Промовиран Регионалниот феминистички туристички водич „Откривајќи ја нејзината историја“ - Канал 5

Македонија

Промовиран Регионалниот феминистички туристички водич „Откривајќи ја нејзината историја“

По повод Меѓународниот ден на жената – 8 Март, во Скопје се одржа промоцијата на Регионалниот феминистички туристички водич „Откривајќи ја нејзината историја“.

Промовиран Регионалниот феминистички туристички водич „Откривајќи ја нејзината историја“

По повод Меѓународниот ден на жената – 8 Март, во Скопје се одржа промоцијата на Регионалниот феминистички туристички водич „Откривајќи ја нејзината историја“, проследена со промотивна тура низ неколку значајни локации од женската историја и културното наследство на градот. Настанот започна на Фонтаната „Лотос“ во Градскиот парк, од каде учесниците ја започнаа прошетката низ дел од локациите опфатени во Водичот, слушајќи ги приказните за жените и нивниот значаен придонес во општествениот, културниот и историскиот развој на нашата држава.

Регионалниот водич „Откривајќи ја нејзината историја“ мапира и претставува значајни локации поврзани со женската историја во Скопје, Белград и Тирана, со цел да се понуди на младите простор да истражуваат, да ја запознаат својата историја и да го афирмираат придонесот на жените во јавниот и општествениот живот, да се залагаат за нивна видливост во јавниот простор. Водичот е резултат на истражувачка и креативна работа на млади луѓе од Северна Македонија, Србија и Албанија, кои во изминатиот период, преку низа работилници, менторски сесии и истражувања, ги идентификуваа и разработија приказните поврзани со значајни жени, историски настани и места од културното наследство на трите главни градови.

Истовремено, иницијативата ја нагласува и пошироката историска перспектива дека борбата за женските права и феминизмот не се увезени концепти, туку имаат длабоки корени и на овие простори. Во различни историски периоди, многу жени од регионот активно учествувале во политичкиот, образовниот, културниот и општествениот живот, придонесувајќи за развојот на општеството и за стекнувањето на правата што денес се сметаат за основни. Многу од тие приказни, сепак, останале недоволно видливи или отсутни од јавниот простор и колективната меморија.

Оттука, како што истакна раководителката на младинската програма во ХЕРА, Драгана Каровска Чемерска „Наша заедничка должност е да им оддадеме почит на овие жени и заедно со младите да создадеме видливи траги во јавниот простор кои ќе сведочат за нивното постоење и значење. Поставувањето меморијални обележја, информативни табли и други форми на јавно одбележување на локациите поврзани со женската историја претставува важен чекор кон препознавање и зачувување на ова наследство.“

Во таа насока, младите кои работеа на Водичот ги повикаа институциите на локално и национално ниво да се заложат за систематско идентификување и обележување на локациите поврзани со женското културно наследство, како и за поддршка на создавање образовни и културни содржини за младите. Овие содржини можат да се развиваат преку младинските центри, културните институции, музеите и образовните програми, со цел новите генерации да учат за жените во историјата и нивната улога во македонското општество.

„Со отворање простор за гласовите што историски биле исклучени и со градење дигитален архив на нивните искуства, создаваме феминизам што не остава никого зад себе. За мене, феминизмот значи да ја препознаеме вредноста на секој глас и да промовираме еднаквост во сите сфери на животот. Водичот ни служи како потсетник дека борбата за правата на жените и родовата еднаквост не е современа модна тенденција, туку долга и значајна историска задача што продолжува и денес.“ – истакна Марија Ѓорѓиевска, младинска активистка и дел од групата млади автори на Водичот.

Катерина Милошевска, исто така една од авторките, пак, истакна дека „Пишувањето на текстот за Пајонската свештеничка беше многу значајно искуство, бидејќи ми овозможи да ја доближам приказната за една жена од античкиот свет до денешната публика и да поттикнам размислување за улогата на жените во историјата.“

„Целиот проект беше навистина незаборавно и едукативно искуство кое на некој начин го смени мојот однос кон градот. При истражувањето научив нешта за сопствената историја на кои никогаш досега не сум обрнала внимание, и како резултат се чувствувам по зближена со моите женски предци и погорда на жените кои се избориле да го направат Скопје тоа што е денес, без разлика колку нивниот труд бил забележан или прославен.“ – изјави Мила Димитровска, една од младите авторки на Водичот.

