Култура

Претставувања на македонската култура низ светот до крајот на 2014

Македонската култура преку проектите на националните установи до крајот на годинава ќе биде претставена во неколку светски центри.

Покрај фестивалските гостувања, подготвени се и меѓународни презентации со кои Република Македонија ќе одбележи две децении од воспоставување дипломатски односи - со Австрија, Чешка и Јапонија.

Планираните активности денеска на прес-конференција ги најави министерката за култура Елизабета Канческа-Милевска, истакнувајќи дека меѓународното претставување на македонската култура е еден од приоритетите во културната политика.

- Во периодот што претстои атрактивни културни содржини од сите дејности на културата ќе бидат презентирани во неколку светски метрополи... Меѓународната соработка, презентацијата на македонската култура и афирмацијата на високите вредности на македонското културно наследство се врвни приоритети на Министерството за култура кои континуирано, секоја година, настојуваме да ги оствариме преку поддршката на низа активности и комплексни манифестации во странство. Република Македонија е земја која поседува непроценливо културно богатство и актуелно творештво и токму затоа, наша цел е постојано и видливо да бидеме присутни во европските културни центри, на сите светски настани од областа на културата, на реномираните манифестации и фестивали, рече Канческа-Милевска.

Од 18-ти до 22 септември, по повод 20 години дипломатски односи со Австрија, Министерството ќе организира Денови на македонската култура во Виена, каде што ќе гостуваат Драмски театар-Скопје со претставата „Последните Македонци“ во театарот „Акцент“, Музејот на современа уметност со изложба „Bricolage - Made in Macedoniа“ на неколку современи ликовни творци во простор на Амбасадата на РМ во австриската престолнина и Балетот со претставата „14 часа“ во театарот „Одеон“. На прес-конференцијата присуствуваа и директорите на ДТС, МСУ и МОБ, Роберт Велјановски, Елиза Шулевска и Дејан Прошев, чии установи веќе имаат плакати на германски јазик за гостувањето во Виена.

Претставата „Последните Македонци“, покрај на 18 септември, ќе биде изведена и ден претходно за македонските иселеници, во црковната општина „Св. Наум Охридски“. Пред заминувањето во Виена, на ДТС му претстои гостување во Подгорица на 10 септември, на Интернационалниот фестивал на алтернативен театар, каде ќе учествува со „Хамлет“ во режија на Дејан Пројковски.

За 20 години од дипломатските односи со Чешка, таму е планирано гостување на Театарот за деца и млади, изложба на Националната галерија на Македонија и концерт на Јета Старова и Ермељ Мехмети.

Дваесетте години од дипломатските односи со Јапонија, пак, ќе бидат одбележани со целовечерен концерт во Токио на 9 ноември, на кој ќе настапат оперските солисти Славица Петровска-Галиќ, Ирена Кавкалевска, Ѓорги Џуцковски и Игор Дурловски, под диригентство на Борјан Цанев.

По минатогодишното успешно гостување во Џакарта, овој месец Македонската опера и балет ќе го посети и Бангкок каде ќе учествува на 16. Меѓународен фестивал на музика и игра, кој се организира во чест на тајландскиот крал. На 13-ти и 15 септември МОБ ќе гостува со „Дон Џовани“ и „Боеми“, копродукција со италијанскиот театар „Лирико“.

Македонската филхармонија по повод 70 години од своето постоење на 6 октомври ќе настапи во концертната сала „Ватрослав Лисински“ во Загреб и ќе го отвори циклусот „Свет на музиката“, во кој гостуваат реномирани симфониски оркестри. Солист ќе биде светски познатиот виолончелист од Германија Даниел Милер Шот.

Директорката на Филхармонијата Маја Чанаќевиќ рече дека се почестени што ќе ја отворат концертната програма „Свет на музиката“ и дека ќе настапат со исклучително тешка и внимателно избрана програма.

- Особено е значаен настапот во Загреб, каде последен пат Филхармонијата гостуваше во 2000 година. Четиринаесет години е долг период. Колегите од Хрватска нетрпеливо не очекуваат, нашиот оркестар е добредојден, рече Чанаќевиќ.

До крајот на годинава ќе има уште неколку гостувања: Центарот за култура „Марко Цепенков“ од Прилеп на фестивалот „Експонто“ во Словенија, Битолскиот театар во Пекинг со третиот дел на „Хенри Шести“ (возвратно во Кина по минатогодишното гостување на Националниот театар од Пекинг на првиот „Шекспиров фестивал“ во Битола), театарот „Комедија“ во ноември во канадскиот град Мисисога, а Македонскиот народен театар во Хрватска.

Покрај сценско-музичката дејност, Македонија ќе го претстави и богатото книжевно творештво на големите светски саеми на книгата во Франкфурт, Гетеборг и Истанбул.

Министерката Канческа-Милевска потсети и на настани во првата половина на 2014: изложбата на старите словенски ракописи во Ватиканските музеи и настапот на Македонскиот балет со „14 часа“ во римскиот театар „Куирино“ за 20-годишнината од дипломатските односи со Светата столица, гостување на „Танец“ во Рига и наградите што од естонскиот главен град ги донесе женскиот хор „Св. Злата Мегленска“ од Светската хорска олимпијада, концертот на Благој Нацоски во Џенова, забележителните гостувања на Турскиот и на Албанскиот театар во Турција, турнејата на „Танец“ низ Хрватска, како и големиот број претставувања на македонски уметници во културните центри на РМ во Њујорк и Софија. /МИА.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Балкан

Проговори Германецот, кој криел милион евра во минибус- уапсен е на границата меѓу Србија и Косово

Германски државјанин, осомничен за поврзаност со заплената на еден милион евра на преминот Мердаре во февруари, вчера се јавил во Специјалното обвинителство на Косово на сослушување.

Косовската полиција соопшти дека мажот признал дека парите се негови, но не можел да го докаже потеклото на средствата. По сослушувањето, му е одреден притвор, пишува Коха.

Полициски извештај

„На 23 октомври 2026 година, осомничен маж, германски државјанин, дошол во ПСРК на сослушување поради случајот од 24 февруари 2026 година. Потоа, на граничниот премин Мердаре, во возило со албански регистарски таблички, во обработениот простор биле пронајдени и конфискувани 1.000.000 евра. За време на сослушувањето, осомничениот признал дека конфискуваните пари се негови, но не успеал да го докаже потеклото на парите, како и поврзаноста со осомничените лица кои го превезувале“, објави полицијата.

Апсење во февруари

Во февруари, тројца осомничени беа уапсени на истиот премин додека превезувале непријавени пари. Минибусот го управувал Е. А., а еден од патниците, А. К., бил полицаец од Тирана. Тој бил суспендиран веднаш по апсењето.

Детали за заплената

Еден милион евра биле скриени во специјално дизајниран простор на подот од минибусот. Парите биле распределени во 18 пакети, во апоени од 10, 20, 50, 100 и 200 евра. На секоја кеса во која биле завиткани парите имало напишан број.

Сомневањето кај цариниците било предизвикано од фактот дека минибусот патувал од Србија до Косово без ниту еден патник, што ги навело да извршат детален преглед на возилото.

Сите обвинети во овој случај се товарат за кривично дело перење пари.

Тагови: Косово минибус

Други спортови

Руски олимпиец загина во војната во Украина

Поранешниот руски велосипедист и двократен олимпиец Сергеј Кучеров беше убиен во војната во Украина на 46-годишна возраст.

Веста за неговата смрт ја објави руската државна новинска агенција ТАСС, повикувајќи се на Велосипедскиот сојуз на Тулската област. Кучеров ја претставуваше Русија на Олимписките игри во Пекинг во 2008 година и во Лондон во 2012 година.

