Портрет на Џон Кенеди - најурнебесниот меѓу политичарите: Како еден сенатор го чува Уставот и како во Вашингтон да докажеш дека не си глупав - Канал 5

Живот

Портрет на Џон Кенеди - најурнебесниот меѓу политичарите: Како еден сенатор го чува Уставот и како во Вашингтон да докажеш дека не си глупав

Како еден американски сенатор го чува Уставот со „сакам да купам базука“ и „дали мажот може да дои бебе“.

Портрет на Џон Кенеди - најурнебесниот меѓу политичарите: Како еден сенатор го чува Уставот и како во Вашингтон да докажеш дека не си глупав

Портрет на ЏОН КЕНЕДИ – НАЈУРНЕБЕСНИОТ МЕЃУ ПОЛИТИЧАРИТЕ

Како еден американски сенатор го чува Уставот со „сакам да купам базука“ и „дали мажот може да дои бебе“.

„Сакам да купам базука, најдов една поволна понуда во Европа. Може ли да ја купам, да ја поседувам и да користам овде во Америка?“. Вака 74-годишниот републикански сенатор Џон Кенеди го провери идниот американски судија Ендру Дејвис за тоа како ќе си ја врши својата работа.

Испрашување на идните судии со апсурди

Кенеди веќе подолго време гради препознатлив стил на сослушувања во Сенатот: кратки, често апсурдни хипотетички сценарија со кои ги турка кандидатите во правни и вредносни агли. Проверува дали тие се ставаат во одбрана на граѓаните, нивната слобода и правото на приватна сопственост или пак, на страната на бирократијата. Од друга страна го тестира нивното правничко знаење (и самиот е правник кој студирал право на дури три универзитети): што ќе одберат уставен амандман или пак, федерален закон и зошто.

Сепак, зад хуморот стои јасна стратегија – поедноставување на комплексни правни прашања.

Хуморот како политичко оружје

„Сенаторот што сака да купи базука“ е последното вирално видео на Кенеди во кое тој всушност ја реотвара дебатата за Вториот амандман – дозвола да се носи оружје за самоодбрана наспроти забраните од Националниот закон за огнено оружје. Но, не и единствено... Во ера кога вниманието е ограничен ресурс, Кенеди ја разбира логиката на дигиталната публика: кратко, остро и забавно.

Она со што најмногу привлекува е уникатниот хумор, говори полни со народни метафори. Сенаторот користи јужначки акцент, суров е и директен кон соговорниците, без лажна политичка коректност.

Периодов во фокусот му се миграциските прашања. Минатата недела на седница на Сенатот најави дека ќе ги брка своите колеги-сенатори „како да му го украле Божик“ само за да прифатат закон за идентификација на гласачите на избори со американско државјанство и лична карта со фотографија. Во негов стил, мртов-сериозен на крај се шегува со неколку сенатори демек им го греши името, со цел да ги прозве за гласање. „Дали е тоа во ред за тебе, Макс? Ооо, ти не си Макс. Ти си Бред. Во ред“, вели републиканецот. Со вакви потези, тој успева да го задржи вниманието – и на јавноста, и на политичката сцена. Инаку, колку за информација на обичниот македонски гласач кој остава отпечаток од прст при гласање, а претходно беше прскан итн, во САД сега може да се гласа без лична карта.

Меѓу сатира и стратегија

Кенеди отворено се залага за фискална дисциплина, редовно критикувајќи ги федералните агенции дека трошат „како пијан морнар“ – со забелешка дека „пијаниот морнар барем троши свои пари, додека Вашингтон ги троши парите на даночните обврзници“. Со вакви формулации, тој ја поедноставува комплексната буџетска политика во јасна, лесно пренослива порака за јавноста.

Неговите метафори често одат и чекор понатаму. Кога сака да дискредитира експерти или функционери кои, според него, нудат некомпетентни ставови, знае да каже дека тоа е „како да прашате калуѓерка за секс“ – контроверзна, но медиумски ефективна споредба.

„Да или не?“

Покрај „испрашувањето на судиите“, Кенеди посебно е урнебесен кога ги сослушува експертите што се повикани во комитетите, а кои доаѓаат од таборот на демократите. Често се повикува на уставните амадмани, но ги предизвикува соговорниците со апсурдни примери со цел да ја прикаже нивната контрадикторност. При тоа, за да не се избега од поентата, Кенеди често вели: „Не ми терај говори. Одговори: да или не?“. На крај си дава и заклучоци, па наместо да заклучи политички коректно: „Не ја зборувате вистината“, коментира: „Готов(а) си како пржена кокошка“.