Ирене Кетоф, аташе за соработка при Француската амбасада во Република Северна Македонија, изјави дека „станува збор за конкретен резултат од проектот BOOST, најголемата програма за поддршка на граѓанското општество во Западен Балкан финансирана од Француската агенција за развој (Agence Française de Développement). Токму преку вакви проекти се истакнува колку е важно е да се вреднува локалното наследство создадено од жени и за жените.“

Во рамки на промотивната тура во Скопје беа посетени четири локации од Водичот: Фонтаната „Лотос“, меморијалниот парк и основата на неодамна украдената биста на народната хероина Вера Јоциќ, скулптурата „Пајонска свештеничка“ на пешачкиот мост „Око“ и Паркот „Жена Борец“. На секоја од овие локации, младите автори на Водичот ги презентираа резултатите од своето истражување и ги споделија приказните за жените и историските процеси поврзани со овие места, потенцирајќи ја нивната улога во создавањето на културниот и општествениот идентитет на градот. Од меморијалниот парк на Вера Јоциќ, младите гласно упатија барање за обновување на споменикот и покажување одговорност и грижа од страна на институциите.

Промотивната тура во Скопје е дел од регионалната промоција и тура што се реализира од 6 до 10 март во Тирана, Скопје и Белград, со цел да се промовира феминистичкото културно наследство, регионалната соработка и активната улога на младите во неговото истражување, интерпретација и афирмација.

Настанот се организираше во рамки на проектот „Откривајќи ја нејзината историја: Зајакнување на младите и зачувување на феминистичкото наследство“ (Uncovering HERstory: Empowering Youth and Preserving Feminist Heritage), имплементиран од ХЕРА – Асоцијација за здравствена едукација и истражување, во партнерство со Center for Population Policies and Sustainable Development – IPPF Србија и ACPD Албанија, со поддршка од Европската асоцијација за локална демократија (ALDA), во рамки на BOOST програмата.

Проектот ги зајакна младите како истражувачи и промотори на културното наследство, поттикна регионална соработка и дијалог, и придонесе кон поголема видливост на женската историја во јавниот простор и во културните политики, се наведува во соопштението.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Најубавата жена во поранешна Југославија позираше во бикини (ФОТО)

Ана Сасо, поранешната Мис Југославија, објави нови фотографии од летниот одмор на својот Инстаграм профил.

Најубавата жена во поранешна Југославија позираше во бикини (ФОТО)

Фотографиите на кои 63-годишната позира во костим за капење привлекоа големо внимание.

Позираше на плажа

Сасо сподели неколку опуштени сцени од нејзиниот одмор, направени на плажа и карпи покрај морето. На некои фотографии таа носи класично црно бикини, додека на други позира во шарен дводелен костим за капење со портокалови детали.

Фотографиите ги воодушевија нејзините следбеници. „Најубавата“, „Незаменлива“ и „Кралица“, ѝ пишуваат. Ана Сасо стана позната со победата на натпреварот за Мис Југославија во 1982 година, а култната реклама за сокот Пипи ѝ донесе дополнителна популарност денес.

Приватен живот и трет брак

Покрај кариерата, нејзиниот приватен живот со години привлекува и внимание од јавноста. Таа ја пронајде среќата во третиот брак со хирургот Хрвоје Томасовиќ, со кого сега живее во Самобор. Двојката се венчала во тајност, а Сасо откри дека се венчала во 2021 година. Таа во неколку наврати изјавила дека била исполнета и задоволна во тој брак.

Пред Томасовиќ, Ана Сасо била во брак со покојниот сплитски угостител Ненад Бар Теклиќ. Нивниот брак траел приближно пет години. После тоа, се омажила за Игор Франчески, со кого исто така била во брак пет години.

Извор: Индекс.хр

Тагови: Југославија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Автомобилизам

Што ако ставите погрешно гориво во резервоарот?

Ставањето погрешно гориво во резервоарот е една од оние грешки што може да му се случат на секого.

Што ако ставите погрешно гориво во резервоарот?

Потребни се само замор, брзање или момент на невнимание, а последиците можат да се движат од релативно безопасни до многу скапи.

Најчеста грешка е налевањето бензин во дизел автомобил, а причината е едноставна: дизел „пиштолите“ на бензинските пумпи обично се пошироки од бензинските, па затоа е многу потешко да се направи спротивната грешка.

Ако веднаш сфатите што сте направиле, најважното правило е едноставно: не го палете автомобилот и не го вклучувајте контактот.

Зошто бензинот е проблем за дизел моторот?

Дизел горивото, покрај тоа што се користи за согорување, игра важна улога и во подмачкувањето на одредени делови од системот за вбризгување. Бензинот нема исти својства за подмачкување, па затоа неговото влегување во дизел системот може да предизвика проблеми со пумпата под висок притисок.

