Собирот во четврток во Меморијалниот институт „Јад Вашем“, чиј домаќин е израелскиот претседател Реувен Ривлин, е „најголем политички настан“ од основањето на Израел во 1948 година, изјави портпаролот Лиор Хаиат на брифингот во Ерусалим.

Невидениот број учесници на комеморацијата ја одразуваат „важноста да се сеќаваме на холокаустот и да се бориме против антисемитизмот денес“, рече тој.

„Не очекувавме толку многу државници” , изјави за Франс Прес руско-израелскиот милијардер Моше Кантор, претседател на Европскиот еврејски совет и организатор на 5-тиот светски форум.

„Антисемитизмот е светски проблем. Тоа не е само проблем на Израел“, кратко рече Хаиат.

Високиот дипломат, кој посака да биде неименуван, рече дека со поканата до рускиот претседател Владимир Путин на комеморацијата, Израел сака да ја признае улогата што Црвената армија ја одиграла во победата врз нацистичка Германија и во ослободувањето на концентрационите логори во Источна Европа, вклучително и Аушвиц.

Во Ерусалим пристигнуваат и германскиот претседател Франк-Валтер Штајнмаер, францускиот Емануел Макрон, британскиот принц Чарлс и американскиот потпретседател Мајк Пенс.

Рускиот претседател треба да открие споменик во Ерусалим во чест на жртвите од нацистичката опсада на Ленинград, во кој загинаа 800.000 од 1941 до 1944 година.

Путин и Макрон, принцот Чарлс од Британија, треба да го посетат окупираниот Западен Брег и да разговараат таму, одделно, со претседателот на палестинската власт Махмуд Абас.

Анджеј Дуда, претседателот на Полска, на чијашто територија се наоѓал логорот Аушвиц, нема да присуствува на комеморацијата, затоа што Дуда не бил поканет да одржи говор во чест на милионите Евреи убиени за време на Втората светска војна.

Сето тоа се одвива во период на напнатост меѓу Путин, кој неодамна ја обвини Полска за судир со Хитлер и антисемитизам во пресрет на Втората светска војна.

Минатиот септември, Европскиот парламент усвои резолуција во која ги повикува членките на ЕУ јасно да ги осудат злосторствата и агресијата извршени од тоталитаристичкиот нацистички и комунистички систем, особено застапувана од пратеници од Полска и од Источна Европа. Во документот се наведува и дека војната е резултат на договорот за агресија меѓу Москва и Берлин потпишан во 1939 година од министрите за надворешни работи Молотов и Рибентроп.

Спорот за историјата меѓу Варшава и Москва ескалираше минатиот месец. Путин зборуваше најмалку пет пати во декември на клучни состаноци, од кои некои немаа никаква врска со историјата или надворешната политика, за Втората светска војна, пренесува BBC.

Рускиот лидер тврди дека Полска и нејзините сојузници ја нарушуваат историјата, а на маратонската прес-конференција на 19 декември, тој рече дека е „целосно неприфатливо и неточно“ да се обвини Jозеф Сталин за војната на Адолф Хитлер.

Кон крајот на декември, полскиот премиер Матеуш Моравиески го обвини Путин за употреба на Втората светска војна за да ги засени меѓународните порази на Русија, како што е неодамнешната забрана за допинг на руските спортисти.