Здравје

Прекумерниот внос на витамин Ц преку додатоци може да предизвика проблеми

Витаминот Ц е неопходен за здравјето и има бројни придобивки.

Најчесто може да се најде во разни овошја и зеленчуци и е важен за одржувањето здрав имунолошки систем, а исто така, клучен е и за заздравување рани, одржување силни коски и подобрување на функцијата на мозокот. Но, прекумерниот внос може да предизвика несакани ефекти, пишува „Н-1“.

Во благи случаи, тие вклучуваат проблеми со варењето, но претерувањето може да доведе и до посериозни здравствени проблеми. Некои додатоци во исхраната содржат екстремно големи количини на витаминот, што во некои случаи може да предизвика несакани појави. Најчестите лоши ефекти се пролив, гадење, грчеви во стомакот и други гастроинтестинални проблеми.

Бидејќи витаминот Ц е растворлив во вода, тој не се складира во телото како витамините растворливи во масти. Ова значи дека витаминот Ц се пренесува до ткивата преку телесните течности, а секој вишок се излачува во урината.

Лошо варење

Најчестиот несакан ефект од високиот внос на витамин Ц е лошото варење. Тоа е предизвикано од земање високи дози од овој витамин преку додатоци, а не преку храна.

Ако се земаат додатоци коишто содржат повеќе од 2.000 милиграми витамин Ц, веројатно ќе доживеете проблеми со варењето, најчесто дијареја и гадење. Значи, ако имате проблеми со варењето поради премногу витамин Ц, Вие може, едноставно, да изберете додаток со помала доза или целосно да го прескокнете.

Премногу железо

Витаминот Ц е познат по тоа што ја подобрува апсорпцијата на железо. Може да се врзе за нехемоглобинко железо, коешто се наоѓа во растителната храна и човековото тело не го впива толку делотворно како хем-железото, што се наоѓа во храната од животинско потекло. Кога витаминот Ц се врзува за нехем-железо, му олеснува на телото да го прими тоа железо, што е особено важно за луѓето кои го добиваат поголемиот дел од железото од растителна храна.

Научен труд покажа дека апсорпцијата на железо кај учесниците се зголемила за 67 насто кога земале 100 мг витамин Ц со оброк. Сепак, луѓето со состојби што го зголемуваат ризикот од натрупување на железо во телото, како што е хемохроматоза, треба да бидат претпазливи при земање додатоци на витамин Ц.

Во овој случај, земањето премногу витамин Ц може да доведе до преоптоварување со железо, што може да предизвика сериозно оштетување на срцето, црниот дроб, панкреасот, тироидната жлезда и централниот нервен систем. Сепак, преоптоварувањето со железо е малку веројатно ако немате хемохроматоза.

Преоптоварување со железо може да се случи ако внесувате повеќе од самото железо во додатоци во исхраната.

Може да се создадат камен во бубрег

Телото го лачи вишокот витамин Ц како оксалат, т.е. „отпаден производ“. Премногу витамин Ц може потенцијално да ја зголеми количината на оксалат во урината, што ја зголемува опасноста од појава и развој на камчиња во бубрезите, особено ако се внесува повеќе од 2.000 мг на ден. Тоа е исклучително ретко, особено кај здрави луѓе.

Колку витамин Ц е премногу?

Бидејќи витаминот Ц е растворлив во вода и вашето тело го излачува вишокот во рок од неколку часа од неговото консумирање, ретко се случува преголем внос. Всушност, речиси е невозможно да се внесе премногу витамин Ц само од храна. Кај генерално здрави луѓе, секој дополнителен внес на витамин Ц над препорачаниот, едноставно се излачува од телото. Ова значи дека ќе треба да се изедат 25 портокали или 14 црвени пиперки за да се надмине препорачаниот дневен внес на витамин Ц.

Предозирањето со витамин Ц е поверојатно кога луѓето земаат додатоци во исхраната, или пак, кај луѓето со состојби што ја зголемуваат опасноста од преоптоварување со железо или коишто се склони кон камен во бубрег - и тие треба да бидат внимателни со вносот на витамин Ц.

Ако одлучите да земате додаток на витамин Ц, најдобро е да се земе некој што содржи не повеќе од 100 отсто од дневните потреби. Препорачаниот дневен внес на витамин Ц во исхраната е 60 мг, а максималниот дозволен дневен внес е 350 милиграми. Според Националните институти за здравје на САД, препорачаниот дневен внес на витамин Ц е 75 мг за жени и 90 мг за мажи.

Тагови: витамини

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Јаневска: Никој нема да биде отпуштен од работа, иако во претходните 7 години имаме 17 илјади ученици помалку

Иако во изминатите седум години бројот на ученици е намален за дури 17 илјади, а со тоа е променет и соодносот меѓу наставниците и учениците, министерката за образование и наука Весна Јаневска уверува дека нема да има отпуштања на наставен кадар.

На отчетот за сработеното во првите две години од мандатот, Јаневска оцени дека квалитетот на образованието е унапреден преку низа реформи насочени кон подобрување на условите и можностите за учениците, студентите и научната заедница. Како еден од позначајните процеси ги издвои токму оптимизацијата на училишната мрежа и воведувањето на едносменска настава во повеќе од 200 училишта низ државата.

