Локалните извори посочуваат дека бројот на жртви може да биде поголем.
Повеќе од 450 луѓе загинаа или се повредени во пожарот на свадбата, според објавата на ирачката Црвена полумесечина на X, порано Твитер. IRCS е независна организација за хуманитарна помош во Ирак.
Наџим ал-Џубури, гувернер на провинцијата Ниневија, каде што избувна пожарот, претходно изјави дека сè уште нема конечен биланс на загинати, што укажува на тоа дека бројот на жртвите може да продолжи да расте. Заменик-гувернерот на Ниневија, Хасан ал-Алак, исто така претходно изјави дека е потврдена смртта на 113 лица.
Пожарот, соопшти локалната цивилна одбрана, ја зафатил големата сала во која се одржувала венчавката, на која имало 900 гости, откако за време на прославата бил запален огномет.
Првичните информации покажуваат дека зградата била направена од многу запаливи и забранети градежни материјали, што придонело за брзото уривање, јавија ирачките државни медиуми. Станува збор за метален композит и немодифициран полиетилен кој предизвика пожарот брзо да се прошири, а се работи за истиот тип на надворешна обвивка што е користена при изградбата на лондонската кула Гренфел. Да потсетиме, 72 лица загинаа во пожарот во облакодерот во 2017 година.
Според официјалните изјави, ирачките федерални власти и властите во полуавтономниот регион Курдистан во Ирак испратиле амбулантни возила и медицински тимови на местото на трагедијата.
„Пожарот предизвика уривање на делови од салата како резултат на употребата на многу запаливи, евтини градежни материјали кои се рушат за неколку минути по пожарот“, соопшти ирачката управа за цивилна одбрана.
Очевидци изјавиле дека стотици луѓе славеле таму кога зградата се запалила околу 10:45 часот по локално време. „Го видовме огнот како пулсира и излегува од салата. “, изјави Имад Јохана, 34-годишник кој избегал.
Друга гостинка на свадбата, Ранија Ваад, која се здобила со изгореници на раката, рече дека огнометот „почнал да се качува до таванот“ додека невестата и младоженецот танцувале. Целата сала била во пламен. „Не можевме да видиме ништо“, изјавила 17-годишната девојка за новинската агенција АФП. „Се гушевме, не знаевме како да излеземе“, додаде таа.
Во пожарот загинале и младенците, изјави Ахмед Дубардани, заменик-шеф на здравствената администрација во Ниневија. Обраќајќи им се на новинарите на прес-конференција, тој додаде дека најмалку педесет лица се во критична состојба, од кои најмалку половина се здобиле со изгореници.
„Повеќето од повредените беа целосно изгорени. А некои изгореа од 50 до 60 отсто од нивните тела. Ова воопшто не е добро“, рече тој. Тој додаде дека повеќето од повредените се млади мажи и жени, а засега никој не е пуштен од болница.
Портпаролот на ирачкото Министерство за здравство, Саиф ал Бадр изјави дека повеќето од луѓето починале од тешки изгореници и задушување.
Спасувачите се уште ги пребаруваат јагленосаните урнатини. Луѓето се собраа во дворот на блиската болница за да даруваат крв. На местото на трагедијата пристигна камион-ладилник натоварен со црни вреќи.
Ирачката новинарка Блеса Шавејс вели дека една од главните причини за големиот број жртви е тоа што нема доволно „логистички алатки за спасување на луѓето“. „Затоа повеќето од жртвите се префрлени во регионални болници како болницата во Ербил, која е многу подобра од болниците во другите градови во Ирак и е блиску до Мосул“, изјави тој за Би-Би-Си.
Блеса вели дека жртвите се со изгореници и се во „лоша состојба“ и дека болниците во Мосул немаат доволно амбулантни возила, персонал и медицинска опрема.