Никола Петровиќ Његош, принц на Црна Гора, е добитник на Светската награда за хуманизам за 2024 година, со која Охридската академија на хуманизмот го слави името на Свети Климент на сите светски меридијани.

Принцот е претседател на Фондацијата Његош, која е во тесна соработка со Обединетите нации и УНЕСКО во реализација на значајни меѓународни проекти од областа на хуманизмот и го организира Интернационалното биенале на уметноста во Кралскиот дворец во Цетиње.

Принцот Никола Петровиќ Његош е осумнаесетти добитник по ред на ова исклучително признание со кое што Охрид, градот на УНЕСКО, веќе ги овенча нобеловците Александр Солжењицин, Херта Милер, светските легенди Даисаку Икеда, Рави Шанкар, Питер Брук, Маноел Де Оливеира, Романо Проди, будејќи ги изворите на духовната меморија од првата средновековна школа на хуманизмот, основана од учениците на Св. Кирил и Методиј, заштитниците на Европа.

„Чест и задоволство ми е да ја прифатам номинацијата за оваа престижна награда и да се приклучам кон меѓународната плејада истакнати добитници од минатото, кои создадоа од оваа награда признание со кое се гледа со огромен респект насекаде во светот“, стои во писмото на лауреатот испратено до претседателот на интернационалното жири, амбасадорот Јордан Плевнеш.

Свечената церемонија на доделувањето на наградата ќе се одржи на 9 август на празникот „Летен Св. Климент“, во 12 часот во Куќата на Уранија на МАНУ. Во текот на утрешниот ден ќе биде посетена локацијата каде што ќе биде поставено Спомен-обележјето на хуманизмот, дело на бугарскиот сликар Светлин Русев и македонскиот скулптор Жарко Башески.

Со тоа спомен обележје на кое ќе бидат запишани сите досегашни добитници на Светската награда за хуманизам, ќе се изврши и прогласување на древниот Охрид и неговата милениумска историја во европската меморија за Центар на светскиот хуманизам.

Во рамки на свеченоста е предвидено обраќање на Претседателот на МАНУ, академик Живко Попов, а наградата на добитникот Никола Петровиќ Његош ќе му ја врачи Градоначалникот на Охрид,Кирил Пецаков. Беседа за годинешиот лауреат ќе даде амбасадорот Плевнеш.

Настанот е организиран во соработка со Институтот за културно наследство и археологија на Македонија, а ќе бидат доделени и специјални повелби на хуманизмот на Претседателот на Институот за уметност од Чикаго, Ролф Ахилес, Амбасадорот на Словачка Хенрик Маркуш, поранешниот амбасадор на Франција Жан-Клод Шлумберже, како и на Панче Велков, директор на Музејот на Град Скопје и на Фондацијата Македонида, која објавува значајни дела посветени на македонската духовна историја.

Оваа пригода ќе биде одбележана и со доделувањето на наградата "World vision 2024" од страна на Интернационалното жири на фестивалот SEE Paris Berlin Washington, а која што годинава му припадна на Цветан Панделески.

На свеченоста на која се поканети сите досегашни добитници, во присуство на поголема меѓународна асемблеја на гости, меѓу кои и претставници и градоначалници од збратимените градови на Охрид од Европа и градовите под покровителство на УНЕСКО, свои пригодни обраќања ќе имаат Романо Проди, поранешен Претседател на Европската комисија и добитник на оваа награда, Жан-Патрик Конрад, од Империјал колеџот од Лондон, Претседател на Европската академија на науките, уметностите и книжевностите, и Ахмад Алџарван,Претседател на Глобалниот совет за мир и толеранција, во кошто членуваат 124 држави од светот.

Во Куќата на УРАНИЈА на МАНУ ќе можат да бидат видени делата на лауреатите од сите меридијани и на тој начин достоинствено ќе биде одбрането престижното место на Охрид во светската цивилизација.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.