Македонија

Претседателката Сиљановска-Давкова ја врачи Големата годишна награда за најуспешно реализирано архитектонско дело во 2025 година

Претседателката Сиљановска-Давкова, во својство на покровителка, ја врачи Големата годишна награда за најуспешно реализирано архитектонско дело во 2025 година.

Лауреати на Големата годишна награда за најуспешно реализирано архитектонско дело во 2025 година се авторите Искра Лековска и Владимир Лековски од архитектонското студио „Лелелеле“, за проектот Православен храм – црква „Св. Рамноапостоли цар Константин и царица Елена“ во Скопје.

Таа истакна дека наградувањето не е ларпурлартизам, ниту се наградуваат само резултатот и творбата, туку се евалуира процесот на истражување, трагање, компарирање, сомневање, преиспитување, kако и одговорниот однос кон просторот и луѓето во него.

Според неа, изборот на добитниците се темели на строга и аргументирана стручна обсервација на делата, во потрага по она што ги надминува професионалните стандарди и воспоставува нови критериуми во современата архитектонска практика.

Претседателката потсети дека архитектурата, како триаголник на наука, уметност и општествен ангажман, има суштинско влијание врз убавината и функционалноста на јавниот простор, односно врз квалитетот на урбаното живеење.

Во услови на забрзана урбанизација, финансиски интереси и економски притисоци, архитектот, според неа, има обврска да го штити јавниот интерес и да го брани јавниот простор, просторот како заедничко добро, градејќи рамнотежа меѓу потребите на сегашноста и одговорноста кон иднината.

За авторите на награденото архитектонско дело, црквата „Св. Константин и Св. Елена“ е метафора за македонската колективна меморија и идентитет и ја персонифицира хармонијата меѓу небото и земјата, духовното и световното, традицијата и современоста.

Претседателката им честиташе на добитниците, потенцирајќи дека наградата има силна, едукативна и инспиративна вредност за архитектонската фела и за младите архитекти!

Во продолжение е интегралниот текст од обраќањето на претседателката Сиљановска-Давкова:

Почитувани,

Големата годишна награда за архитектура, во амбиент на урбан хаос, е ретка прилика за мене да се дружам со луѓе коишто веруваат во убавото и во функционалното. Оваа манифестација не ја доживувам само како чин на оддавање свечено признание на најуспешното архитектонско дело, туку и ретка можност за стручна и уметничка евалуација на архитектонските остварувања.

Не случајно, настанов се случува овде, на Архитектонскиот факултет, како култен образовен амбиент во којшто виреат и растат идните архитекти, каде што се негуваат и се поттикнуваат критичката мисла и одговорноста кон просторот во којшто живееме.

Архитектурата, како триаголник на уметност, наука и општествен ангажман, има длабоко и трајно влијание врз нашето ментално и физичко здравје, но и врз човековото поведение што, пак, влијае врз квалитетот на нашите секојдневни активности.

Архитектите се оние што естетски го обликуваат секојдневието, преку креирањето функционални, одржливи и хумани решенија. Логосот, но и еросот и патосот на нивните творби го креираат и го обележуваат духот на епохата, ги вградуваат потребите на човекот во просторот и оставаат траги што нè надживуваат нас, нивните современици, а нив ги вградуваат во вечноста!

Денешново дружење на еден лаик како мене, којшто во потрагата по убавото, ви се придружува во уживањето на моментумот, е значаен момент не само за македонската архитектура, туку и за македонското општество, но и пошироко. Не сведочиме и не ѝ се радуваме само на индивидуалната извонредност, туку и на вредностите коишто современата архитектура ги отсликува или негира под влијание на конфузната и конфликтна (не)цивилизациска реалност во која живееме, испреплетена со глобалните текови и трендови, како нивен одраз, сенка или отпор.

Улогата на архитектот денес е посложена и поважна од кога било. Во време на забрзана до забревтаност урбанизација, економска логика и притисоци, занемарен квалитет на живот, архитектот не е само проектант, туку и чувар и бранител на јавниот интерес и на просторот како заедничко добро, на рамнотежата меѓу потребите на денешницата и одговорноста кон иднината.

Да потсетам: Се уверив на дело и на самото место дека изборот на добитникот не е случаен, туку произлегува од студиозна, строга и одговорна евалуација на дела коишто не само што ги исполнуваат високите професионални стандарди, туку и ги надминуваат, поставувајќи нови критериуми и репери во современата архитектонска практика и реалност.

Искрена благодарност до членовите на стручната комисија, соочени со сложената и одговорна задача: да ги вреднуваат пристигнатите трудови, да направат вистински избор којшто го препознал најдоброто и најуспешното, уникатното, оригиналното!

Особено значајно е што наградените достигнувања секогаш имаат едукативна и инспиративна улога, како пример и поттик за младите архитекти и студентите коишто допрва го градат својот професионален пат. Преку вакви примери се создава дијалог меѓу искуството и новите идеи, меѓу традицијата и иновацијата, дијалог без кој развојот на архитектонската мисла е неможен.

