Промовирана „Православната енциклопедија“ - Канал 5

Култура

Промовирана „Православната енциклопедија“

Во Охрид денеска беше презентирано најголемото енциклопедиско дело посветено на православието во светот, специјалното издание на досега објавените 38 тома од големиот проект „Православна енциклопедија“, во издание на Руската православна црква, а под редакција на патријархот московски и на цела Русија, г. г. Кирил.


На свеченоста организирана од Универзитетот „Свети Кирил и Методиј“ и Амбасадата на Руската Федерација во Скопје, беше истакнато дека „Православната енциклопедија“ е специјализирано информативно издание со две задачи - да даде сеопфатна информација од двеилјадигодишната историја до информација за современата состојба на православната ехумена, како и да ги запознае читателите со другите христијански конфесии и нехристијанските религии, а исто така со природните науки, културни, филозофии, уметности, политики повеќе или помалку поврзани со религијата. Особено внимание енциклопедијата посветува на црковниот живот во 20 век.

Во обраќањето пред присутните претставници на МПЦ, на Министерството за култура, на Владата на Руската Федерација, Амбасадата на Руската Федерација во Македонија, на Православната енцикопедија, универзитетски професори и други гости, ректорот на Универзитетот „Свети Кирил и Методиј“ Велимир Стојковски потсети на блиските врски на братските народи на Македонија и на Русија, кои ги споделуваат заедничката православна традиција, заедничката култура и заедничките цивилизациски вредности.

Стојковски, кој денеска беше именуван за одговорен редактор за делот на енциклопедијата посветен на Македонија, истакна дека тоа е од огромно значење за државата од научен аспект, оттаму што станува збор за капитално дело што веројатно ќе има повеќе од 60 тома.

- Динамиката за истражување во таа област е веќе утврдена така што на истражувањата предвидени за одредницата „М“ ќе бидат посветени седум месеци, додека за буквата „О“ каде спаѓа Охрид и Охридската архиепископија, повеќе од една година, рече Стојковски појаснувајќи дека во тој проект ќе бидат вклучени сите субјекти и автори што имаат научни публикации и познавања од односната проблематика.

Михаил Швидкој, специјалниот претставник на рускиот претседател за меѓународна културна соработка, од своја страна забележа дека „Православната енциклопедија“ е можеби најголемиот научен проект во последните 50 години, дело со исклучителна важност не само за Русија и за православните земји, туку за светот воопшто.

- За секој човек од Русија престојот во Охрид претставува особена чест, оттаму што тоа е местото на изворите на православието, местото каде твореше Климент кој на целиот православен свет му го подари кириличното писмо. Токму затоа православната енциклопедија ја донесовме тука во Охрид, истакна Швидкој.

Поглаварот на МПЦ, архепископот охридски и македонски, г.г. Стефан од своја страна истакна дека презентирањето на „Православната енциклопедија“ во Охрид е историски настан, настан што веројатно ќе даде нови импулси на соработката, како на Руската Федерација и Република Македонија, така и на Руската православна црква и Македонската православна црква – Охридска архипепископија.

- Слушнавме до каде се подготвени томовите, 38 досега, а ќе следат и томовите во кои ќе се обработуваат теми на буквите „М“ и „О“, во кои посебно место ќе имаат Македонија, МПЦ, Охрид, нешто што ќе го потврди и вековното пријателство и врските меѓу рускиот и македонскиот православен народ и секако нешто што ќе ја прикаже вистината за црквата во Македонија, нејзините корени, животот во овие 20 христијански векови, а секако свое место ќе најде и актуелниот живот и статус на МПЦ, рече г.г. Стефан.

Директорот на „Православната енциклопедија“, Сергеј Кравец, истакна дека му претставува голема чест што е тука да ја претстави енциклопедијата, како што рече, „во земјата во која христијанството и православието живее уште од апостолските времиња, земја која ни е многу драга и која ја чувствуваме како наша родна“.

- Престојувајќи тука потполно јасно разбирам зошто изворите на православието во Русија се поврзуваат со убавина. Во Русија се чувствуваат врските кои ги спојуваат двете држави, а тоа што „Православната енциклопедија“ сега е тука, тоа не значи дека таа ќе биде само дел од библиотеката на Универзитетот „Свети Кирил и Методиј“, туку основа за нашата идна, верувам плодна соработка, рече Кравец.

Според него, засега е предвидено е во томот на енциклопедијата за буквата „М“ за Македонија да бидат посветени сто статии и текстови, со забелешка дека е отворен просторот за дополнување и на веќе објавените изданија со текстови, за што е потребна активна вклученост на македонските истражувачи.

