Македонија

Пред компаниите промовиран новиот концепт за извоз на Стопанската комора

Седницата ја отвори Бранко Азески, претседателот на Комората, во улога на претседател на Националниот совет за извоз (НСИ).

Во Стопанската комора на Македонија пред компаниите членки на Клубот на извозници беше промовиран новиот концепт за извоз на Комората, со кој преку конкретни инструменти и алатки ќе се третираат сите прашања поврзани со промоција и со поддршка на извозните активности на компаниите.

Седницата ја отвори Бранко Азески, претседателот на Комората, во улога на претседател на Националниот совет за извоз (НСИ), кој во своето излагање потенцираше дека Комората веќе извесен период работи на градење нов пристап и стратегија за поддршка на домашниот извозен сектор и на домашните извозни компании, преку нов концепт кој се базира на три меѓусебно поврзани столба, и тоа:

1. НАЦИОНАЛЕН СОВЕТ ЗА ИЗВОЗ (НСИ), кој претставува национално и советодавно тело формирано во рамките на проектот „Поддршка на приватниот сектор за регионална економска интеграција“, кој го спроведува Комората во партнерство со Американската агенција за меѓународен развој УСАИД, како и платформа за јавно-приватен дијалог, која ќе обезбеди институционална поддршка за компаниите, со цел поголема интернационализација на македонскиот бизнис. Во Советот членуваат повеќе од 30 успешни извозни компании од различни извозни сектори, претставници на приватниот сектор и претставници на Владата и на надлежните државни институции. Преку Советот се третираат прашања поврзани со извозната конкурентност на земјата, со формите за поддршка на извозните компании, со трговската регулатива за олеснување на извозот и сл.

2. КЛУБОТ НА ИЗВОЗНИЦИ претставува специјализирано тело во рамките на новиот концепт за извоз на Комората, кое ќе им обезбеди организациска, техничка и логистичка поддршка на домашните извозници во насока на поголема извозна подготвеност и на поголема извозна промоција на македонските компании и производи на регионалните и на странските пазари. Клубот на извозници е најголема бизнис-асоцијација претставник на домашните извозни компании и неговата улога е да ги застапува интересите на домашните извозници како значајни чинители за националната економија.

3. ИНСТИТУТОТ ЗА ИЗВОЗ претставува клучна алатка која треба да испорача стручна и експертска поддршка за компаниите, преку аналитички и тренинг-центар. Аналитичкиот центар, преку изготвувањето стручни анализи и истражувања, ќе работи на идентификување на новите извозни можности за компаниите и преку конкретни форми на поддршка и модерни алатки ќе работи директно со компаниите во насока на изнаоѓање трговски партнери и воспоставување бизнис-релации, со цел пристап до нови пазари и зголемување на извозната активност на постојните пазари. Тренинг-центарот ќе работи на градење поголеми човечки и менаџерски капацитети на извозно ориентираните компании, преку специјализирани обуки и коучинг-програми со реномирани домашни и странски експерти, за да им помогне на македонските компании во делот на зголемување на конкурентноста, поголема видливост преку соодветни маркетинг-активности и градење брендови, поефикасно барање трговски и бизнис-партнери на странските пазари и подобро справување со институционалните и со регулаторните барања за настап на конкретни пазари.

Азески додаде дека во периодот што следува Комората, во координација со Владата на РМ и со нејзините институции, ќе разговара за конкретни форми на поддршка за извозните компании, за конкретен износ на средства од буџетот за таа намена, како и за институционалната форма на соработка меѓу државата и приватниот сектор, со цел успешна примена на националната стратегијата за извоз, која треба да испорача поголем извоз и поголем економски раст на земјата во иднина.

Проф. д-р Дарко Лазаров, претседател на Клубот на извозници, во своето излагање истакна дека Комората преку сет добро дизајнирани инструменти и модерни алатки, во рамките на новиот концепт, ќе работи во насока на обезбедување конкретна поддршка за македонските извозни компании во нивните напори за зголемување на конкурентноста и на извозната подготвеност, како и во нивните напори за изнаоѓање нови трговски и бизнис-партнери, влез на нови пазари и поголема видливост на меѓународните пазари.