Почитувани,

Денес, повеќе од кога било, архитектурата е соочена со сериозни предизвици: климатските промени, одржливиот развој, социјалната еднаквост, технолошките трансформации, вештачката интелигенција. Делата коишто ги создаваат македонските архитекти, вклучително и оние што ги наградуваме вечерва, покажуваат и докажуваат дека со знаење, визија, креативност, посветеност и работа, идеите можат да се преточат во дела што оживуваат.

Големата годишна награда за архитектура не ја слави архитектурата само како ларпурлартизам, ниту само како очигледен резултат и творба, туку како процес на истражување, трагање, компарирање, сомневање, преиспитување и одговорност кон просторот и луѓето во него. Таа испраќа порака дека достоинството на архитектонската професија се гради врз креативен и етички идентитет, професионален интегритет и дигнитет, уметничка смелост и хуманистичка свесност.

Им честитам на архитектите – учители од Сократовски и менторски тип, им честитам на архитектите – ученици од Телемаховски тип, желни и жедни за знаење, им честитам на гласните архитекти кога архитектурата е под закана од профитерите за иновативност, за љубовта кон оваа прекрасна професија, за оригиналноста, посветеноста, критичноста, идејноста и истрајноста.

Денешниот настан нека биде поттик за сите архитекти да ја разбудат и освестат во себе, кај студентите, колешките и колегите смислата за просторот, да ја негуваат способноста за соживот со амбиентот и почитта кон него, да не ја заборават човековата потреба од облагородување и хуманизирање на средината во која живееме, да го негуваат и да го обликуваат урбаниот идентитет по мерка на човекот, а не на парите!

Дозволете, пред да го соопштам добитникот на Големата годишна награда за архитектура, да ви посакам среќна, здрава и успешна 2026 година, со нови градителски подвизи и високи архитектонски достигнувања.

Посакувам да ја помните по добро!

Тагови: Гордана Сиљановска-Давкова

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Забава

Најголемата ѕвезда на OnlyFans, која лани заработи 83 милиони долари, лажела за годините (ВИДЕО)

Најголемата ѕвезда на OnlyFans, Софи Рејн, призна дека лажела за своите години.

Американската креаторка на содржини за возрасни, која стана позната по своите огромни заработки, до неодамна тврдеше дека има 19 години, но сега откри колку години всушност има.

Зошто лажела за своите години?

Како гостин во YouTube емисијата Vlad TV, Рејн одговараше на прашања за своите години. Водителката ја соочи со фактот дека во минатото дала различни информации.

„Но, во интервјуата, твојата возраст се менуваше неколку пати. Сега имаш 23 години?“, праша таа. „Имам 21 година“, откри Рејн.

Кога ја прашаа зошто дала неточни информации, таа објасни дека го сторила тоа за да ја заштити приватноста.

„Намерно објавувам различни информации за луѓето да не знаат колку години навистина имам. Луѓето сакаат да ме следат и поради тоа не го откривам моето вистинско име или какви било други вистински информации“, рече таа.

„Ако го преплавам интернетот со еден куп лажни информации, никој нема да знае што е вистина“, додаде таа.

Водителката забележа дека таквите информации на крајот станале јавни. „Но, на крајот, луѓето го откриле вашето вистинско име, вистинска возраст и сè друго. Претпоставувам дека тоа е неизбежно“, рече тој.

Рејн се согласи. „Да. Живеам во Флорида, а таму тоа е јавна информација. Речиси е невозможно да се сокрие“, заклучи таа. Поради ова, вели таа, нејзините родители се загрижени. „Тие навистина се загрижени само за мојата безбедност. Тоа е нивната главна грижа, но освен тоа, тие се подготвени да ме заштитат ако нешто се случи.“

Заработка од 83 милиони долари минатата година

Софи Рејн, која има повеќе од 8,8 милиони следбеници на Инстаграм, исто така се појави во медиумите поради вртоглавите суми што, според нејзините сопствени тврдења, ги заработува. Таа изјави дека само минатата година, во 2025 година, заработила 83 милиони долари од својата содржина. Во првата година на платформата OnlyFans, заработила 43 милиони долари.

Поради огромните заработки, таа плаќа и многу даноци, а претходно откри како потрошила петцифрена сума само за еден викенд на музичкиот фестивал Коачела.

Вештачката интелигенција влијае на заработката

Иако OnlyFans не објавува официјални податоци за најуспешните креатори, водителката истакна дека Рејн е сигурно на врвот и ја праша дали нејзината заработка се намалила во последната година.

„Искрено, заработката е доста стабилна. Мислам дека минатиот месец малку се намали бидејќи не работев толку многу, бев зафатена. И исто така мислам дека вештачката интелигенција многу влијае на сè“, призна таа.

Таа објасни дека можноста корисниците да користат алатки за вештачка интелигенција за да ги стават своите омилени креатори во различни сцени веројатно веќе влијае на индустријата.

Ѕвездата нагласи дека вештачката интелигенција е нејзината единствена вистинска грижа, но повтори дека, и покрај сè, „нејзината заработка останува повеќе или помалку иста секој месец“.

Тагови: OnlyFans ѕвезда

Бизарно

Патници на брод снимиле морничави сцени од огромни фигури како лебдат над морето: Ова се вонземјани

Патувањето со брод по брегот на Корнвол се претвори во необично искуство, откако патниците видоа бизарна глетка на хоризонтот.

Набрзо, на мрежите се појавија фотографии, кои привлекоа големо внимание и покренаа бројни прашања, објавува „Мирор“.

„Беше нереално...“

Патниците велат дека мистериозниот феномен „се променил“ пред нивните очи, земајќи еден облик, па друг, додека се чинеше дека „лебди“ над површината на морето.

Фотографиите се направени во близина на градот Сент Ивс, за време на туристичко патување организирано од компанијата „Сент Ивс Ботс“.

„Беше нереално да се набљудуваат овие огромни „структури“ и чудни атмосферски промени. И ние и нашите патници понекогаш бевме целосно запрепастени. Убедени сме дека ова е „визуелно нарушување“ на контејнерските бродови, видени во далечината“, велат претставници на компанијата.

Експертите веруваат дека драматичната сцена веројатно е предизвикана од оптичка илузија позната како фатаморгана. Обично се јавува кога светлината се прекршува и поминува низ слоеви на воздух со различни температури. Како резултат на тоа, далечните објекти можат да изгледаат искривени, издолжени или подигнати над хоризонтот.

Онлајн коментари

Оваа оптичка илузија ги фасцинирала набљудувачите со векови и често се поврзува со народни приказни и легенди. Приказните за „фантомски острови“, „лебдечки замоци“ и „магични земји“ често се поврзуваат со слични феномени.

Фотографиите предизвикаа бројни реакции на социјалните медиуми, при што корисниците нудеа свои теории, како и шеги за тоа што го гледаат.

Еден напиша: „Бродови на духови во маглата од некое далечно време“. Друг додаде: „Тие се вонземјани“.

Тагови: брод патници

Шоу биз

Ја прашаа Џенифер Лопез за врска со колегата- поради нејзината реакција на сите им стана незгодно (ВИДЕО)

Џенифер Лопез мораше да ги разјасни гласините за нејзината наводна врска со колегата Брет Голдштајн за време на промотивно интервју.

За време на гостувањето во емисијата „Today“, водителката Савана Гатри ги соочи со шпекулациите, што доведе до малку непријатна дебата во која Лопез жестоко ја негираше романсата.

Актерите моментално ја промовираат својата претстојна романтична комедија „Cancellor Romance“. Во филмот, Лопез игра високо рангирана режисерка со строга политика против врските со колегите, која против своја волја се заљубува во адвокат (Голдштајн) кој штотуку се приклучил на нејзината фирма.

Почеток на шпекулациите

По премиерата на филмот на Нетфликс во Лос Анџелес минатата недела, беше само прашање на време кога ќе започнат гласините за нивната романса во реалниот живот. Лопез и Голдштајн се појавија доста интимно на црвениот тепих, смеејќи се и разменувајќи погледи, поттикнувајќи медиумски шпекулации.

Фактот што актерот од серијата „Тед Ласо“ претходно го изрази своето восхитување кон пејачот на социјалните мрежи, исто така придонесе за ова, па не требаше долго време приказната да стане вирална.

Незгодно интервју

Сепак, за време на гостувањето во емисијата „Today“, двојката одлучи да стави крај на тие приказни. Водителката Савана Гатри ги праша за гласините и дали нивната хемија на екранот се прелеала и во реалниот живот, но нивниот одговор ја остави „збунета“.

„Нема ситуација каде што ме гледаат со некого или работат со некого без тие да се обидат да ме поврзат со таа личност“, одговори Лопез.

„Мислам дека тоа се случува ако стоите блиску до неа“, се пошегува Голдштајн, додавајќи: „Затоа цело време стојам толку блиску“.

Сепак, Гатри не беше задоволна од одговорот и продолжи да инсистира, кажувајќи им дека не мисли дека тоа е вистинскиот одговор.

@tmz
Jennifer Lopez's flirtation with Brett Goldstein is just movie magic and nothing more ... at least that's what she told Savannah Guthrie. 🎥: NBC
♬ original sound - TMZ

„Не сме во врска“

Ова изгледа ја изнервира Лопез, која возврати дека гласините за нејзините врски со колегите постојано се појавуваат, но никогаш не се покажуваат како вистинити. „Како тоа да не е одговорот? Тоа беше одговорот! Ме споија со сите, мислам дека оваа година „бев“ со Кевин Костнер. Бев „со“... имаше многу луѓе“, рече таа. „Се случува постојано, што не значи дека е вистина.“

Само за да им биде кристално јасно на сите што гледаа, Гатри повторно го притисна двојката, на што Лопез кратко одговори: „Не сме во врска.“

„Точно“, додаде Голдштајн.

Тагови: Џенифер Лопез