Македонија

Продолжува вербална војна меѓу Вреди и Таравари

Нема место во Владата за оној што сака да соработува со ДУИ и Ахмети.

Ова според Биљал Касами било усогласено на средбата меѓу тројцата лидери на Вреди и премиерот Мицкоски што се одржа во Владата пред два дена. Според Касами, премиерот Мицкоски имал разбирање за ваквата нивна позиција и како што кажа, во следните денови очекува да бидат преземени конкретни чекори во овој правец. Лидерот на БЕСА вели дека во Вреди како и дел од членството и функционерите од Алијанса не се согласуваат со потезите на Таравари и сакаат партијата да остане во коалицијата, но без оние кои отворено говорат дека ќе соработуваат со ДУИ.

-Соработка со ДУИ и Али Ахмети и останување во ВРЕДИ и во Влада не може. Тоа го кажавме јасно како пораки пред премиерот и се договоривме и усогласивме со него дека во оваа фаза кога владата работи за справување со корупцијата од претходните влади, не можеме да прифатиме да има членови во владата кои соработуваат со вакви елементи. Затоа договоривме дека секој кој соработува со ДУИ и со Али Ахмети нема место во Владата. Сигурно дека во следните денови ќе има и конкретни чекори во овој правец, изјави Касами.

Таравари да се одлучи на кое столче ќе седи очекуваат и од третиот коалициски партнер ЗНАМ. Партискиот лидер Максим Димитриевски уверува дека владината коалиција била стабилна како никогаш досега, а доколку се утврди дека Таравари соработува со ДУИ, тогаш според ЗНАМ, нему не му е местото во Владата.

Прашан дали СДСМ би коалицирала со Таравари или ДУИ на претстојните локални избори, лидерот на СДСМ Филипче остава отворена врата за соработка со сите политички партии, но сега, како што рече, партијата внимателно ќе ги бира своите партнери, поучени од претходното искуство со коалицијата со ДУИ која според него сериозно го нарушила имиџот на партијата. СДСМ е подготвена и за предвремени парламентарни избори доколку дојде до нив, изјави Филипче кој даде оценка и за состојбите во владината коалиција

-Тоа што се случува во владејачката коалиција укажува дека единствено што ги води се теснопартиските и бизнис интереси, а не вредности. Осудени се на неуспех, прашање на време е кога ќе се распадне. Како ќе се одвиваат работите тоа не е наша работа. Ќе разговараме со сите политички партии меѓутоа принципите на коалиција значат дека коалиционите партнери прво треба да се почитуваат, понатаму да се целосно согласни околу програмите кои ќе ги ветиме на граѓаните, односно имплементираме научени лекции од претходните коалиции кои на некој начин го оштетија имиџот на СДСМ – одговори лидерот на опозицијата.

Мицкоски се сретна со коалициските партнери од Вреди ден по неговата тет а тет средба со Таравари која заврши без епилог, со најава дека разговорите ќе продолжат до крајот на месецов до кога биде познато какво ќе биде идното функционирање на Алијанса за Албанците, иако според многумина извесно е дека Таравари е со едната нога надвор од Владата.

Тагови: Арбен Таравари ВРЕДИ

Живот

Британија сака да го намали бројот на илегални мигранти од Западен Балкан

Велика Британија ќе ги засили своите напори во борбата против криминалните мрежи од Западен Балкан кои овозможуваат илегални миграции, изјави синоќа премиерот Кир Стармер.

Велика Британија ќе ги засили своите напори во борбата против криминалните мрежи од Западен Балкан кои овозможуваат илегални миграции, изјави синоќа премиерот Кир Стармер, неколку дена откако најави голем број реформи кои ќе помогнат во намалување на миграциите.

Во својата прва официјална посета на Албанија, Стармер ќе најави мерки за спречување на враќањето на албанските државјани во Британија откако ќе бидат депортирани и ќе стори повеќе за искоренување на перењето пари меѓу двете земји. Тој исто така ќе донира два уреди за откривање фалсификати со цел полесно да се препознаат оние кои користат лажни пасоши.

Тој исто така ќе најави проширување на заедничката работна група за миграции со додавање на Македонија и Црна Гора. Групата инаку веќе ги вклучува Албанија и Косово.

Во 2022 година, Албанците беа најбројни мигранти во Британија, но бројот оттогаш нагло се намали, делумно поради договорот за депортација што го склучи претходната конзервативна влада.