„Православната енциклопедија“ во Русија претставува научен центар, на чие печатено и електронско издание работат како редовно вработени сто автори, со повеќе од илјада автори како надворешни соработници. Институцијата „Православна енциклопедија“ е основана во 1998 година со одлука на претседателот на Руската Федерација и на тогашниот патријарх московски и на цела Русија, Алексеј Втори, како истражувачки центар во кој се обединети сите ресурси што ги поседуваат науката, државата и црквата.


YouTube video

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Судбина

Четири мечки до смрт растргнале мајка и ќерка – со ДНК анализа е утврден ужасот на нападот

Трагично пешачење во канадската покраина Британска Колумбија заврши со смртта на мајка и нејзината ќерка, кои беа нападнати од четири гризли мечки. 

Четири мечки до смрт растргнале мајка и ќерка – со ДНК анализа е утврден ужасот на нападот

Истражителите користеа ДНК анализа за да потврдат кои животни стојат зад ужасниот напад, а експертите се сомневаат дека жените биле плен, што го прави овој случај особено редок, објави Би-Би-Си.

Џенифер Балкарас (48) и нејзината 20-годишна ќерка, Села Рид, отидоа на кратко попладневно пешачење на почетокот на ноември во областа Вајт Касл во западна Канада. Кога не се вратија дома, нивното семејство пријави дека се исчезнати.

Потрагата заврши трагично. Телата, или поточно останките, на двете жени беа пронајдени во близина на планинарска патека, на околу 150 метри оддалеченост.

По нападот, истражителите зедоа примероци од ДНК од животните за кои се сомневаше дека учествувале во трагедијата. Резултатите потврдија дека четири гризли мечки - возрасна женка и нејзините три младенчиња, стари околу една година, се одговорни за смртта на мајката и ќерката.

Сите четири мечки подоцна беа еутанизирани за да се заштити јавноста, соопшти Службата за заштита на Британска Колумбија (BCCOS).

Истрагата, исто така, откри особено вознемирувачка можност - дека нападот не бил резултат на изненадувачка средба или одбранбена реакција од страна на животните, туку дека мечките ги сметале жените за плен.

„Нашата истрага, исто така, покажа дека ова веројатно бил предаторски напад, за кој можам да ви кажам дека е многу редок“, изјави инспекторот на BCCOS, Џеф Тајр, за АП.

Експертите велат дека ваквите напади се исклучително невообичаени, бидејќи мечките генерално не напаѓаат луѓе за да ги јадат.

Според проценките на Министерството за животна средина, земјиште и паркови на Британска Колумбија, во канадската покраина живеат помеѓу 10.000 и 13.000 гризли мечки. Видот е наведен како загрозен во покраината.

Средбите меѓу луѓето и гризли мечките што завршуваат со напади се релативно ретки, но ризикот се зголемува кога луѓето го изненадуваат животното или кога тоа ги брани своите младенчиња или извор на храна.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Паника среде лет: Се заканувал со бомба, па се обидел да влезе во пилотската кабина, авионот итно приземјен (ВИДЕО)

Дражавјанинот на Хондурас, Рони Александар Гомез-Алберто, кој двапати бил депортиран од Соединетите Американски Држави, бил уапсен откако наводно се обидел да влезе во пилотската кабина на авион на „Јунајтед ерлајнс“ и тврдел дека има бомба. 

Паника среде лет: Се заканувал со бомба, па се обидел да влезе во пилотската кабина, авионот итно приземјен (ВИДЕО)

Инцидентот се случил во понеделник вечерта за време на летот од Њуарк до Њу Орлеанс, а неговото однесување ги натерало пилотите да издадат предупредување за киднапирање, објави „Фокс њуз“.

Летот 2174 безбедно слета на меѓународниот аеродром „Луис Армстронг“ во Њу Орлеанс, каде што го пречекала полицијата. Гомез-Алберто подоцна бил уапсен, а Министерството за внатрешна безбедност на САД потврдило дека е обвинет за обид за влегување во пилотската кабина.

Според одделот, Службата за имиграција и царинска контрола (ICE) поднела барање за негово притворање по неговото апсење.

„На 10 ноември 2026 година, ICE поднела барање за притворање на Рони Александар Гомез-Алберто, државјанин на Хондурас кој нелегално е присутен во Соединетите Американски Држави, откако се обидел да влезе во пилотската кабина за време на летот“, изјавил портпарол на Министерството за внатрешна безбедност за „Фокс њуз“.

