Прослави со музика за Петровден во градот нема да има, откако синоќа семејствата се појавија пред подготвената бина во „Паркот на Револуцијата“ каде траеја музичките проби на бедновите за Петровденската прослава организирана од општината.. Откако ги забележаа со фотографии во рацете од нивните деца, музичарите ги спуштија инструментите, a родителите симболично ги спуштија сликите на плочникот и запалија свеќи во форма на крст.

-Како можете да пеете и да свирите? Со кое срце сте дошле тука? Ако имаат срце нека пеат, ние не сме против ништо. Градоначалникот нека дојде нека испее една песна.

Предвидената дводнева музичка програма се откажува, им соопшти на родителите в.д. градоначалникот Венко Крстевски, кој посочи дека има одговорност кон сите во општината во непријатната средба која ја имаше со нив, кои беа дојдени да видат дали ќе се одржи концертот, за кој преку писмено соопштение не дадоа поддршка и побарале да биде откажан.

„Јас дојдов да ви кажам дека музичкиот настан од денеска и утре е откажан. – Требаше да не се ни организира. Јас не собирам поени, јас не го правам ова популистички. Беше од почетокот со самите родители, рака ќе ти подадеме, и на крајот што испадна?“

По соочувањето со родителите, градоначалникот Крстевски се огласи и преку социјалните мрежи, велејќи дека ја преиспитал одлуката која ја донел со добри намери и по консултации, водејќи се од емоциите на граѓаните и потребата да се оди напред..

„Животот продолжува, но трагедијата во дискотеката „Пулс“ не остави во заложништво на болка, особено за родителите кои живеат во страв и загуба. Откажувањето на музичкиот дел од денешниот и утрешниот настан не требаше да се случи – не затоа не ја почитуваме тагата, туку затоа што наша обврска е да се грижиме за сите, да го вратиме нормалното секојдневие и да покажеме дека заедништвото се гради со храброст и заедничка работа, а не со запирање на животот. “-Венко Крстевски – в.д Градоначалник на Кочани

Петровден е патрон на градот Кочани, а како што велат, вековната традиција годинава ќе се одбележи само со литургија и духовна музика во храмот. За денеска е закажана и комеморација за жртвите во пожарот, а во 18:05 часот ќе се одржи нов „Марш за ангелите“.

Премиерот Мицкоски цени дека со последните случувања, ЕУ загубила дел од својот имиџ и прашува, до кога ќе има трпение со источниот сосед. Обвинува дека целта на Бугарија е асимилација на македонскиот народ, по примерот, како што вели, на Русија во Украина..

-Целта на бугарските политичари во ништо не се разликува од онаа цел која што ја има руското раководство во Украина, а тоа е обид за асимилација на македонскиот народ и еден вид идентитетски инжењеринг кој што навистина, најмалку што треба да се случува во 21 век во Европа и тоа од земја членка на ЕУ, која треба да споделува европски вредности.Сите успеаја да видат и добро е што сите знаат која е крајната цел дека не се неколку стотини македонски граѓани да бидат дел од Уставот, туку таа е многу подлабока и многу поопасна и за самата Европа и на тој начин и ЕУ го губи делот од својот имиџ и не знам до кога ќе има трпение за ваквото однесување на нашиот источен сосед. - Христијан Мицкоски – Претседател на Влада

Од Софија продолжуваат истите пораките дека патот на Македонија кон ЕУ води преку Бугарија.. Првиот човек на бугарскиот тим историчари и поранешен амбасадор во Скопје – Ангел Димитров вели дека владата во Македонија копа се подлабоко во бесмислен ров во односните со Бугарија, од кој според него многу тешко ќе се излезе.

-Европскиот пат на Скопје минува преку Софија, бидејќи Софија во моментов е рамноправна со Брисел. Софија е дел од ЕУ, па затоа не може да се избира. Ако некој мисли дека нивниот пат минува низ Белград или преку Будимпешта, очигледно се лаже. Проблемот е што државното раководство сака да биде дел од ЕУ, но по свои сопствени правила. - Ангел Димитров – Претседател на бугарската историска комисија

Откако бугарскиот претседател – Румен Радев, непосредно пред гласањето на извештајот за Македонија испрати писмо до сите европски челници жалејќи се на вметнувањето на македонскиот јазик и идентитет во извештајот, го доби и првиот одговор од претседателката на ЕП – Роберта Мецола. Таа во него истакнува дека парламентот е свесен за посветеноста на Македонија кон европската интеграција, но ја охрбри земјава да продолжи со реформите, особено неспроведените уставни измени во однос на заштита на бугарското малцинство.

