Инвеститорите очекуваат пазарната вредност на Порше да биде проценета на 60 до 85 милијарди евра. Иницијалната јавна понуда (IPO) на акциите на Porsche би можела да биде меѓу најголемите во германската историја и најголемата во Европа од 1999 година, според највисоките проценки на Refinitiv.
Катар треба да биде главен инвеститор и има намера да се обврзе да купи 4,99 отсто од акциите во компанијата. Исто така, се планира да се понудат приоритетни акции на малопродажните инвеститори во неколку европски земји, вклучително и Франција, Шпанија и Италија, за да ја користат базата на лојални фанови на Porsche.
Volkswagen, исто така, одобри продажба на 25 отсто од Porsche AG на Porsche SE, што значи дека семејствата Porsche и Piech ќе обезбедат контролен малцински удел во компанијата.
Извори блиски до преговорите велат и дека Фолксваген може да им даде на потенцијалните купувачи повеќе од планираните четири недели да изразат интерес за купување на акциите на Порше, но и дека може да се откаже од ИПО доколку инвеститорите не покажат доволно ентузијазам.
„Тоа би било само техничко зелено светло, ништо повеќе. Тоа го отвора патот (до ИПО), но не гарантира дека ѕвоното на берзата всушност на крајот ќе заѕвони “, вели еден од изворите.
Фолксваген објави дека ИПО ќе биде значаен чекор во трансформацијата на компанијата бидејќи има за цел да ги развие своите понуди за софтвер и електрични возила. Инсистирањето на котација на берзата во услови на турбуленции на пазарот е исклучиво во интерес на семејствата Порше и Пиех и нивната желба за поголема контрола, смета Хендрик Шмит, експерт за управување во DWS на Volkswagen.
„Условите на пазарот во моментов се многу неповолни“, нагласува шефот за одржливост и корпоративно управување во Дека инвестмент Инго Спејч, не сакајќи да каже дали неговата компанија ќе ги купи акциите на Порше.
Германската автомобилска асоцијација очекува четири отсто помалку автомобили испорачани во Европа оваа година, што би значело одложување на со нетрпение очекуваното закрепнување од пандемската криза.