Заборавете на политичка коректност

Пред две недели пак, Кенеди успеа за нецели 8 минути да изигра симулатнка и да победи дури тројца соговорници – експерти блиски до демократите на тема: илегалните мигранти. Кенеди сака да покаже дека демокртатските експерти често ги преувеличуваат антимигрантските политики на Трамп со користење на термини како етничко чистење, но дека всушност тие не се борци за човекови права туку во мигрантите само гледаат нови гласачи.

Најостро помина Дејвид Биер, демократски експерт, близок на претходната администрација на Бајден, познат по неговите анализи во Като институтот кои се сметаат за најрелевантни во одбрана на државната помош за илегалните мигранти. Накусо дел од дебатата:

Кенеди: Не мислите ли дека вашите преувеличени изјави ја поткопуваат вашата кредибилност?

Биер: Која преувеличенa изјава сум ja дал?

Кенеди: Рековте, цитирам: „Ако пресудите против агендата на Трамп за чистење на населението...“ — тамам без хипербола тука — „националистите ќе ве обележат, ќе ви се закануваат и ќе тргнат по вас.“

Биер: Кога зборувам за „чистење на населението“, мислам на тоа дека се обидуваат да депортираат луѓе родени во САД. Луѓе родени тука. Се обидуваат и нив да ги депортираат...

Кенеди: Од која планета паднавте? Ми го предизвикувате нагонот за повраќање.

Бестселер автор

Продемократските медиуми го критикуваат како карикатура во политиката, прорепубликанските пак, како народен политичар. На социјалните медиуми тој е омилениот сенатор за урнебесни видеа од негови говори од Сенатот и коментари. Анкетите пак, редовно го издвојуваат како еден од најпопуларните сентори во САД. На локално ниво, во Лузијана - од каде и доаѓа, според последната анкета на Морнинг Консалт дури 55 отсто од граѓаните ја поддржале неговата работа во Сентатот.

Од пред неколку месеци, според Њујорк тајмс сенаторот Кенеди е и бестселер автор со книгата „Како да докажеш дека не си глуп: И зошто Вашингтон никогаш нема да го постигне тоа“ (“How to Test Negative for Stupid: And Why Washington Never Will”). Се работи за политички сведоштва на Кенеди од Сенатот, но со многу хумор и сатира на приликите во Вашингтон, како продолжение на култниот предизборен спот во кој застанат на бела позадина коментира:

„Луѓето велат дека сум премногу директен. Точно е. Имам право да молчам — само немам способност за тоа. Јас сум едноставно тоа што сум, Џон Кенеди. Луѓе, никогаш нема целосно да се вклопам кај сите тие вашингтонски инсајдери и елитисти на кои им ги повредувам чувствата. Еве ви еден бесплатен совет: купете си пони за емоционална поддршка, затоа што јас нема да замолчам. И уште нешто — секогаш бидете свои... освен ако сте ептен катастрофа“.

Не мора да бидете будала за да ве изберат во Сенатот, таму со задоволство ќе ве направат таков

Еве уште еден сегмнет од неговиот урнебесен, но крајно интелигентен хумор.

На прашањето дали американскиот Сенат е толку глупав како што изгледа однадвор:

-Па, дозволете ми да кажам вака. Не мора да бидете будала за да бидете избран во Сенатот на Соединетите Држави. Внатре, со задоволство ќе ве обучат да бидете будала. Знаете, Конгресот е непопуларен. Разбирам зошто. Секоја анкета што ја видов, покажува дека ние сме популарни колку што се популарни габичните инфекции на ноктите на нозете. Постои причина за тоа. Мислам дека дел од тоа генерално, тоа што Американците денес, американските луѓе имаат многу помала доверба во своите институции. И тоа е, искрено, вина на двете партии. И тоа се случува во подолг временски период. Единствената институција што ја знам, можеби има и други во кои американскиот народ изгледа има доверба е војската, но освен тоа, бројките се намалени. Делумно, дозволете ми да го кажам ова, и ако бидам предолг, прекинете ме, делумно причината е што многу луѓе се жалат дека Сенатот не прави ништо. И знаете, стара е шегата дека да не се прави ништо е тешко. Зошто, Затоа што никогаш не знаете кога ќе завршите. Но, делумно, Сенатот постои токму затоа.

Од друга страна, околу половина од мојата работа е да промовирам добри идеи. Другата половина од мојата работа е да убивам лоши идеи. И тоа, во голема мера објаснува зошто Сенатот се движи толку бавно. Мислам дека и нашите основачи го имале тоа на ум, односно сакале Сенатот токму така да функционира.

Може ли мажот да дои бебе?

Во интервју за Фокс Њуз, пак, на забелешката дека анкетите покажуваат водство на демократите пред републиканците кога станува збор за економската состојба во САД, Кенеди вели:

-Слушајте, мислам дека анкетата е точна. Кога мајките и татковците лежат будни навечер и не можат да спијат, тие не лежат таму грижејќи се – како што понекогаш мислат демократите – дали мажот може да дои бебе.