Што се однесува до легалните миграции, кои го сочинуваат најголемиот дел од оние кои доаѓаат во Британија, Стармер претходно оваа недела вети значително намалување на нето-приливот, истакнувајќи дека земјата без построги правила ризикува да стане „остров на странци“.

Тагови: Велика Британија Западен Балкан

Регион

Инцидент меѓу демонстрантите и полицијата на влезот на судот во Нови Сад

Пред зградата на судот и обвинителството во Нови Сад утрово се собраа голем број граѓани и студенти, кои бараат ослободување на активистите на организацијата СТАВ и ПСГ, кои веќе два месеци се во притвор во затворот на Клиса.

Пред зградата на судот и обвинителството во Нови Сад утрово се собраа голем број граѓани и студенти, кои бараат ослободување на активистите на организацијата СТАВ и ПСГ, кои веќе два месеци се во притвор во затворот на Клиса, а на кои во вторникот на 13 мај им беше продолжен притворот за уште 30 дена.

На задниот влез на зградата, 50-тина вработени се обиделе да влезат во зградата, и таму се собрала исто така група граѓани, јави Н1. Тука дошло до инцидент, односно туркање меѓу припадниците на интервентната единица на полицијата, која се обидела да им овозможи на вработените да влезат, и собраните граѓани. Кога интервентната единица не успеала да им овозможи на вработените во судот да влезат, на помош им пристигнал голем број припадници на жандармеријата.

На граѓаните кои биле во првите редови им бил фрлен солзавец или бибер спреј, изјави за Н1 една студентка.

Еден граѓанин преку мегафон ѝ викал на полицијата: „Немој на голорак народ, што правите, не на мирни граѓани“.

Граѓаните извикувале „Србија“ и „Пуштете ги сите“. Една студентка преку мегафон ги предупредила граѓаните дека пристигнува полициско засилување, кое ќе им пријде на граѓаните од грб, што предизвикало немир меѓу собраните.

Шестмина активисти и студенти на опозициското Движење на слободни граѓани (ПСГ) и организацијата Студенти против авторитарна власт (СТАВ) се во притвор веќе 60 дена откако се обвинети за обид за уривање на уставниот поредок, а судот во вторникот им го продолжи притворот за уште 30 дена.

Уште шестмина активисти на СТАВ се товарат за исто дело, а тие во моментот на апсењето се наоѓале во странство, каде што се и денес.

Сите се обвинети врз основа на аудио снимка од незаконски прислушуван разговор, кој беше емитуван на режимските телевизии на 14 март. Бранителите на обвинетите во повеќе наврати тврдеа дека Безбедносно-информативната агенција (БИА) разговорот го прислушувала незаконски и додадоа дека аудио снимката не може да биде правно валиден доказ во тој процес.

Тагови: Нови Сад

Свет

Видео: Најмалку 21 лице загина во сообраќајка во Мексико

Најмалку 21 лице загина во сообраќајна несреќа на автопатот што ги поврзува мексиканските држави Оахака и Пуебла, соопшти висок мексикански државен службеник.

Во објава на социјалните мрежи, министерот за внатрешни работи на Пуебла, Самуел Агилар, напиша дека во несреќата учествувале три возила и дека има многу повредени луѓе.

Мексиканскиот весник Ла Хорнада јави дека смртоносната несреќа се случила кога камион што превезувал цемент се обидел да претекне друго возило пред да премине во спротивната лента и да удри во автобус, а потоа челно се забил во комбе. Камионот мешалка по сударот паднал во бездна и се запалил.

#Puebla | Suman al menos 20 muertos tras accidente en la carretera #Cuacnopalan-Oaxaca.

▪️ En el incidente estuvieron involucrados un autobús de pasajeros de la línea AU, una camioneta de transporte de personal y una pipa. pic.twitter.com/Q8DVHJgXn2
— El Mensajero de Puebla (@MensajeroPuebla) May 14, 2025

Несреќата се случила на кривулести, стрмни патишта во оддалечените делови на Мексико, каде што сообраќајните несреќи се чести. Во март, најмалку 11 лица загинаа кога автобус се преврте во Оахака. Пред две години загинаа 29 лица откако автобус падна во бездна во јужните делови на Мексико.

Тагови: Мексико сообраќајка