Во врска со носењето на новиот Кривичен законик, претседателката на Либерално-демократската партија (ЛДП) и пратеничка во Собранието, Моника Зајкова, повика на правда и изјави дека ставовите на ЛДП се конзистентни во недавањето поддршка на измените на Кривичниот закон, затоа што сѐ уште сведочиме на застарување на случаите со корупција во највисоките ешалони во власта.

„Но најтрагично е што во политиката кога некој ги критикува грешките на претходникот, а потоа доаѓа и истите грешки ги усовршува, наместо да ги поправи и затоа бевме сведоци на носење на уште покатастрофален Кривичен законик од тој кој што претходно се донесе, а за кој што ЛДП повторно алармираше дека е навистина лош. Но колегите од мнозинството нѐ убедуваат дека тоа е еден супер закон, за на крај пак да добиеме ‘шамар’ од Брисел, дека во тој поглед не ги исполнуваме условите, ама со тоа секојдневно народот губи пари. Како што за Изборниот закон изгуби 4 милиони евра, за неспроведување на другите реформи губи 170 милиони. И сега кој ќе ја понесе одговорноста тука?“, праша Зајкова во своето гостување на Вести Плус на Канал 5.

На прашање од новинарот за можните парламентарни избори напролет, претседателката Зајкова посочува дека ЛДП е подготвена да настапи на предвремени парламентарни избори.

„Зошто го велам ова самоуверено и со насмевка? Затоа што верувам во нашите предлози и знам дека 80% од граѓаните ги поддржуваат нашите предлози и за отворени листи, зад кои што не ќе може да се крие одговорноста. Таму има директно име и презиме на избраниот претставник; 80% од граѓаните поддржуваат да се укинат банкарските провизии, бидејќи банките за сметка на своите профити ги дерат луѓето со провизии и непотребни трошоци, а државата не интервенира иако неколку пати редоследно го поднесуваме законот; 80% од граѓаните се согласни со нас дека нема потреба толку заменици директорски и министерски места; 80% се согласни дека треба да се укинат тие непотребни паушали во дел од управните одбори, за електронската нараквица за насилници и низа други предлози на ЛДП. Но она што е поразително е што големите партии а сакаат по истиот изборен модел да одиме повторно на избори. Зошто? Затоа што ваквиот изборен модел очигледно им одговара затоа што земаат најмногу пари согласно ваквиот изборен модел, за да секојдневно слушаме разноразни соопштенија од кои што цревата веќе ни се превртуваат“, вели претседателката Зајкова.

Неодамнешниот избор на Моника Зајкова за потпретседател на Парламентарното собрание на ОБСЕ е важен за градење на влијанието, односно презентирање на позициите на Македонија како клучен регионален конструктивен фактор, наметнување на наши идеи, помош на наши експерти да се вклучат повеќе во работата на институциите на ОБСЕ и давање на приоритет не само на Македонија, туку и на целиот Западен Балкан.

„Изборот за потпретседател на Парламентарното Собрание на ОБСЕ пред сѐ, мислам дека е национална гордост, не само лична. Македонија никогаш немала на оваа позиција свој човек. Немал ни Западниот Балкан. Последен пат тоа бил Кривокапиќ од Црна Гора, во 2000-та година. Така што е навистина голем успех, а посебно го прави успехот тоа што оваа функција не се добива со именување или назначување, туку по пат на непосредни избори во кои што гласаат делегации од 57 парламенти, каде што и Светата Столица има свое почесно место. Затоа и има поголема тежина бидејќи јас бев во трка со уште седум противкандидати, така што мене навистина ми значи извојуваната победа“, вели Зајкова.

Зајкова дополнува дека сите горливи прашања кои што ги мачат македонските граѓани таму можат да бидат поставени како еден од приоритетите на бордот во опсег на кој што ќе се разгледуваат.

„Многу е важно да се држи високо темата за одредени држави, бидејќи гледаме како секогаш одредени држави си ги позиционираат своите агенди во меѓународните институции. Затоа е важно и Македонија да се позиционира постојано и да биде во фокус на агендата на ваквите институции“, завршува претседателката на ЛДП, Моника Зајкова.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Јужна Кореја планира да донесе посебен закон со кој законски ќе ја потврди својата посветеност на политиката на неширење нуклеарно оружје, додека истовремено продолжува со програмата за изградба на подморници на нуклеарен погон, пишува агенцијата „Јонхап“, повикувајќи се на информации од јужнокорејската влада.

Нацрт-законот, кој Министерството за одбрана наскоро ќе го достави на јавна расправа, дефинира пет основни принципи за државниот проект за подморници на нуклеарен погон.

