- „Топлиот културен бран“ несомнено ја постигна својата цел, дисперзирање на културните содржини. Создаде еден силен културен импулс кој ги допре и областите на неформалната едукација и презентација на културните вредности кои ги поседуваме како држава, рече на денешната прес-конференција министерката за култура Елизабета Канческа-Милевска. Изрази надеж дека настаните ќе го збогатат културното живеење во сите општини во Македонија.

Годинава „Топол културен бран“ ќе има во општините Вевчани, Валандово, Велес, Градско, Кавадарци, Ресен, Маврово-Ростуше, Пехчево, Пробиштип, Радовиш, Крива Паланка, Кривогаштани, Могила, Неготино, Кочани, Дојран, Гевгелија, Демир Капија, Македонска Каменица, Кратово, Делчево, Охрид, Берово, Кичево и Богданци.

Во рамки на „Топлиот културен бран“, посетителите ќе уживаат во концертите на „Монистра“, „Љубојна“, „Чалгија саунд систем“, во концертите на џез и сериозна музика со гости од целиот регион, настапи на сите театри од Република Македонија, стенд-ап изведби на актерите Сашко Коцев, Весна Петрушевска, Маријан Ѓоргиевски, ревија на македонски филмови...

Манифестацијата „Топол културен бран“ првпат е воведена во 2008 година. Досега граѓаните имаа можност да присусуствуваат на повеќе од 600 културни настани.

Министерката за култура истакна дека континуирано поддржуваат огромен број традиционални манифестации, над 150 фестивали кои имаат и меѓународен предзнак. Од оваа година Министерството за култура е поддржувач и на новиот театарски фестивал во организација на МНТ, меѓународниот театарски фестивал на комедијата „Гола месечина“ и театaрскиот фестивал кој ќе се реализира на повеќе отворени сцени во општина Чаир.

Градоначалниците на Берово, Ресен, Крушево, Велес и Дојран се согласија дека сите културни настани ќе придонесат за збогатување на туристичката понуда во општините.