Култура

Продолжуваат археолошките истражувања на Врбјанска Чука

Годинава се изведува десеттата археолошка кампања на локалитетот Врбјанска Чука, која е резултат на континуираната соработка меѓу Центарот за истражување на предисторијата и Завод и музеј – Прилеп.

Целта на ова мултидисциплинaрно истражување, во кое се вклучени и бројни европски институции, е темелно разбирање на неолитската населба на локалитетот и неговото подоцнежно функционирање во антиката и средниот век.

Во текот на овогодишното истражување кое се реализира во август, како што посочуваат од Центарот за истражување на предисторијата, проучувањата се насочени кон прецизно дефинирање на една од масивните неолитски градби детектирани при геофизичкото скенирање и преку ископувањето во северниот дел на археолошката сонда.

Овој неолитски објект импресионира со своите димензии, но исто така и со архитектонските обележја и материјалната култура откриена во него. Станува збор за комплексна градба која има долготрајно користење, потврдено преку повеќето обновувања во рамки на нејзиниот габарит. Во неа присутни се неколку глинени структури (сандаци), извонредно сочуван компактен под, како и неколку садови сликани со импресивни орнаменти карактеристични за Пелагонија. Интересно е што дел од овие садови имаат сликање досега единствено познато во Источна Македонија и дополнително ја потврдува комуникацијата и трговијата меѓу овие два региони во неолитот. Покрај садовите, во рамки на овој објект, но и во неговата околина, откриени се и бројни остатоци од фигурини, антропоморфни модели на куќи, жртвеници, камени секири, кремени алатки, кугли за праќа итн.

Паралелно со археолошките ископувања, се вршат и археоботанички анализи со стручњаци од Германскиот археолошки институт и Универзитетот во Белград, а во теренската работа учествуваат и студенти од Универзитетот во Базел, Универзитетот „Гоце Делчев“ и Универзитетот „Кирил и Методиј“. На овој начин се потврдува интересот на странските институции, но и на младите студенти, за континуирани мултидисциплинарни истражувања и едукации кои непрестано се одвиваат во изминатите десетина години. Како резултат на оваа плодна децениска соработка меѓу Центарот за истражување на предисторијата, Завод и музеј – Прилеп и бројни европски универзитети, во септември ќе се реализира јубилејна изложба во Завод и музеј – Прилеп, а во која ќе се претстават досегашните сознанија за археолошкиот локалитет Врбјанска Чука.

Исто така, и оваа година теренските истражувања на Врбјанска Чука традиционално се завршуваат со концерт на тумбата. Оваа година ќе настапи џез составот Next to Silence, кој за првпат ќе изведе дел од својот репертоар во анплагд издание. Концертот е дел од континуираната соработка меѓу Прилепскиот џез викенд, Центарот за истражување на предисторијата и Завод и музеј – Прилеп, кој пак овозможува поинаква перспектива на овој археолошки локалитет. Овој настан придонесува кон поголемо акцентирање на предисториското културно наследство, но и за афирмирање на локaлитетот како можна туристичка одредница која ќе ги истакне културните потенцијали на Врбјанска Чука и Пелагонија, наведуваат од Центарот за истражување на предисторијата.

Тагови: археолошко икопување

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

48. Традиционален илинденски коњички марш – коњаниците повторно тргнуваат од Горно Лисиче кон Крушево

Општина Аеродром ги поканува граѓаните да присуствуваат на свеченото испраќање на учесниците на 48. Традиционален Илинденски коњички марш, што ќе се одржи во пресрет на одбележувањето на големиот државен празник – 2 Август, Илинден.

Општина Аеродром ги поканува граѓаните да присуствуваат на свеченото испраќање на учесниците на 48. Традиционален Илинденски коњички марш, што ќе се одржи во пресрет на одбележувањето на големиот државен празник – 2 Август, Илинден во организација на Здружението на граѓани „Илинденски марш 1978“.

На 27 јули (понеделник), со почеток во 18:00 часот, од дворот на црквата „Св. Петар и Павле“ во Горно Лисиче, околу 40 коњаници, меѓу кои и пет девојки, ќе тргнат кон Крушево, продолжувајќи ја речиси петдецениската традиција посветена на чествувањето на Илинден и на македонските херои.

На 31 јули, коњаниците од Горно Лисиче ќе се обединат со учесниците од Свети Николе, Кичево и Битола, испраќајќи силна порака за единство, почитување на традицијата и зачувување на македонското историско наследство.

Општина Аеродром упатува покана до сите граѓани да бидат дел од свеченото испраќање и заедно да им оддадеме почит на илинденците, чија жртва и идеали и денес претставуваат симбол на слободата, единството и државноста на Македонија.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Николовски: Постигнат е договор со Швајцарија, Хрватска и Романија , а во тек се преговори и со други земји

Министерот за транспорт Александар Николоски, утринава изјави дека преговорите за решавање на проблемите на македонските превозници поврзани со воведувањето на системот за единствена европска дозвола

Министерот за транспорт Александар Николоски, утринава изјави дека преговорите за решавање на проблемите на македонските превозници поврзани со воведувањето на системот за единствена европска дозвола се одвиваат билатерално со секоја земја одделно и засега постигнат е договор со Швајцарија , Хрватска и Романија , а во тек се преговори и со други земји

Тагови: Александар Николоски

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Фудбал

Емотивни сцени по елиминацијата на Англија: Дејвид Бекам не можеше да ги сокрие солзите и разочарувањето

Легендарниот англиски фудбалер Дејвид Бекам тешко го поднесе поразот на англиската репрезентација во полуфиналето на Светското првенство; Аргентина победи со 2–1 по драматичен пресврт.

Бекам го следеше натпреварот на стадионот во Атланта во друштво на сопругата Викторија Бекам и нивните деца Ромео, Круз и Харпер, како и девојката на Круз, Џеки Апостел. По последниот свиреж, на лицето му се гледаше длабоко разочарување, додека тој и Викторија, во неверување, си ги држеа главите со рацете.

Англија поведе во 55-тата минута со голот на Ентони Гордон, што предизвика воодушевување кај навивачите, но славјето беше краткотрајно. Аргентина направи целосен пресврт кон крајот на натпреварот и, со головите на Енцо Фернандез и Лаутаро Мартинез, си обезбеди место во финалето.

Особено емотивен момент се случи по завршувањето на натпреварот, кога синот на Дејвид, Круз, му пријде на својот татко и се обиде да го утеши со прегратка. За разлика од претходните натпревари, Викторија Бекам овој пат не ги криеше своите емоции. По водечкиот гол на Англија, таа му скокна во прегратка на сопругот и заедно со него го прослави погодокот.

Нејзината реакција привлече внимание и поради тоа што пред неколку дена таа беше предмет на бројни коментари на социјалните мрежи. Тогаш, многумина забележаа дека таа останала прилично воздржана за време на четвртфиналниот натпревар по голот на Џуд Белингем, а Дејвид Бекам подоцна се пошегува на нејзина сметка, велејќи дека таа „славела во себе“.

Тагови: Дејвид Бекам

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.