Како што дознава Канал 5, од извори во Брисел, делегација министри за надворешни работи кон почетокот на март планираат да ги посетат двете земји, за како што се вели во иницијативата да се демонстрира европската солидарност. Тајмингот се совпаѓа со периодот на објавување на извештајот за напредокот на двете земји, кој треба да биде и последната формална алка, пред донесувањето на одлуката за преговори на Европскиот Совет на 27-ми март. Ваквата иницијатива е на Варшава, која ја најави шефот на полската дипломатија во Брисел.
-Од 3-5 март сакаме да ги посетиме Скопје и Тирана заедно со министрите на некои други земји, кои ќе ни се придружат. Сакаме да ја демонстрираме нашата солидарност со овие две земји, да го одржиме проевропскиот став и да покажеме дека Европската Унија не ги заборавила овие држави., изјави Јацек Чапутович министер за надворешни работи
Од македонското МНР велат дека се запознати со иницијатиавата и дека се утврдуваат деталите и перидот кога ќе се случи посетата. Извештајот за Македонија и Албанија, според најавите ќе биде објавен од 2 до 4 март, кога се очекува Европската Комисија да препорача отворање преговори со двете земји. Во услови кога Макрон јасно порача дека е подготвен да ја крене рампата, сега останува неизвесно како ќе се изјаснат непредвидливите Холандија и Данска, кои се скептични кон Албанија и се противат Скопје и Тирана да се вреднуваат во пакет.
-Комисијата останува на својата препорака да се отворат преговорите што е можно поскоро со С.Македонија и Албанија. Ние веќе кажавме дека овие две земји го направија она што беше побарано од нив и продолжија со реформите. Видовме дека беше усвоен законот за јавно обвинителство во С.Македонија, тоа е добредојден чекор. Претседателот на ЕК кажа многу јасно дека би сакала тоа да се случи пред самитот во Загреб, но не може да предвидиме како ќе се однесуваат земјите-членки, вели Ана Писонеро, портпарол на Европската Комисија
Македонскиот премиер Оливер Спасовски денеска ја продолжи посетата на Брисел, со средба со претседателот на Европскиот Парламент, Давид Сасоли. На средбата, на кој присуствуваше и вицепремиерот Османи, двајцата се согласиле дека успешните реформи и новата методологија се важни чекори кој скорешно отпочнување на преговорите за членство.