Пред 10 г. актерката со семејството побегнала од скиентологијата, но последиците сè уште постојат.

Животот за актерката Лиа Ремини бил „постојана борба“ откако ја напуштила скиентолошката црква пред повеќе од една деценија, вели таа. Актерката од „Кралевите на Квинс“, која јавно ја критикува оваа религија, тврди дека нејзините искуства по напуштањето на црквата ја исполниле со депресија, анксиозност и страв. Таа, исто така, тврди дека нејзините пријатели и семејството се „загрозени“ по наводната оркестрирана операција од оние во организацијата.

Ремини ја напуштила црквата во 2013 година, но во објава на социјалните мрежи споделила дека неодамна почнала да си дава шанса да излезе од својот дом.

View this post on Instagram

A post shared by Leah Remini (@leahremini)

- Помина една деценија откако избегав од скиентологијата со моето семејство, но постојано се борам да го доживеам својот живот. Ќе имам добар ден и ќе си помислам „Во ред, утре ќе продолжам да ги правам работите што сакам да ги правам“, а потоа ме надвладува депресијата. Ме обзема страв и наоѓам причини да не излезам- изјавила актерката откривајќи ги деталите од својата борба.

Откако ја напуштила црквата, Ремини тврди дека „постојано е следена од скиентолошките оперативци и агенти“.

„Овие луѓе се кријат во сенка за да го следат моето движење, следат со кого се сретнувам за тоа да го пријават во скиентолошката разузнавачка агенција, Канцеларијата за специјални работи“, напишала таа, тврдејќи дека членовите на црквата направиле „провокативни фотографии со неа“ и регрутираат „загрозени лица кои живеат со тешки ментални болести“ за да ја вознемируваат и заплашуваат.

Освен со ваквите влијанија врз нејзиното ментално здравје, актерката навела дека се бори и со физичките последици од менопаузата.

-Не само што одеднаш добив осип и имав некоја алергиска реакција, туку поминувам и низ перименопауза – стои во дел од потресното сведочење на актерката.

Сепак, таа набргу добила одговор од скиентолошката црква. Нивниот портпарол се огласил со следните зборови:

- Ако Ремини повеќе не може да добие работа, не може да обвинува никого освен себеси. Очигледно, сите во Холивуд сега го знаат она што веќе го знаевме: Ремини е ужасна личност и токсична за многумина кои ја имаат таа несреќа да стапат во контакт со неа - се вели во соопштението.

Во јануари 2022 година, Ремини споделила зошто престанала да стекнува формално образование како тинејџерка. - Л. Рон Хабард, основачот на скиентологијата, длабоко го презирал конвенционалното образование и бидејќи сè во скиентологијата се води според неговите политики, без простор за толкување, моето образование беше прекинато - тврди таа на социјалната мрежа „Х“ (поранешен Твитер).

Актерката, во нејзината книга од 2016 година „Бељаџиja: Преживувајќи го Холивуд и Скиентологијата“ (Troublemaker: Surviving Hollywood and Scientology) изнела бројни тврдења за скиентолошката црква, во која меѓу познатите членуваат Том Круз и Џон Траволта.

ПРИНЦИПИ НА СКИЕНТОЛОГИЈАТА

Скиентологијата учи дека луѓето се бесмртни духовни битија, кои ја заборавиле својата вистинска природа. Митологијата се развила околу поимот „тетан“. Во скиентологијата, тој термин претставува „космички извор и животна сила“. Тетанот е „вистинскиот човечки идентитет“ и во далечното минато, тетаните „го формирале физичкиот универзум“. Официјалните скиентолошки списи сметаат дека тетаните се бесмртни вонземски духови кои предизвикуваат „духовна штета на човечките тела“. Затоа скиентологијата на своите курсеви, кои се сочинети од неколку „нивоа“, а најважните се плаќаат, ги учи луѓето како наводно да го препознаат тетанот во себе и да се ослободат од духовната болка.

Основач на скиентологијата е американскиот писател на научна фантастика Рон Хабард, роден во 1911 година во американската држава Небраска. Хабард ја основал првата скиентолошка група во 1953 година. Пред да ја „основа“ скиентологијата како нова религија, Хабард се претставувал себеси како основач на „модерната наука за ментално здравје“ која ја нарекол Дијанетика. Дијанетиката би требало да претставува „систем на психотерапија“, а нејзините основни „принципи“ се наведени во книгата „Дијанетика: модерна наука за менталното здравје“ објавена во 1950 година.

Извор: srecna.republika.rs

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.