Пробив во Женева: САД и Украина се договорија за изменет нацрт на мировниот план, Рубио оптимист - Канал 5

Свет

Пробив во Женева: САД и Украина се договорија за изменет нацрт на мировниот план, Рубио оптимист

Соединетите Американски Држави и Украина изготвија „ажурирана и подобрена“ мировна рамка за ставање крај на војната во Украина, по вчерашните разговори одржани во Женева, се вели во заедничка изјава од Киев и Вашингтон.

Пробив во Женева: САД и Украина се договорија за изменет нацрт на мировниот план, Рубио оптимист

Двете страни се согласија да продолжат со интензивна работа на заедничкиот предлог во наредните денови и да останат во блиска координација со европските партнери, се наведува во заедничката изјава, пренесува ДПА.

„Конечните одлуки во однос на оваа рамка ќе бидат донесени од претседателите на Украина и на Соединетите Држави“, се додава во изјавата.

Разговорите во Женева беа опишани како „конструктивни, фокусирани и со почит“, покажувајќи „значаен напредок кон усогласување на позициите и идентификување на јасни следни чекори“.

„Двете страни се согласија дека консултациите беа високо продуктивни“, се вели во изјавата.

Преговарачите повторија дека секој иден договор мора да го поддржи суверенитетот на Украина и да обезбеди траен и праведен мир. „Како резултат на разговорите, страните изработија ажурирана и подобрена мировна рамка“, изјавија тие.

Украина, исто така, изрази благодарност за поддршката од САД. Двете страни наведоа дека ќе продолжат да работат заедно за да постигнат мир кој ќе гарантира „безбедност, стабилност и реконструкција“ на Украина.

Во одделно соопштение од САД се посочува дека украинската делегација потврдила дека сите нејзини главни грижи – безбедносните гаранции, долгорочниот економски развој, заштитата на инфраструктурата, слободата на навигација и политичкиот суверенитет – биле темелно разгледани за време на состанокот.

Во него се додава и дека украинските претставници изјавиле дека ревидираниот нацрт ги одразува нивните национални интереси и обезбедува „веродостојни и спроведливи механизми за заштита на безбедноста на Украина и на краток и на долг рок“.

Киев засега нема непосреден коментар.

Рубио е оптимист за ревидираниот мировен план

Американскиот државен секретар, Марко Рубио, претходно вчера изјави дека е постигнат „суштински“ напредок за време на разговорите со украинските претставници во Женева за мировниот план од 28 точки на Вашингтон, кој наиде на отпор од Киев и неговите европски сојузници.

Тој истакна дека преостанатите прашања не се „несовладливи“ и рече дека прашањата што директно ги засегаат Европа и НАТО ќе бидат разгледани одделно, со придонес од сојузничките нации.

- Искрено верувам дека ќе стигнеме до целта, додаде секретарот.

Рубио, исто така, го ублажи претходно предложениот краен рок за прифаќање од страна на Украина, истакнувајќи дека иако заклучок до четврток би бил идеален, сепак „дали ќе биде четврток, дали ќе биде петок, дали ќе биде среда, дали ќе биде понеделник следната недела, сакаме да биде наскоро“, рече тој.

Рубио во Женева се сретна со специјалниот пратеник на американскиот претседател Доналд Трамп, Стив Виткоф, зетот на Трамп, Џаред Кушнер, и Даниел Дрискол, висок функционер на Пентагон, за разговори со украинската делегација.

Украинскиот преговарач Андриј Јермак го нарече состанокот „многу продуктивен“, додавајќи дека разговорите се движат кон праведен и траен мир. Конечните одлуки, рече Јермак, ќе ги донесат претседателите на Соединетите Држави и на Украина.

Украинскиот претседател Володимир Зеленски ги пофали обновените дипломатски напори во вечерното видео обраќање, изразувајќи надеж дека разговорите ќе доведат до вистински чекори за ставање крај на конфликтот.

Разговорите во Швајцарија, во кои учествуваа и претставници од Франција, Велика Британија, Германија и ЕУ, беа набрзина организирани за да се натера САД да го преиспитаат својот последен предлог за завршување на конфликтот што се појави претходно оваа недела.

Европските сојузници на Украина го отфрлија планот во неговата првична форма, кој во голема мера ја фаворизира Русија. Документот од 28 точки ќе бараше од Киев да ѝ отстапи големи делови од територијата на Русија и да ја ограничи големината на својата војска, меѓу другите мерки.

Тагови: Женева Марко Рубио

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Од понеделник почнува примената на „Безбеден град“ во Охрид, Струга, Кичево и во Дебар

Министерството за внатрешни работи ја известува јавноста дека од понеделник, 12 октомври, системот за сообраќаен надзор „Безбеден град“ почнува со работа и на подрачјето на СВР Охрид, односно во Охрид, Струга, Кичево и во Дебар. 

Од понеделник почнува примената на „Безбеден град“ во Охрид, Струга, Кичево и во Дебар

– По извршените технички проверки и финалните тестирања, камерите на системот ќе бидат ставени во функција на сообраќајниците на подрачјето на СВР Охрид – посочуваат од МВР.

Примената на системот „Безбеден град“ на територија на СВР Охрид минатата недела ја најави и министерот за внатрешни работи министерот Панче Тошковски при посетата на СВР Охрид и Регионалниот центар Запад.

Со активирањето на системот, како што нагласуваат од Министерството, ќе се овозможи засилена и континуирана сообраќајна контрола, навремено откривање на сообраќајните прекршоци, зголемување на сообраќајната дисциплина и унапредување на безбедноста на патиштата.

МВР апелира до сите возачи доследно да ги почитуваат сообраќајните правила и прописи и со одговорно однесување да придонесат за поголема безбедност во сообраќајот.