Ако моторот се запали, мешавина од бензин и дизел почнува да циркулира низ системот. Пумпата може да почне да работи со недоволно подмачкување, што доведува до абење на металните површини и формирање на мали метални струготини.

Проблемот е што овие струготини потоа можат да стигнат до системот за вбризгување и да ги оштетат млазниците. Кај современите дизел мотори, поправките можат да бидат многу скапи и да вклучуваат пумпа, млазници, цевки и други компоненти на системот за гориво.

Затоа, многу е подобро да се реши проблемот пред автомобилот дури и да ја напушти бензинската пумпа.

Што ако веќе сте наполниле бензин?

Ако ја забележите грешката додека сè уште полните гориво, веднаш застанете. Не обидувајте се да го „разредете“ бензинот со додавање дизел и да продолжете да возите, особено со модерни дизел мотори.

Потребно е да го испразните резервоарот и, доколку е потребно, да го испразните системот за гориво. Најбезбедно е да повикате помош на патот или услуга што се занимава со испумпување на неправилно наполнето гориво.

Исто така е важно да не го „вклучувате“ автомобилот. Кај некои автомобили, самото вклучување на контактот може да ја активира пумпата за гориво и да започне циркулација на погрешно гориво низ системот.

Ако веќе сте го запалиле автомобилот, не паничете, туку запрете го на безбедно место што е можно поскоро и исклучете го моторот. Колку подолго работи автомобилот и колку подолго возите, толку е поголема можноста горивото да поминало низ целиот систем за вбризгување.

Пет работи што треба да ги направите

1. Престанете со полнење гориво штом ќе ја забележите грешката.

2. Не го палете моторот и не го вклучувајте контактот.

3. Известете ги вработените во пумпата и, доколку е можно, поместете го автомобилот туркајќи го без да го запалите моторот.

4. Повикајте помош на патот или сервис кој може да го испразни и исчисти системот доколку е потребно.

5. Ако веќе сте возеле, веднаш запрете го автомобилот на безбедно место и исклучете го моторот.

Најважно е да реагирате брзо. Ако погрешно гориво остане во резервоарот и автомобилот не запали, проблемот обично се сведува на празнење и чистење на системот. Ако автомобилот запали и погрешно гориво почне да циркулира, потенцијалната сметка за поправка може да биде многу пати поголема.

Затоа, ако ви се случи ваква грешка, нема потреба од паника, но потребно е едно: не го палете автомобилот.

Извор: Б92

Тагови: гориво резорвоар

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Технологија

Новото ажурирање на „Windows 11“ предизвикува хаос на компјутерите

Компанијата со седиште во Редмонд започна истрага за да идентификува и поправи проблем со неодамнешното ажурирање.

Новото ажурирање на „Windows 11“ предизвикува хаос на компјутерите

Според извештајот на „Windows Latest“, неодамнешното ажурирање на „Windows 11“ се чини дека предизвикува сериозни проблеми на некои компјутери. Ажурирањето предизвикува паѓање на игрите, грешки при најавување, проблеми со прикажување на екранот, паѓање на системот и друго.

Закрпата „KB5121003“ за „Windows 11“ беше задолжително ажурирање објавено на 11 август. Тоа беше главното безбедносно ажурирање на оперативниот систем за август и, како такво, поправи над 400 безбедносни недостатоци. Сепак, се чини дека воведе и голем број нови проблеми.

Ова е особено забележливо во гејмерската заедница. Има нагло зголемување на извештаите за неочекувани паѓања на игрите откако се инсталираше ажурирањето. „ARC Raiders“ и „The Finals“, обете од „Embark Games“, се чини дека се особено погодени. Се чини дека ажурирањето ја наруши компатибилноста со одреден драјвер.

„Embark“ работи на поправка за своите игри, иако не е дадена временска рамка. Во меѓувреме, им советува на корисниците да ја отворат командната линија на „Windows“ и да го оневозможат драјверот. Ова е подетално опишано во извештај од „PC World“. Исто така е можно целосно да се избрише закрпата во поставките за Историја на ажурирања. Сепак, ова би ги изложило корисниците на претходно споменатите безбедносни недостатоци.

„Microsoft“ одговори на проблемот, но сè уште не објави план за негово решавање. Компанијата започна истрага и ги охрабрува корисниците да го контактираат Центарот за повратни информации доколку се соочат со какви било тешкотии.

Извор: Б92

Тагови: Windows 11

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер