Домитровиќ посочи дека во официјалната програма од понудените 30, избрани се 10 реперезентативни театарски претстави од исто толку држави во Европа и две премиери на копродукциски проекти како што е театарската претстава „Кирил и Методиј“ на Јордан Плевнеш во режија на Мартин Кочовски.

- Претставата „Кирил и Методиј“ на Плевнеш е македонско-словенечко-бугарски копродукциски проект во кој ќе настапат актери од три држави. Од денешен аспект може да најавам атракција и веќе видлив интерес за премиерата, која ќе биде во еден од најубавите театри во овој момент во Европа, а тоа е театарот во Букурешт каде годинава ќе се одржи големиот НЕТА-Фестивал. Во главниот романски град ќе има уште една НЕТА-премиера, односно словенечката претстава „Хурах, Носферату“ на Андреј Скубица во режија на Симона Семенич. За овие две претстави потоа ќе овозможиме дополнително претставување низ Европа, нагласи Домитровиќ.

Од Регионалната канцеларија на НЕТА во Битола, информираа дека меѓу десетте претстави се и „Тобелија“ на Мал драмски театар-Битола и партнерите од Црна Гора, Бугарија и Словенија, а текстот „Буре барут“ на Дејан Дуковски ќе го изведат актерите на Националниот театар од Букурешт.

- Регионалната канцеларија на НЕТА во Битола ја потврдува својата оправданост и стратешка поставеност во овој дел на Европа. Освен во седиштето во Љубљана, нашата моќна мрежа ќе дејствува и од нашиот град, но и од Брисел. Нашата мисија е да соработуваме со сите театри од сите држави во овој регион и успеваме во тоа. Идејата за отворање на регионална канцеларија на НЕТА во Битола беше на Дамир Домитровиќ и се покажа како оправдана, а и зголемен е бројот на театри од секаков формат кои сакаат да членуваат во НЕТА, истакна претседателот на оваа асоцијација и основач на Мал драмски театар, Благој Стефановски.

Стефановски и Домитровиќ потврдија дека на кус рок планираат активирање на НЕТА-Арт телевизија. /МИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.