Пред два дена македонското МНР побара извинување од Софија за изјавите на шефот на бугарската димпломатија Георгиев, а вчера премиерот Жељазков лично од Мицкоски за изјавата за лавот и глушецот.

Две лица се осомничени за кривично дело Насилство по вчерашниот инцидент во Чаир кога градоначалничката на Скопје Данела Арсовска беше физички нападната а МВР поднесе кривична пријава. Од Јавното обвинителство информираа и дека до скопскиот Кривичен суд доставиле предлог на едно од лицата да му се определи притвор поради опасност од бегство и ризикот да го изврши делото со кое и се заканувал. За вториот осомничен се побарани полесни мерки на претпазливост.

-Првоосомничениот вчера се заканувал и физички ја нападнал градоначалничката на Скопје, која заедно со вработени во градските служби, по претходна пријава, излегле да извршат вонреден надзор на нелегален објект во градба на улицата “Севастополска”. Тој се претставил како сопственик на објектот во градба, па почнал грубо да ја навредува, да и се заканува, по што и физички ја нападнал.

Кога изреагирале останатите вработени во градските служби и припадниците на МВР и го тргнале првоосомничениот, со закани продолжило и второосомниченото лице. Со чинот на насилство двајцата осомничени во јавноста и кај другите присутни лица предизвикале чувство на несигурност, загрозување и страв, велат од обвинителството.

Од МВР пак најавија дека по безбедносна проценка на АНБ на скопската градоначалничка Арсовска ќе и биде обезбедена 24-часовсна полициска заштита со цел да ѝ се обезбеди лична сигурност и непречено извршување на нејзините обврски. Оттаму потврдија дека ја доставиле кривичната пријава до ЈО за вчерашниот инцидент но и ги отфрлија обвинувањата дека не постапувале во случаите поврзани со градоначалничката.

-Во однос на последните настани поврзани со г-ѓа Арсовска, МВР посочува дека и покрај тоа што таа во повеќе наврати јавно комуницира за закани преку социјалните мрежи, институцијата постапува по сите добиени информации било по службена должност, било по официјална пријава согласно законот и воспоставените процедури. Министерството за внатрешни работи најостро ги отфрла сите обвинувања дека не постапува во случаите поврзани со г-ѓа Арсовска. -МВР

Премиерот Христијан Мицкоски денеска не сакаше да ги коментира случувањата со Арсовска и ги повика институциите да постапат.

-Државата има институции, ги повикувам да постапуваат за случајот. Што се однесува за градоначалничката на Скопје, многу работи се кажани, не би имал што да додадам. – Христијан Мицкоски – Претседател на Влада

Од опозициската СДСМ пак побараа оставка од министерот за внатрешни Панче Тошковски.

-Инцидентот вчера и срамното непостапување на МВР и Тошковски, беше порака до секој што ќе се осмели да зборува за криминал, да покаже злоупотреби, да посочи корупција. Вчерашниот настан е порака до секој судија, секој обвинител, секој државен службеник или граѓанин да не се осмели да го чепне криминалот на власта. Ова е порака дека секој кој ќе им ги орткрие кримииналите може да биде следниот. Ова е систем на страв и закани кој доаѓа директно од власта. – Богданка Кузеска – Портпарол на СДСМ

Владејачката ВМРО ДПМНЕ пак одговори дека СДСМ само во три случаи излегува во јавност за Арсовска.

-Првиот кога ја напаѓаше дека таа е неспособна и има бугарско државјанство. Вториот случај, кога во опозиција ја користеше за напаѓање на Мицкоски и ВМРО-ДПМНЕ. И третиот случај, кога заедно со Бугарите ја брани Данела.- ВМРО ДПМНЕ

Инцидентот со скопската градоначалничка се случи вчера попладне во близина на полициската станица во Чаир. Арсовска тврдеше дека при увид на дивоградба најпривин добила закани по нејзиниот и живото на нејзиното семејство а потоа и физички била нападната со удари со клоци додека полицајците кои биле присутни не презеле ништо по што замина во болница. Министерот Тошковски пак во телевизиско гостување негираше дека инцидентот се случил пред очите на полицијата и дека ништо не презела, фактичката состојба рече дека ќе се утврди за да не излезе како што рече оној што се претставува како жртва е можеби оној кој предизвикал физички напад.