На седницата на Клубот на извозници, по предлог на претседателот д-р Лазаров, покрај постојниот потпретседател Анатол Кутревски од ПЕКАБЕСКО АД Скопје, беа избрани и двајца нови потпретседатели на Клубот:

· Евгенија Ангеловска – ЛАМИНАТИ КОМ ДОО Прилеп

· Зоран Н. Илиев – АКТИВА ДОО Штип

На тој начин, Клубот на извозници значително ја зајакна својата менаџментска структура со млади професионалци и претставници на успешни извозни компании, кои како тим, заедно со претседателот Лазаров, ќе работат на операционализирање на новиот концепт на Комората за поддршка на извозните активности на домашните компании.

Истовремено, д-р Лазаров најави дека на следната седница на Националниот совет за извоз една од точките за кои ќе се дискутира е примена на стратегија за промоција на извозот на РМ (2024 – 2028), како основа за обезбедување системска поддршка за извозно ориентираните компании од државата и за институционално олеснување на извозните активности.

На седницата беше промовирана и дигиталната извозна платформа EASY EXPORT, алатка креирана преку истоимениот проект на УСАИД, која обезбедува корисни информации за извозните компании, поврзани со надворешната трговија, во делот на базите на податоци за трговските посредници на одделни пазари, законските и регулаторните барања, царинските и нецаринските бариери, повиците за поддршка, корисните анализи и сл. Истовремено, од платформата EASY EXPORT произлегува и директориумот за извоз, кој содржи дигитални профили за повеќе од 1.000 македонски извозни компании.

Истовремено, на седницата беа претставени и активни повици наменети за компании чија цел е зголемување на конкурентноста и поддршка во процесот на развивање на извозните капацитети во делот на дигитализацијата, воведувањето меѓународни стандарди за квалитет, технолошки развој и градење извозна мрежа на странските пазари.

Стопанска комора на Македонија

Македонија

30 дена притвор за осуммина од уапсените во акцијата „Адитив“, 13 со мерки за претпазливост

Кривичниот суд определи 30 дневен притвор за 8 од уапсените лица во акцијата „Адитив“, за едно лице, поради здравствени проблеми е определен домашен притвор, за останатите 13 пак, се определени мерки на претпазливост.

Меѓу оние кои добија притвор е и поранешниот директор на ЕСМ Васко Стефанов, кој утринава со лисици од полициско комбе беше спроведен во кривичниот суд, откако вчера беше уапсен на граничниот премин Табановце. Во меѓувреме и натаму се трага по неговиот претходник Васко Ковачевски кој не е во земјава, за кој во отсуство, од судот велат, не можат да изречат построги мерки. Министерот Тошковски посочи дека тој и натаму е недостапен за органите на прогон, но ги отфрли шпекулациите дека Ковачевски се откажал од македонското државјанство.

„Лицето кое што го напоменавте не е достапно на органите на прогон, органите на прогон ќе сторат се во рамки на нивната законска надлежност да постапат се со цел да истото биде обезбедено и биде изведено пред лицето на правдата. Она што е факт е дека посоченото лице е во рамки на регистарот на државјани на Македонија, истото е државјанин македонски и не побарало отпуст, согласно информациите кои ги имам во овој момент.“

При вчерашните апсења извршени се 77 претреси, во кои се пронајдени 208.000 евра во различни валути, а одземени се мобилни телефони, документација, компјутери и лаптопи, и БМВ од понов датмут. Исто така дадени се пет предлози за замрзнување на имоти, велат од обвинителствотО. Министерот Тошковски вели дека сето она што е одземено во постапката или допрва ќе се одзема, ќе биде вратено во буџетот.

„Луѓе кои преку ноќ, без вработени, формирале фирми кои до вчера се занимавале со канцелариски материјали, наеднаш стануваат фирми кои што тргуваат на големо со ваков тип на адитиви и притоа заработуваат милионски суми кои што се три пати од пазарните цени, нели постојат основани сомненија и и те како голем број на докази дека она што е плаќано, е плаќано најмалку три пати повеќе од реалната цена која што би требало да се плати. (04 54). После ние ќе говориме дали имало душманско крадење на народот. Ај што имало душманско крадење туку тоа било толку многу дрско, што си дозволувале на еден бесрамен начин да ги прават овие работи.“

Во вчерашната акција „Адитив“ беа уапсени 22 лица во неколку градови во земјава поради сомнежи за перење на пари и криминал за јавни набавки на адитиви, за кои надлежните велат дека во ТЕЦ Осломеј од истите не е потрошен ниту еден процент, а во РЕК Битола 95% од адитивите никогаш не биле употребени и тоа во ек на енергетска криза. Уапсените, според пресметките ја оштетиле државата за 6,5 милиони евра.

Свет

Меѓународниот аеродром на Хаити повторно отворен

Главниот меѓународен аеродром „Тусен Лувертур“ на Хаити повторно е отворен денеска, еден месец откако беше затворен поради насилства на локално банди.

Војниците и полицијата на Хаити, со поддршка на кениската полиција која ја предводи мисијата на ОН, ја зајакнаа безбедноста во областа, се вели во соопштението на владата на Хаити.

Аеродромот „Тусен Лувертур“ во Порт-о-Пренс беше затворен во средината на ноември, откако банди отворија оган врз авион што требаше да слета. Тој ден цел на напад беа и други авиони. Еден ден подоцна, Федералната управа за воздухопловство им забрани на американските авиокомпании да летаат до оваа карипска земја на 30 дена.

Засега не е јасно кои летови ќе продолжат до Порт-о-Пренс денес. Забраната на Федералната управа за воздухопловство е на сила до утре. Денеска повторно беше отворен терминалот кој опслужува домашни летови.

Во изминатиот месец, единствениот меѓународен аеродром што функционира на Хаити беше оној во северниот град Кап-Хаитиен, но патувањето таму по копно е опасно, бидејќи бандите ги контролираат главните патишта што водат до и од Порт-о-Пренс. /МИА

Свет

Џонг-хјун: Претседателот Јун Сук-јеол лично го прегледа декретот за воведување воена состојба

Претседателот Јун Сук-јеол лично изврши правна проверка на декретот за воена состојба што го донесе минатата недела и учествуваше во пишувањето на конечниот текст, изјави денеска поранешниот јужнокорејски министер за одбрана Ким Џонг-хјун.

Доскорешниот министер за одбрана ова им го кажа на обвинителите за време на неговото прво испрашување по апсењето, објави денеска Јонхап.

За време на петчасовното испрашување, поранешниот министер за одбрана наводно сведочел дека Јун Сук-јеол лично извршил правна ревизија на прогласувањето воена состојба и дека тој и претседателот заедно го напишале последниот нацрт, додека Јун Сук-јеол уредувал дел од содржината.

Ким Џонг-хјун, исто така, рече дека на 1 декември доделил должности поврзани со прогласувањето воена состојба на највисоките воени функционери, кога се обидел да влезе во објекти поврзани со Националната изборна комисија за да обезбеди докази поврзани со наводите за наводна изборна измама.

Поранешниот министер за одбрана во текот на изминатата ноќ се обидел да си го одземе животот во притворскиот центар „Донгбу“ во Сеул, каде што се наоѓа под обвинение за бунт, но моментално е во стабилна состојба, соопшти Министерството за правда.

Ким беше уапсен под обвинение дека му помагал на претседателот Јун Сук-јеол да ја спроведе прогласената воена состојба, која беше окарактеризирана како бунт.

Според законот, планирањето бунт се казнува со смрт, доживотен затвор или минимална казна затвор од пет години.

Јужнокорејската казнена служба на состанокот на парламентарната законодавна комисија објави дека Ким е во заштитна ќелија по обидот да си го одземе животот./МИА