коински мост во Старо Нагоричане, а откако сфаќа дека е заклучена и не може да влезе, тивко и полека кружи во дворот, најверојатно барајќи отворен прозорец и прави обиколка на објектот. Ова е снимка која жители на Старо Нагоричане ја пратија до Канал 5, тврдејќи дека на неа е прикажан 25 годишниот човек кој е во притвор како осомничен за убиство на старица од Челопек, и за кој Обвинителството истражува дали има поврзаност со други смртни случаи на жени од истата општина.

Според засега неофицијални информации надлежните бараат докази за пет сериски убиства извршени од еден човек. Додека Обвинителството поради сомнежи нареди ексхумација на едно тело на почината жена, а судка медицина веќе ги врши обдукциските анализи, Димитар Стевчев, магистер по безбедност од Куманово кој има напишано книга за сериските убијци од Македонија вели дека досегашните потврдени профили имаат еден заеднички „именител“ - потекнуваат од дисфункционални семејства. Сериските убијци не се раѓаат, туку се создаваат, вели Стевчев.

Сериските убијци оставаат свој печат и земаат трофеи од убиството, има организирани и неорганизирани убијци, вели Стевчев, а само со детални докази или признание на делата ќе се дојде до вистината, се во меѓувреме се само претпоставки.

Во поновата македонска криминална историја како најпознати сериски убијци се споменуваат Владо Танески, познат како „Кичевскиот монструм“, и Виктор Карамарков, нарекуван „Македонскиот Раскољников“. Танески беше уапсен под сомнение дека убил најмалку три жени во кичевскиот регион, а неколку дена по апсењето, беше пронајден мртов во ќелијата во притвор, според тогашните информации, се самоубил давејќи се во кофа со вода, а случајот заврши без судска пресуда. Карамарков уби четири повозрасни жени во Скопје, по што беше осуден на доживотен затвор.

Тагови: убиства

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Ѓорѓиевски: Конечно решение за булевар „Борис Трајковски“

Фејсбук објава на градоначалникот на Град Скоје, Орце Ѓорѓиевски.

„30 години голгота - конечно решение за булевар „Борис Трајковски“

Зборот е збор.

Со силна динамика продолжуваат работите на довршување на булеварот „Борис Трајковски“, проект што со децении беше симбол на лажни ветувања, застој и секојдневен сообраќаен хаос.

Денес, со задоволство можам да кажам дека работите напредуваат според предвидената динамика и дека наскоро повеќе од 100.000 жители ќе добијат нов, модерен и безбеден булевар со четири сообраќајни ленти, како и уредена пешачка и велосипедска патека.

Трасата е речиси целосно пробиена, а паралелно се гради и нова атмосферска канализација, со што трајно се решаваат проблемите што со години го отежнуваа животот на граѓаните од овој дел на Скопје.

Свесен сум низ што поминуваше мојот народ сите овие години.

Свесен сум за изгубеното време, нервозите и долгото чекање.

Но, деценискиот сообраќаен хаос конечно заминува во историјата.

Ова е враќање на достоинството на граѓаните и доказ дека кога има волја, работа и одговорност - нема невозможни работи!

Продолжуваме да го менуваме ликот на Скопје!“- напиша Ѓорѓиевски.

Тагови: Орце Ѓорѓиевски

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ТИРЗ: ВДЛ Бус Македонија ќе започне со трета фаза на инвестицијата - производство на нов модел на автобус

Директорот на ТИРЗ Гоце Димовски денес имаше средба со Аврам Стојчевски, генерален директор на компанијата ВДЛ Бус Македонија.

На средбата се разговараше за тековните активности на компанијата, реализирањето на третата фаза од инвестицијата која ќе изнесува повеќе од 5 милиони евра, со нови 150 висококвалификувани работни места во рамките на ТИРЗ Скопје 2.

Димовски нагласи дека Дирекцијата за ТИРЗ останува посветен партнер на компаниите кои веќе инвестираат во земјата, преку навремена институционална поддршка и активно следење на нивните потреби. Тој истакна дека токму постојните инвеститори претставуваат најсилен показател за квалитетот на деловното окружување, а нивното проширување е важен сигнал за довербата во домашната економија.

На средбата беше разгледан планот за реализација на третата фаза од инвестицијата, која предвидува производство на нов модел на автобус. Дополнително, беше потврдена заложбата за продолжување на конструктивна соработка, со цел создавање услови за успешна реализација на овој инвестициски циклус, натамошен развој и зајакнување на конкурентноста на домашната економија.

Инаку, компанијата во април годинава од ВДЛ Ван Хоол Македонија се преименува во ВДЛ Бус Македонија, со што истата започна нова развојна фаза во своето работење. Промената е дел од поширокиот процес на трансформација и развој на компанијата, со фокус на понатамошно унапредување на производствените активности и зајакнување на нејзината позиција во автомобилската индустрија.

Тагови: ТИРЗ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ДЗС: Неексплодирана граната со калибар 75mm извлечена од под вода во Црна Река кај с. Радобор

Станува збор за граната што била истрелана, но не експлодирала.

Пиротехничарот на Дирекцијата за заштита и спасување (ДЗС), Ѓорѓи Стефанов, безбедно отстрани неексплодирана артилериска граната со калибар 75mm, што потекнува од Првата светска војна и беше пронајдена под вода во Црна Река, кај мостот во село Радобор, Општина Могила.

Станува збор за граната што била истрелана, но не експлодирала. За пронајденото убојно средство, ДЗС Битола ја прими дојавата преку единствениот повикувачки број за итни случаи 112.

Тагови: ДЗС

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.