Според американските власти, Гомез-Алберто првпат бил уапсен во септември 2011 година откако нелегално ја преминал границата во близина на Ел Индио, Тексас. Тој бил повторно уапсен во октомври 2014 година, во близина на Колумбус, Ново Мексико. По двете апсења, тој бил депортиран од Соединетите Американски Држави.

Тој повторно бил уапсен од страна на Граничната патрола во 2019 година откако се обидел нелегално да влезе во земјата во близина на Сан Исидро, Калифорнија. Сепак, тој бил ослободен од притвор во јануари 2020 година откако судија за имиграција наредил негово ослободување во исчекување на постапката за депортација.

Локалните медиуми, повикувајќи се на Канцеларијата на шерифот на округот Џеферсон, објавија дека осомничениот е обвинет и за пренесување лажни информации за планирано палење и терористичка закана, како и за нарушување на јавниот ред.

Министерството за внатрешна безбедност конкретно изјави дека тој упатил закана со бомба за време на летот, што предизвикало тревога кај екипажот и патниците.

Јунајтед ерлајнс потврди дека авионот слета безбедно и дека полициските сили го пречекале авионот по пристигнувањето.

„Летот 2174 на „Јунајтед“ од Њуарк до Њу Орлеанс слета безбедно по инцидент во кој беше вклучен еден патник. Полицијата го пречека авионот по пристигнувањето“, соопшти компанијата.

Авионот „Боинг 737 MAX 9“ превезуваше 46 патници и шест члена на екипажот.

Портпаролот на Министерството за внатрешна безбедност изјави дека властите ќе продолжат да преземаат мерки против лицата кои се нелегално во Соединетите Држави и кои вршат кривични дела.

Тагови: авион Бомба

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Жена е прегазена за време на кражба на автомобил- разбојникот ја остави во критична состојба (ВИДЕО)

Неидентификувана жена е сериозно повредена кога разбојник ја прегазил за време на кражба на автомобил во вторник наутро (10 ноември) во населбата Бара Фунда, во западниот дел на Сао Паоло. 

Жена е прегазена за време на кражба на автомобил- разбојникот ја остави во критична состојба (ВИДЕО)

Таа претрпела тешка трауматска повреда на мозокот, морала да биде интубирана и била однесена во болницата Санта Каса.

Безбедносна камера го снимила моментот кога осомничениот разбојник се приближил до жртвата, ја презел контролата врз автомобилот и ја прегазил додека бегал, објави „Глобо“.

Злосторството се случило на улицата Хозе Крис, во близина на плоштадот Паскоал Мартинс и авенијата Маркес де Сао Висенте. Воената полиција била повикана околу 6:35 часот наутро.

Видеото го прикажува разбојникот како се приближува до жената, која штотуку излегла од аптека и влегувала во својот автомобил.

Осомничениот ја преминува улицата и се крие зад дрвја, чекајќи жената да влезе во возилото. Потоа ѝ се приближува и седнува на задното седиште.

Кога го забележува нападот, жената излегува од возилото. Разбојникот потоа седнува на возачкото седиште, но жртвата се обидува да го спречи грабежот. Следува физичка пресметка, при што мажот ја турка. Таа паѓа и ја удира со главата на земја. Потоа крадецот го става автомобилот во рикверц и ја удира со својот автомобил.

Луѓето на блискиот паркинг се обидуваат да го спречат да избега, викајќи му да застане, но осомничениот успева да избега со автомобилот.

Вработен на паркингот, кој бил сведок на инцидентот, рекол дека жената се обидела да ја зграби вратата од автомобилот за да го спречи крадецот да избега.

„Таа се обидела да ја повлече вратата, но тој успеал да се врати во рикверц токму кога таа ја зграбила. Потоа била фрлена назад со сета сила, ја удрила главата и ја изгубила свеста“, рекол сведокот.

Според него, луѓето на местото на настанот истрчале за да го спречат возачот да ја прегази жената.

„Трчавме за да не ја прегази. Малку забавил, потоа малку забрзал и скршнал, но и покрај тоа, гумата сепак ја зафатила главата. Потоа продолжил да вози“, рекол сведокот.

Жената била однесена во болница со тешка трауматска повреда на мозокот и крварење од увото. Таа мораше да биде интубирана пред да биде префрлена во болницата Санта Каса во Сао Паоло.

До последното ажурирање, немаше информации за тоа каде се наоѓа крадецот и украдениот автомобил.

Тагови: автомобил разбојник

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер