Марија Калас – сопранот кој го освојувал светот, но чијшто љубовен живот бил обележан со страшни скандали и емотивни понижувања.

Марија Калас била жена со извонреден талент чијшто глас ги освојувал светските сцени, но нејзиниот приватен живот бил обележан со драма и скандали. Иако станала симбол на музичката уметност, нејзиниот љубовен живот често ги засенувал нејзините професионални успеси, правејќи ја предмет на фасцинација, но и на осуда.

Холивудската актерка Анџелина Џоли ја доби улогата на Марија Калас во биографската драма која го истражува животот на легендарната оперска пејачка. Џоли изрази голема почит кон Калас, нагласувајќи ја важноста на одговорноста при толкувањето на овој силен лик.

„Ќе дадам сè од себе за успешно да одговорам на овој предизвик“, изјави актерката непосредно пред да го овековечи ликот на жената чијшто живот го одбележаа и успехот и трагедијата.

Почеток на блескава кариера

Марија Калас е родена во 1923 година во Њујорк, а нејзината уметничка кариера како оперска пејачка започнала уште во младоста.

Препознаена како исклучителен талент, таа набргу станала светски познат сопран, настапувајќи на најпознатите сцени, како што е операта Ла Скала во Милано, каде што пеела во текот на 1950-тите. Нејзиниот глас ги освојувал срцата на публиката ширум светот.

„Многу сериозно ја сфаќам одговорноста за животот и наследството на Марија“ – изјави Анџелина Џоли, зборувајќи за улогата, за која призна дека е голем предизвик за неа.

Љубов, страст и скандали

Сепак, животот на Марија Калас не бил само во нејзината кариера, туку и во турбулентните љубовни врски кои често доминирале во медиумите. Нејзиниот прв брак бил со италијанскиот бизнисмен Џовани Батиста Менегини. Овој брак, според Марија, бил без страст, но ѝ обезбедувал стабилност. Таа своевремено го опишала Менегини како „тивок и резервиран“, но и како „пријател и татковска фигура во нејзиниот живот“. Сепак, на крајот, бракот не бил среќен, а Марија по неколку години влегла во врска која целосно ѝ го променила животот.

Судбоносната средба меѓу Марија и грчкиот милијардер Аристотел Оназис се случила во Венеција во 1959 година, на бал. Иако и двајцата биле во брак, нивната романса станала една од најпознатите љубовни приказни во тоа време.

Оназис во тоа време бил во брак со Атина Ливанос, но тоа не ја спречило неговата афера со Калас. Од друга страна, Марија ставила крај на бракот и побарала развод од сопругот, додека медиумите набргу почнале да ја доживуваат само како љубовница на Оназис, заборавајќи на нејзината величина како уметница.

- Колку сакаш за Марија? Пет или десет милиони? – го прашал Оназис сопругот на љубовницата, што покажува колку неговата афера со Марија била обележана со скандали и контроверзии.

Иако никогаш не го официјализирале бракот, Оназис и Калас биле во врска до неговата смрт во 1975 година, а таа му била љубовница до крајот на неговиот живот.

Љубовниот однос и трагедијата

Иако биле вљубени, нивната врска не била без проблеми. Оназис бил длабоко амбивалентен кон Марија, иако бил маѓепсан од нејзината слава, во неколку наврати ја понижувал.

- Имај на ум, љубов моја, дека ти не си ми жена, ниту куќна помошничка, ти си само гостинка, како пејачка во ноќен клуб со свирче во грлото - ѝ велел тој, понижувајќи ја во моментите кога била емотивно ранлива.

Освен тоа, Оназис често ја понижувал Марија преку нејзиниот физички изглед. Знаел дека е емотивно ранлива и често го користел тој факт да ја повреди. На пример, откако во една прилика купила нова шапка, Оназис ѝ рекол:

- Купи си нова шапка или направи си од дел од носот.

Ваквата емоционална злоупотреба била вообичаена во нивната врска, каде што Оназис манипулирал со нејзините чувства и самодоверба. Друг пример за неговата брутална искреност е неговиот одговор за нејзината бременост. Кога дознал дека е бремена, Оназис бурно реагирал велејќи:

- Веќе имам две деца. Што ќе ми е уште едно?

Еден од најтешките моменти во животот на Марија била смртта на нејзиниот син, кого го родила во 1960 година. Синот Омеро Ленгрини починал неколку часа по раѓањето, а Марија била принудена да ја сокрие трагедијата. Загубата на детето, како и несреќните љубовни врски, длабоко влијаеле на нејзиниот професионален живот. Нејзиниот глас почнал да слабее, а тоа го забележала и нејзината публика.

-Последните години биле страшни за неа, иако сè уште била присутна на сцената, многумина коментирале дека нејзиниот глас повеќе не е оној божествен глас што ја прославил - напишале биографите за Марија.

Нејзината кариера почнала да опаѓа, а таа сè повеќе се повлекувала од очите на јавноста.

Крајот на кариерата и последните денови

Последната година од нејзиниот живот била исполнета со тишина. По смртта на Оназис, Марија продолжила да снима филмови, вклучувајќи го и „Медеја“ од 1977 година, но нејзиното срце никогаш не било исто. Иако била исклучително посветена на уметноста, животот ѝ зел голем дел од внатрешната сила.

Една година по смртта на нејзиниот љубовник, Марија Калас починала од проблеми со срцето предизвикани од прекумерна употреба на седативи. Таа починала во 1977 година на 54-годишна возраст. По нејзината смрт, дел од нејзината пепел е расфрлана во Јонското Море, во близина на островот Скорпиос, каде што бил погребан Оназис.

„Нејзината пепел беше расфрлена по Јонското Море, во чиј центар се наоѓа островот Скорпиос, каде беше погребан Оназис, бидејќи таа секогаш беше против кремирањето и не сакаше да заврши во урна“, се вели во извештаите.

Нејзината смрт поттикна бројни теории и шпекулации, некои дури шпекулираа дека е убиена и дека тоа е потенцијално поврзано со нејзиниот повереник, пијанистот Васо Девечи, кој наводно ѝ го украл тестаментот и вредните предмети. И покрај овие теории кои не се докажани, едно е сигурно - Марија Калас остави неизбришлива трага во светот на музиката, нејзината уметност е препознаена како единствен феномен, а нејзиниот живот сè уште инспирира многумина.