- На овој начин не само што се заштедуваат средства, тоа е помалку важно, туку децата повеќе се социјализираат, учат во подобри услови и постигнуваат подобри резултати. Свесна сум дека има реакции, но да повторам никој нема да биде отпуштен од работа, иако во претходните 7 години имаме 17.000 ученици помалку. - Весна Јаневска – министерка за образование и наука

Откако обелодени дека само тројца ученици се запишале во земјоделската струка во средното училиште „Кузман Шапкарев“ во Битола и поради тоа ќе мора да бидат прераспределени во друга паралелка, Јаневска посочи дека поради долгогодишниот недостиг на интерес било предложено оваа струка да се префрли во регионалниот центар, но по реакциите од училиштето и локалната заедница, предлогот не бил реализиран. Според министерката, потребен е поголем ангажман на наставниците во промоцијата на струката и информирањето на деветтоодделенците за можностите што ги нуди таа професија.

- Ние сме имале примери на училишта со многу низок рејтинг кои со тек на време, токму поради ангажманот на наставниците, станале реномирани училишта. Тоа го покажува искуството. Кога велам дека треба да покажат ангажман, јас не ги критикувам, јас само ги замолувам да направат нешто за да ги задржиме нашите деца на соодветните места. - Весна Јаневска – министерка за образование и наука

Меѓу реализираните активности, Јаневска ги посочи и зголемените плати за наставниците, проширувањето на системот на стипендии, инвестициите во училишната инфраструктура и дигитализацијата на образовните услуги. Според неа, во изминатите две години биле вложени околу 70 милиони евра во образовни проекти, додека буџетот за високото образование и науката бил значително зголемен. Јаневска повтори и дека третa година по ред учебниците ќе бидат доставени до учениците на почетокот на учебната година, додека поддршката за инклузивното образование била зајакната со ангажирање на 1.350 образовни асистенти во основното и 150 во средното образование.

Македонија

Екоактивистите од струмичко по одлуката на Вишиот управен суд – ја продолжуваме битката против рудникот Иловица

„Нема да копате, отворивте војна со народот, народот не заборава и народот не се предава“ – порачаа од еколошкото движење „Здрава Котлина“

„Нема да копате, отворивте војна со народот, народот не заборава и народот не се предава“ – порачаа од еколошкото движење „Здрава Котлина“ по одлуката на Вишиот управен суд да ја поништи одлуката со која беше запрено спојувањето на концесиите за експлоатација на рудникот кај Иловица – Штука. Од таму велат дека пресудата не значи „зелено светло“ за работа на концесионерот Еуромакс, туку, судот само утврдил процедурални пропусти во владината одлука од 2023 за поништување на спојувањето на концесиите. Според нив, Вишиот управен суд не се произнел по суштинското прашање, дали концесиите се законски оти одамна се истечени роковите според Законот за минерални суровини. Од еколошкото движење за Канал 5 велат дека втор дом немаат, и дека за единствениот жестоко ќе се борат.

-Ние сме тука, ние ќе се бориме, а тие колку имаат желба да трошат енергија и ресурси за да се борат со нас, треба да им биде јасно. Треба да им биде јасно, ние втор дом немаме, тој е еден, па ако мислат дека туку така лесно ќе поминат преку нас мислам дека се лажат. Нас не ни е нешто ново, ние некогаш на мајтап си велиме ние се дома, тие доаѓаат кај нас, ние друга опција освен да се браниме и да штрајкуваме, и да вршиме притисок на властите бидејќи властите беа тие кои ни ветуваа. Ова што ни се случува од нашиве власти е играње – мачка и глушец- Цветанчо Ѓорѓиев – Еко-движење „Здрава Котлина“

Од „Здрава Котлина“ додаваат дека е симптоматично што државата не ја обжалила одлуката во предвидениот рок и дека Владата и натаму има механизми да го одбие спојувањето на концесиите на Еуромакс. Тие велат дека Струмица и 70тина села од околината ја користат подземната вода која при експлоатација би се загадила со сулфур и цијанид.Од владата пак, по одлуката порачаа дека станува збор за наследен процес од претходната влада и дека судската одлука мора да се почитува, но и еколошките стандарди.

-Приоритет останува создавање на услови за економски раст, нови инвестиции и отварање работни места, но тоа никогаш нема да биде на сметка на здравјето на граѓаните, природните ресурси и животната средина. Заштитата на јавниот интерес, почирување на највисоките еколошки стандарди и целосната законитост на постапките остануваат принципи од кои Владата нема да отстапи. - Влада на Република Македонија

Канал 5 се обиде да стапи во контакт со концесионерот „Еуромакс“ која го развива проектот Иловица – Штука и доби концесии во 2012 година за став, но до подготовка на прилогот не добивме одговор одговорија. Дел од медиумите пак пренесуваат дека од компанијата пресудата ја толкуваат како целосно враќање во сила на одобрението за спојување на концесиите „Иловица 6“ и „Иловица 11“, а воедно и дека очекуваат комуникација со властите за да го финализираат новиот договор, потребен за натамошен развој на проектот.

Македонија

Продолжува амандманска расправа за предлог законот за правична застапеност во Собранието

Во Собранието втор ден амандманска расправа за предлог законот за соодветна и правична застапеност.

Власта и опозицијата се обвинуваа дали предлог законот, кој треба да го наследи укинатиот балансер, го регулира или злоупотребува вработувањата во администрацијата.