Системот „Безбеден град“ во државата е во функција од 1 февруари годинава. Периодот на адаптација траеше два и пол месеци кога граѓаните беа известувани и контролирани за сообраќајните прекршоци, а системот беше тестиран и унапредуван.

Министерот Тошковски во Охрид изјави дека во споредба со истиот период минатата година бројот на повредени во сообраќајни несреќи годинава е намален за 20 отсто, односно со 34 жртви помалку.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Фудбал

Видео: Меч за аналите: 11 гола за едно полувреме и победнички гол во 90+9. минута

Најлудиот натпревар во годината – 11 гола за едно полувреме и победнички гол во 90+9. минута .

Видео: Меч за аналите: 11 гола за едно полувреме и победнички гол во 90+9. минута

Ролеркостер од емоции и возбудување во Солна , Шведска.Спектакуларен натпревар со 11 постигнати голови одиграа АИК и Бромапојкарна во 23-тото коло од шведското првенство, мечот заврши со победа на гостите од 6:5.

Највозбудливиот момент на мечот кој без сомнение е најдраматичниот оваа година се случи во деветтата минута од судиското надополнување, кога фудбалерите на Бромапојкарна го постигнаа победничкиот гол.

Би било преблаго да се каже дека коментаторот на натпреварот, како и гостинските фудбалери, се разбира, паднаа во делириум.

Не се знае што беше поневеројатно во овој крајно луд натпревар: фактот што сите голови беа постигнати во второто полувреме или тоа што гостите водеа со 5:1, ја испуштија предноста, а потоа го постигнаа победничкиот гол длабоко во судиското надополнување. А можеби врвот на лудилото беа последните две минути од судиското надополнување – АИК постигна гол за 5:5 во 90+8. минута, а Бромапојкарна дојде до победа во 90+9. минута!

Па така, ако навивачите на двата клуба го гледале натпреварот на телевизија и се откажале од следење на второто полувреме по првиот дел без голови – зажалиле.

Следеше вистински фудбалски спектакл. АИК, по резултатот 1:5 што стоеше на семафорот во 73. минута, се опушти, уверен во лесен триумф, и му дозволи на ривалот да се разбуди, да возврати и да се врати во натпреварот. Играчите на АИК редеа гол по гол, навивачите се „запалија“, а трибините „експлодираа“ во моментот кога на семафорот стоеше – 5:5. А потоа – шок, вистинска шлаканица.

Буквално во следната акција по израмнувањето, гостинскиот играч Хансен ја стивна еуфоријата на трибините и ја разгоре радоста на својот тим – погоди за 6:5 и стави крај на најлудиот натпревар одигран оваа година.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Честитка од претседателката Сиљановска-Давкова по повод 11 Октомври – Денот на народното востание

На 11 Октомври 1941 година, македонските востаници му се придружија на антифашистичкиот демократски фронт, решени да го продолжат патот на илинденците до конечната победа и слобода, формирајќи македонска држава. 

Честитка од претседателката Сиљановска-Давкова по повод 11 Октомври – Денот на народното востание

На 11 Октомври 1941 година, македонските синови и ќерки тргнаа во решителен бој против фашистичките окупатори, бранејќи ја татковината.

Во време кога фашистичките сили маршираа низ европските држави, македонскиот мирољубив народ не беше тивок набљудувач на злото, туку патриотски ја прифати обврската за ослободување.

Идеја водилка на востанието како народен отпор беше вековниот стремеж за слободна македонска држава. Востанието прерасна во Народноослободителна борба, низ која, со крв, саможртва и непоколебливост на знајни и незнајни јунаци, се трасираше патот кон АСНОМ.

11 Октомври не е само важен историски датум. Тој е незаборавна и небришлива меморија и вечен завет за чување и развој на татковината. Заветот пак, не значи евоцирање спомени, имиња и настани, туку водење државен и општествен живот, достоен на нивната жртва.

Прилепските и кумановските востаници, но и сите други, не ни оставија само славна страница од минатото, туку аманет дека слободата се добива со храброст, дека правдината бара стаменост и пожртвуваност, дека држава се гради со труд, чест и одговорност. Нивниот херојски подвиг нè задолжува да бидеме не само нивни благодарни потомци, туку и достојни чувари и бранители на нивното непроценливо дело.

Се разбира, денешново време наметнува други приоритети, но секогаш остануваат човековата жед за правда, достоинство и слободен живот како насушна потреба.

Современиот бурен, сложен и конфликтен историски миг, од нас бара сплотеност, зрелост и мудрост, како неопходни доблести во справувањето со новите предизвици и проблеми со коишто сме соочени не само ние, туку и Европската Унија, Европа и светот.

Време е да се однесуваме кон државата како кон заеднички дом, во кој различностите не се повод за делби, туку причина за учење едни од други, за разбирање едни други, за градење свест за заедничко добро.

Мора да градиме правна и демократска држава, но и граѓанско општесто во кое законите ќе важат за сите, институциите ќе им служат на сите, а сечие човеково достоинство ќе биде неприкосновена вредност.

Секое поколение има свој испит пред историјата. Нашиот испит не е да раскажуваме, а уште помалку да ги повторуваме битките на претходниците, туку, да ги оживотвориме нивните подвизи: со знаење, наместо со незнаење; со право, етика и морал, наместо со самоволие; со единство, наместо со раздор; со заслуги, наместо со политички, партиски и статусни привилегии.

На крајот, на востаниците и на партизаните им должиме заслужена почит што се избориле и ни оставиле држава!

Ние пак, имаме политичка, економска и граѓанска обврска да градиме демократска, правна и просперитетна европска држава.

Нека ни е честит 11 Октомври – Денот на народното востание!

д-р Гордана Сиљановска-Давкова

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер