Институциите мора сериозно да ги проверат сите наводи за работењето на гувернерот на НБРМ Трајко Славевски – смета поранешната судијка Маргарита Цаца Николовска. На тој начин според неа ќе се отстранат дилемите за нерегуларности околу носењето на одлуките на вицегувернерките со истечен мандат, но и дали тие имале право на паричен надомест за тој период. Според неа, надлежните органи мора темелно и непристрасно да ги разгледаат сите аспекти, со цел да не се остави никаков сомнеж за работата на самата институција.

„Овој случај предизвика голема заинтересираност и штом такви случаи се појавуваат и штом се индицираат одредени ситуации дека можеби ги довеле до некакви незаконите однесувања, мислам дека јавноста има право да знае каква е состојбата и во која насока се движи. А за сето тоа има институции кои што треба да постапуваат и да донесуваат соодветни решенија. Јавноста во таа насока ќе биде не само информирана туку ќе види дека институциите работат по одредени прашања кои што се проблематични.“

Законскиот рок за избор на нови вицегувернери, инаку како што веќе објави Канал 5, е пробиен три месеци. Според временската рамка, првата фаза односно објавување на огласот за избор на нови вицегувернери на 8 јули 2025 година не била изложена на никакво влијание од изборниот процес, односно од изборите кои биле распишани на 9 август. Мандатот на вицегувернерките истекол на 18 октомври, а изборите и официјално биле прогласени за завршени на 11 ноември. Втората фаза за избор, од 45 дена, со вклучен мораториум за време на избори, максимално морал и можел да заврши на 18 декември. Крајниот рок за одлука или последен ден од деблокирање на процесот бил на 26 декември. Ситуацијата во меѓувреме ја следи и јавното обвинителство, а новиот државен јавен обвинител Савески пред два дена рече дека доколку има основ ќе се постапи и ќе се отвори предистражна постапка. Поранешната судија Николовска вели дека станува збор за материја која што задира во повеќе законски решенија, а обвинителството ќе треба да ги има предвид сите аспекти пред да донесе одлука.

„Од она што го слушнав од државниот јавен обвинител постапката по оценување е во тек, значи сите овие прашања што вие го поставивте, се прашања што обвинителството ќе треба да ги има во предвид пред да донесе одлука. Најмал е проблемот околу примање на надоместокот заради тоа што, треба да се види врз основа на што, кое било нивното својство, дали постоела можност да бидат назначени за в.д. или не, колку време можеле таа функција да ја извршуваат, итн.“

Славески пред неколку дена беше прашан за случајот со двете вицегувернерки кои и пет месеци по истекот на нивниот мандат на 22 октомври минатата година работат и одлучуваат во Советот на НБРМ, но наместо да даде одговор, тој упати обвинувања до Канал 5 и новинарите кои не прекинаа и покрај повиците од новинарските здруженија да покаже почит и транспарентност. До сега од опозициската СДСМ веќе побараа обвинителството да отвори предмет, а од владејачката ВМРО-ДПМНЕ посочија дека прашањето дополнително ќе го разгледуваат.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.