Со неговото усвојување, Јужна Кореја за првпат во своето законодавство би вовела експлицитна забрана за развој и поседување нуклеарно оружје.

Според предлогот, на владата би ѝ било забрането да развива, произведува, поседува или користи нуклеарно оружје. Забраната би се однесувала и на сите активности со нуклеарни материјали наменети за оружје, како и на постапки што би го прекршиле глобалниот систем за неширење на нуклеарното оружје.

Законот, исто така, има за цел да ги ублажи загриженоста и сомнежите – првенствено во САД – дека работата на Јужна Кореја на подморници на нуклеарен погон би можела да доведе до развој на сопствено нуклеарно оружје. Тој исто така ги потврдува обврските на Јужна Кореја според Договорот за неширење на нуклеарното оружје (NPT). Законот наложува соработка со меѓународни организации за време на процесот на развој на подморниците и воспоставува строги безбедносни мерки за заштита на јавноста и животната средина од радиоактивни материјали. Проект „Jang Bogo N“ Законот е дизајниран и да го забрза самиот проект преку овозможување изземање од обврската за изработка на прелиминарна студија за изводливост и од други слични административни барања.

Тој се однесува на јужнокорејската програма „Jang Bogo N“, чија цел е развој на напаѓачки подморници на нуклеарен погон што користат ниско збогатен ураниум.

Проектот има одобрение од САД и се заснова на договор постигнат од лидерите на двете земји на самитот одржан минатиот октомври.

Владата планира да ја лансира првата подморница во средината на 2030-тите години, а целосното оперативно распоредување се очекува во втората половина од таа деценија.

Иако не се објавени официјални технички детали, извори од одбранбениот сектор укажуваат на планови за изградба на три подморници од класата со депласман од 8.000 тони.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Во Македонија во моментов нема поголеми инвестиции во овој сектор, освен најавениот проект за рудник за бакар во Иловица, а учеството на рударството во индустриското производство постојано се намалува.

Шведските власти објавија дека интензивно работат на планови за зајакнување на рударскиот сектор.

„Одлуката треба да го олесни и забрза издавањето дозволи за нови проекти и да помогне во привлекувањето инвестиции. Шведска мора да стане водечка рударска нација. Владата има намера да ги поедностави процедурите за побрзо донесување одлуки“, изјави вицепремиерката и министерка за енергетика Еба Бош.

Таа предупреди дека зависноста од Кина претставува „системски ризик“, нагласувајќи дека новата политика може значително да ги зајакне одбранбените капацитети на Шведска, ЕУ и НАТО.

„Без ваква одлука, Владата нема конкретни алатки со кои може да го забрза развојот и да привлече инвестиции во клучните стратешки проекти“, истакна Бош.

Како што пишува „Дојче веле“, Шведска е европска рударска сила уште од 10 век, кога бил отворен големиот рудник за бакар Фалун. Во одреден период тој обезбедувал дури две третини од бакарот што се произведувал во Европа. Денес рудникот е музеј и дел од светското наследство на УНЕСКО.

Неговата улога ја презеде големиот рудник за железна руда на компанијата LKAB во Кируна, во Арктичкиот Круг. Шведска располага со околу 60% од познатите европски наоѓалишта на железна руда, а во 2021 година обезбедувала околу 90% од нејзината екстракција во Европа.

Во близина на Кируна се наоѓа и наоѓалиштето Пер Гејер, еден од водечките проекти на ЕУ за намалување на зависноста од кинески минерали. Во областа се идентификувани околу 1,2 милијарди тони минерални ресурси, меѓу кои приближно 2,2 милиони тони оксиди на ретки земни елементи.

Четири од вкупно 47 стратешки проекти на ЕУ за обезбедување критични минерали се наоѓаат во Шведска.

Во Македонија работат само четири металични рудници, од кои единствено „Бучим – Боров Дол“ произведува бакар, кој се смета за критичен минерал. Сепак, неговите капацитети постепено се исцрпуваат.

Како позначајна потенцијална инвестиција се издвојува проектот за рудник за бакар во Иловица, кој сè уште не е реализиран. Според геолошките истражувања, на локалитетот има повеќе од 700 илјади тони бакар во руден концентрат, со потенцијал за годишен извоз од над 10 илјади тони бакар.

Цената на бакарот достигнува и до 14 илјади американски долари за тон. Според новиот Тарифник за концесиски надоместоци, 4% од пазарната вредност на бакарот содржан во произведениот концентрат треба да завршува во државниот буџет. Реализацијата на проектот, според тоа, би можела да ги зголеми буџетските приходи и македонскиот извоз.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.