Зголемувањето на приходите беше причина општинскиот Совет да изгласа позитивен ребаланс на буџетот, со што ќе се овозможи навремена реализација на планираните инвестиции во комуналната инфраструктура.
Од Локалната самоуправа нагласија дека порастот е остварен со продажба на плацови за објекти за индивидуални куќи, но значителен дел е и од парцели за згради за колективно домување.
– Планираните средства од продажбата на градежно земјиште во буџетот на Oпштината за оваа година изнесуваа 10,5 милиони денари, а до крајот на јуни ние веќе остваривме 13,4 милиони, што значи дека приходната страна по овој основ е веќе исполнета. Очекуваме до крајот на годината да продадеме нови градежни парцели, со што ќе се остварат дополнителни приходи, а пред Советот на општината во текот на оваа есен ќе поднесеме предлог за уште еден позитивен ребаланс на буџетот, истакна градоначалникот на Кочани, Николчо Илијев.
Интересот за купување државно градежно земјиште особено е изразен за парцели за викенд куќи, како и за објекти за хотелско сместување на Пониква, додека нешто помал е за плацови за индивидуално домување во градот.
Според градоначалникот Илијев, забележана е негативна појава во која дел од купувачите поради лични причини подолг период не започнале да градат и се откажуваат од сопственоста, при што бараат Општината да им врати 80 отсто од уплатената вредност при купопродажбата на парцелите.