Тие се загрижени за трошоците за живот. Уморни се од тоа што мора да продаваат крвна плазма само за да купат намирници. Исцрпени се од растечките трошоци за домување и повисоките премии за осигурување. Би можела да продолжам да редам без престан.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Судбина

Жена лови риба на плажа, кога наеднаш се издигна огромен бран и ја „проголта“ (ВИДЕО)

Ова е застрашувачкиот момент кога жена која ловела риба на плажа во Калифорнија била однесена во морето од моќен, ненадеен бран.

Жена лови риба на плажа, кога наеднаш се издигна огромен бран и ја „проголта“ (ВИДЕО)

Бе Кадоте, 47-годишна жителка на Пацификот, ловела риба на плажата јужно од Пацифик Мол кога бранот ја удрил, соборувајќи ја од нозе и влечејќи ја околу 30 стапки од брегот, објавува Њујорк пост.

Снимките од безбедносните камери го забележале драматичниот момент кога Кадоте била однесена во разбрануваното море.

„Се чувствував како да ме вртат во машина за перење“, изјави таа за АБЦ.

Таа го опиша бранот како сосема неочекуван и рече дека веднаш сфатила во каква опасност се наоѓа.

„Едноставно ме проголта. Знаев токму тогаш дека доаѓа по мене. Си одам. Ќе ме однесе. Нема шанси да се извлечам од ова“, рече таа.

Додека моќната вода ја однесе подалеку од брегот, Кадотова одлучи да не се бори против огромната сила на брановите, туку да ја препушти својата судбина на повисока сила.

„Ги затворив очите и се помолив: Боже, ако ова е твоја волја, разбирам, но те молам не дозволувај да го напуштам мојот син“, рече таа.

По неколку минути во вода, Кадотова успеа да се врати на површина. Рибарите во близина веднаш ѝ притрчаа на помош, ѝ фрлија конец и ја извлекоа назад на брегот.

„Ви благодарам што го ризикувавте вашиот живот за да го спасите мојот“, им рече таа по спасувањето.

Набрзо пристигнаа службите за итни случаи и ја пренесоа во болница во Сан Франциско, каде што беше лекувана од хипотермија и состојба опишана како „синдром на океански шок“ или повреди предизвикани од силно фрлање од брановите.

Ваквите ненадејни бранови, познати како „подмолни бранови“, се особено опасни бидејќи се појавуваат без предупредување и можат да ги однесат луѓето далеку од брегот пред да можат да реагираат.

Таа сега се опоравува дома. Неодамна се пријавени и други спасувања на океанот.

YouTube video

Овие бранови се особено чести по должината на крајбрежјата со стрмни, длабоки падови, вклучувајќи делови од северозападниот дел на Пацификот и северна Калифорнија.

„Помолните бранови“ се обично големи крајбрежни бранови кои можат да се искачат многу повисоко на плажата отколку што се очекуваше. Тие се тешки за предвидување и можат да удрат дури и во мирни, сончеви денови со мало или без никакво предупредување.

Некои истражувачи проценуваат дека околу три од секои 10.000 бранови на море достигнуваат овој опасен статус.

Тагови: плажа риба

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Ужас во Унгарија: Полицијата откри морничава колекција кај болнички портир, призна дека јадел човечко месо

Националното биро за вонредни ситуации на Унгарија го истражува шокантниот случај на маж од Будимпешта осомничен за нелегално користење човечки тела откако полицијата пронашла неколку човечки тела на неговиот имот.

Ужас во Унгарија: Полицијата откри морничава колекција кај болнички портир, призна дека јадел човечко месо

Одделот за заштита на животот на Националниот институт го отвори случајот откако властите добија информации за портир кој работел во болница во Будимпешта, кој наводно складирал делови од човечки тела на своето работно место и дома, пренесе Телеграф.

Истрагата откри дека тој имал голем интерес за анатомија и патологија и редовно дисецирал животни. Полицијата се сомнева дека делумно ги добил човечките останки преку својата работа, а исто така ископал тела од напуштени гробишта во Словачка и Унгарија.

Според властите, човекот не ја криел својата чудна страст, раскажувајќи им на семејството и пријателите за тоа, па дури и фотографирајќи ја својата колекција.

Полицијата го уапсила човекот во Будимпешта на 17 јуни, а потоа претресла неколку имоти и возила поврзани со него. За време на претресот, запленети се компјутери, лаптопи, мобилни телефони и разни уреди за складирање податоци.

Полицијата соопшти дека за време на претресот се пронајдени неколку човечки останки. Меѓу запленетите предмети беа полнето човечко лице и кожа, коски ставени во куфер, комплетна потколеница, човечки мозок, надлактица и неколку черепи.

