ДУИ позитивно ја оценува одлуката на Артан Груби да се врати во земјата, со што се создава можност преку транспарентна, правична и непристрасна постапка да се изнесат сите аргументи и да се разјаснат сите прашања, велат од неговата партија откако утрово поранешниот прв вицепремиер и министер за политички систем и односи меѓу заедниците беше приведен на граничниот премин Блаце. Од ДУИ велат дека очекуваат процесот да се одвива во согласност со највисоките стандарди на владеење на правото и целосно почитување на презумпцијата на невиност.

-Демократската унија за интеграција (ДУИ) позитивно ја оценува одлуката на Артан Груби да се врати во земјата, со што се создава можност преку транспарентна, правична и непристрасна постапка да се изнесат сите аргументи и да се разјаснат сите прашања. ДУИ останува непоколеблива во ставот дека правдата мора да биде еднаква за сите, без селективност, без двојни стандарди и без политички влијанија, велат од ДУИ.

Време е за одговорност, Груби ќе се соочи со правдата за сторениот милионски криминал, реагираат од владејачката ВМРО-ДПМНЕ. Оттаму додаваат дека одговорност има и кај СДСМ која, како што велат како тогашен коалициски партнер, молчела и го одобрувала криминалот на Груби.

-Артан Груби кој важи за олицетворение на криминалот и корупцијата предводена од СДС и ДУИ, конечно ќе се соочи со правдата. Криминалот на бегалецот од правдата, Груби достигна вредност од минимум 500 милиони денари или над 8 милиони евра, а има индиции дека оваа сума може да надмине десетици милиони евра, пари украдени од граѓаните. За целиот овој милионски криминал на Груби знаеше и СДС, но само за да не му пропадне коалицијата и да му потрае власта, молчеше и го одобруваше, со што стана соучесник, изјави Петрушевски од ВМРО-ДПМНЕ.

Од СДСМ, пак, враќањето на Груби го оценија како театар и политички договор меѓу ДУИ и ВМРО-ДПМНЕ за, како што велат, дефокус и заштита на власта од криминалите и скандалот со 5 тони дрога, кој според опозицијата води до врвот на Владата на Мицкоски

-ДУИ го спасува Мицкоски. Му фрлија гума за спасување. После денешниот театар на македонската граница веќе на сите им е јасно дека бегството на Артан Груби беше политички договор. Како што се договорија да го пуштат, така сега се договорија да се врати. На овој начин ВМРО со поддршка од ДУИ сака да го покрие најголемиот нарко-скандал со 5 тони дрога кој води до врвот на Владата на Мицкоски. Власта го презема судството и обвинителството под своја контрола, се рушат предметите на СЈО сега е вистинско време Груби да се предаде. Кој се смее кога го апсат?, изјави Кузеска од СДСМ.

За приведувањето на екс вицепремиерот се огласија и од Вреди од каде прашуваат дали Груби ќе му го зададе фаталниот удар на Ахмети и ДУИ?

-Црната кутија за владеењето на ДУИ конечно се предаде. Артан Груби е учесник и извршител на сите матни зделки на ДУИ. Затоа, Мала Речица се тресе од страв за тоа што не знаат за што се е подготвен да прозбори Артан. Откако катастрофално изгуби ДУИ на локалните избори и паднаа во вода сите лажни ветувања на Ахмети за предвремени избори и наводен влез во Влада, на Артан не му останува ништо друго освен да се соочи со сопствените гревови. Но кој се ќе оди курбан заедно со него допрва ќе видиме, реагираат од ВРЕДИ.

Четири дена по бегството на Груби во декември 2024-та од ДУИ тогаш преку писмено соопштение без да го спомнат конкретно неговото име порачаа дека не се совршени и дека учат од предизвиците, но и дека ги отфрлаат, како што ги нарекоа политичките кампањи мотивирани од двојни стандарди. Груби, пак, неколку дена пред да избега тврдеше дека „е чист како солза“ откако САД го ставија на црна листа поради вмешаност во значителна корупција, но објави дека се повлекува од политичкиот живот заради мир во семејството.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.