По скоро три месеци, Полска денеска ги отвори своите граници со сите соседи во Европската унија.
По олеснувањето на режимот на границата со Литванија во петокот, на полноќ се отворија границите со Германија, Чешка и Словачка.
Олеснети се и влезните мерки за граѓаните од земјите надвор од Европската унија, додека се задржани контролните мерки против Украина, Белорусија и руската енклава Калининград.
Во средината на март, полската влада ја затвори земјата поради пандемијата на „ковид-19“, освен за постојаните жители во Полска, возачите на камиони и дипломатите.
Летовите до дестинациите во Европската унија ќе продолжат на 16 јуни.
Чешката Република ќе ги отвори своите граници во понеделник за скоро сите граѓани на Унијата, како и за Швајцарија и Лихтенштајн.
Напредокот во спречувањето на ширењето на коронавирусот и овозможи на владата да ги олесни мерките, објави Министерството за здравство вчера вечер.
Не е потребен негативен тест за коронавирус за влез во земјата. Граничните контроли кон Германија и Австрија се укинати пред една недела.
Забраната за влез останува за жителите на Белгија, Португалија, Шведска и Шлезиска Полска.
Франција најави отворање на границите за земји надвор од шенген-зоната од 1 јули, објави владата доцна синоќа.
„Отворањето ќе биде постепено засновано на здравствената состојба во трети земји и во согласност со европските процедури“, се вели во заедничката изјава на министрите за внатрешни и за надворешни работи.
Одлуката е донесена по препораката на Европската комисија во четвртокот.
Во четвртокот, Европската комисија повика на забрана за сите патувања што не се неопходни до крајот на месецот, а потоа и фазно укинување на забраната.
Министрите за надворешни работи Жан-Ив Ле Дријан и министерот за внатрешни работи Кристоф Кастанер потврдија дека, со оглед на поволната епидемиолошка состојба во Франција, ограничувањата за патувања во рамките на Европската унија ќе бидат укинати на 15 јуни.
Патниците од другите земји на Унијата, како Исланд, Андора, Лихтенштајн, Монако, Норвешка, Сан Марино, Швајцарија и Ватикан, исто така, ќе влегуваат без ограничувања или карантин.
Ограничувања ќе останат за Шпанија и Велика Британија.
Во Франција, од ковид-19 починале 29.000 луѓе.