„Кучеров беше убиен додека учествуваше во специјална воена операција“, соопшти регионалната велосипедска федерација, користејќи го терминот што руските власти го нарекуваат инвазијата на Украина.

Руските медиуми објавија дека неговиот погреб е планиран за петок, 23 октомври, во неговата родна Тула, на гробиштата каде што се погребани паднатите припадници на руските сили. Не е објавено каде точно загинал Кучеров, во која воена единица служел, ниту под какви околности починал. Веста за неговата смрт ја објавија руските медиуми на 21 октомври, додека се наведува дека починал еден ден претходно.

Former Olympic cyclist Sergey Kucherov (Beijing 2008, London 2012), World Cup winner and multi-time Russian champion who joined the russian agression against Ukraine was neutralized on Oct 20. https://t.co/iE0qtmqNJO
— UkrSportBase 🇺🇦 | Olympics (@Ukrsportbase) October 21, 2026

Настапил два пати на Олимписки игри

Кучеров е роден на 18 јули 1980 година во Тула, а во текот на својата спортска кариера се специјализирал во велодромски велосипедизам, особено во индивидуални и тимски спринтови. На Олимписките игри во Пекинг во 2008 година, се натпреварувал во екипниот спринт со Денис Дмитриев и Сергеј Полински. Руската репрезентација го завршила натпреварувањето на 12-то место.

Четири години подоцна во Лондон, тој повторно ја претставувал Русија во истата дисциплина. Овој пат настапил со Дмитриев и Сергеј Борисов, а руската репрезентација го освоила седмото место.

Во текот на својата кариера, тој неколку пати ја освоил титулата руски шампион во поединечен и тимски спринт. Тој бил и победник на една етапа од Светското првенство во велодромски велосипедизам, а освоил и медали на натпреварите од Светското првенство во Германија, Кина и Москва.

Руската велосипедска федерација се збогувала со Кучеров, кој го опишал како сигурен колега, голем професионалец и човек посветен на велосипедизмот. Неговата смрт е уште еден случај на поранешен врвен спортист кој починал за време на руската инвазија на Украина, која започнала во февруари 2022 година.

Тагови: украина

Македонија

Кирков: Филипче и Горан Бетон Герасимовски, каде се паркинзите и зеленилото во Буњаковец?

Денес се наоѓаме во населбата Буњаковец, на улицата „29 Ноември“, денес позната како „Костурски херои“, каде што повторно се отвораат сериозни прашања за урбаното уредување и квалитетот на животот на граѓаните.

Според информациите за овој објект, не е предвиден соодветен паркинг-простор, се сечат дрвја, а тротоарот е зафатен со градежни активности. Ова е особено загрижувачко во населба како Буњаковец, каде што паркирањето и движењето на пешаците и онака претставуваат сериозен проблем.

Господине Горан Герасимовски, како е можно да се планираат и реализираат вакви проекти без јасни одговори за паркирањето, зеленилото и безбедното движење на пешаците? Кој ги штити интересите на жителите на Буњаковец?

Господине Венко Филипче, заедно со вашиот градоначалник дојдете на терен и погледнете со какви проблеми се соочуваат граѓаните. Во кампањите се ветуваа хумано уредени населби, повеќе зеленило и подобри услови за живот, но граѓаните имаат право да прашаат дали тие ветувања се преточени во конкретни резултати.

Не е доволно само да се зборува за модерен и уреден Центар. Потребно е да се обезбедат услови во кои граѓаните ќе можат нормално да живеат, да паркираат, безбедно да се движат по тротоарите и да имаат пристап до зелени површини.

Затоа бараме Општина Центар јавно да ги разјасни условите под кои се одвива изградбата на оваа локација, дали се почитуваат одобрените планови и како ќе се заштитат пешачкиот простор и зеленилото.

Граѓаните на Буњаковец заслужуваат конкретни решенија, а не само предизборни ветувања. Центар треба да се развива во интерес на луѓето што живеат во него!, рече Стефан Кирков, член на Градски комитет на ВМРО-ДПМНЕ.