Пронајден е и орган складиран во тегла, кој моментално се испитува за да се утврди дали е од човечко или животинско потекло.

Запленетите остатоци ќе бидат испитани од судски експерти, кои исто така ќе бидат одговорни за утврдување на нивното потекло и извор.

Признал дека јадел човечко месо

Мажот е осомничен за кривично дело нелегална употреба на човечко месо. Според полицијата, тој признал дека го сторил кривичното дело за време на испрашувањето.

Во своето сведочење, тој рекол дека бил особено привлечен од делови од човечкото тело и дека претходно подготвувал разни јадења од нив и ги јадел.

По испрашувањето, тој бил приведен, а потоа судот наредил да биде ставен под кривичен надзор.

Истрагата е сè уште во тек. Властите моментално се обидуваат да го утврдат точното потекло на запленетите човечки остатоци.

Во зависност од исходот од истрагата, бројот на кривични дела за кои се товари човекот може подоцна да се прошири.

Тагови: Унгарија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Живот

Милионерот Брајан Џонсон (48): Не планирам да умрам, моето тело е старо само 18 години (ВИДЕО)

Брајан Џонсон, 48-годишниот милионер кој посветил голем дел од своето време и пари на истражување на долговечноста, тврди дека „нема планови да умре“.

Милионерот Брајан Џонсон (48): Не планирам да умрам, моето тело е старо само 18 години (ВИДЕО)

Џонсон, кој тврди дека неговата „биолошка возраст“ е значително помала од неговата хронолошка возраст, верува дека неговата генерација може да биде првата што ќе живее значително подолго благодарение на научниот напредок од која било претходна.

„Не планирам да умрам“

Во видео објавено на платформата X, тој ја претстави својата визија за иднината. „Ние сме првата генерација што нема да умре. Буквално. Не планирам да умрам“, рече тој.

Додаде дека неговите здравствени индикатори одговараат на оние на многу помлада личност. „Имам 48 години хронолошки, но мојата кардиоваскуларна кондиција е како на 18-годишник, мојот капацитет на белите дробови е како на 18-годишник, моите теломери и хромозоми се како на 18-годишник. Моето тело функционира на многу начини како да имам 18 години.“

Тој, исто така, објасни како биолошката возраст може да се разликува од вистинската, хронолошка возраст. „Затоа велам дека здравјето треба да биде приоритет. Разликата помеѓу здрав и нездрав живот е поголема отколку што мислат повеќето луѓе“, рече тој.

Проект вреден два милиони долари годишно

Џонсон верува дека напредокот во биотехнологијата и подоброто разбирање на човечкото тело би можеле значително да го зголемат животниот век. Во последниве години, тој го претвори своето тело во еден вид експеримент насочен кон забавување на стареењето.

Тој се придржува до строго контролирана исхрана, секојдневно следи бројни здравствени параметри и се подложува на разни третмани и терапии. Се вели дека неговата програма, позната како Project Blueprint, чини околу два милиони долари годишно, според претходните извештаи.

Иако Џонсон и некои застапници на долговечноста веруваат дека развојот на медицината, биотехнологијата и вештачката интелигенција еден ден би можеле значително да го продолжат човечкиот живот, научниците предупредуваат дека досега нема докази дека е можно да се избегне стареењето или да се постигне еден вид бесмртност.

Совети за долговечност

И покрај критиките, Џонсон тврди дека собрал голем број корисни сознанија за здравјето и стареењето во текот на годините. Неодамна сподели со своите следбеници 41 лекција за која вели дека ги научил инвестирајќи милиони долари во истражувања за долговечноста.

„Еве го тоа. Сè што научив трошејќи милиони за долговечност“, напиша тој на X.

Иако неговиот режим е исклучително скап, многу од советите што ги споделува се базираат на навики што им се достапни на повеќето луѓе. Тој ја нагласува важноста на квалитетниот сон, редовното вежбање, исхраната богата со интегрални храни и избегнувањето пушење и други навики што можат да му наштетат на здравјето.

Тој го опишува спиењето како „најмоќниот лек на светот“ и препорачува да си легнувате приближно во исто време секоја вечер, по можност пред полноќ, избегнувајќи екрани најмалку еден час пред спиење.

Тој исто така советува лесна активност по оброците, како што се одење, редовно истегнување и тренинг за сила за зачувување на мускулната маса.

Меѓу препораките се доволен внес на течности, изложеност на утринското сонце за витамин Д и заштита на кожата за време на најсилното дневно сонце. Тој исто така го смета менталното здравје за важно, па затоа охрабрува редовно дружење со пријателите и умерено користење на социјалните мрежи.

Иако нема докази дека ваквите навики можат да го спречат стареењето, експертите генерално се согласуваат дека тие можат да придонесат за поздрав начин на живот и да го намалат ризикот од многу болести.

Тагови: милионерот тело

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер