Околу 140 брисеви земени минатата недела се загубени, а на граѓаните им се вели дека примерокот не е доволен за испитување, тврди прилепчанецот Мартин Јошески, кој 20 дена е во самоизолација, а речиси 10-тина чека резултати за да дознае дали е заболен од КОВИД 19. Тој за Канал 5 вели дека негови приватни контакти од Институтот за јавно здравје му кажале оти не знае каде е неговиот брис, иако бил примен во лабораторија.
Јошески додава дека е запрепастувачки самото испитување да трае толку долго, и апелира до надлежните, резултатите од тестовите граѓаните мора да ги добиваат на време.
Од Министерството за здравство за КАНАЛ 5 велат дека досега не се случило да се загубат брисеви. Од Центарот за јавно здравје Прилеп пак информираат дека не се случило во еден или во два дена да се земат 140 брисеви, а брисевите до Институтот за јавно здравје навреме се доставуваат, се наведува во одговорот од министерството за здравство.
Загубени примероци немало ниту во главниот град, дециден е Директорот на Центар за јавно здравје во Скопје, Арбен Зибери. Но, дел од резултатите сепак доцнеле поради празничните денови.
Центрите за јавно здравје низ Македонија, меѓудругото ги земаат и доставуваат брисевите до лабораторија. Во последното деноноќие направени се над 600 анализи, а само во Институтот за јавно здравје се испитани околу 400 примероци.